Соёлын яамны санаачилгаар Засгийн газраас “Хүүхдийн төлөө фонд”-ыг 48 жилийн дараа дахин байгуулав. Олон арван жил мартагдсан тус фондын анхны хуримтлал үүсгэх зорилгоор “Монгол соёл-Монгол хүүхэд” цахим тоглолтыг /2020.12.30/ зохион байгуулсан билээ. Ерөнхийлөгч Х.Баттулгын санаачилсан хөрөнгө цуглуулах Монгол туургатан уран бүтээлчдийн цахим тоглолтын хандивын дансанд 2 тэрбум 222 сая төгрөг цуглараад буй. Энэхүү фондод өнөөдрийн байдлаар 100 гаруй иргэн, аж ахуйн нэгж байгууллага хандив өргөөд байгаа нь энэ аж. 

“Хүүхдийн төлөө фонд”-д хөрөнгө хуримтлуулах тоглолтын үеэр Нийслэлийн Засаг дарга бөгөөд Улаанбаатар хотын Захирагч Д.Сумъяабазар нэгэн баяртай мэдээ дуулгаж Соёлын сайд С.Чулуунд батламж гардууллаа.

Батламжид “Монгол Улсын Засгийн газрын 2020-2024 оны үйл ажиллагааны хөтөлбөрийн “Үндэсний бахархал, Монгол өв соёлыг өвлүүлж, олон улсын стандарт шаардлагад нийцсэн соёлын барилга байгууламжуудыг барьж, ашиглалтад оруулна” гэсэн зорилгын хүрээнд Хүүхдийн номын сан, Хүүхэлдэйн театрын цогцолбор барихад зориулж Чингэлтэй дүүргийг V хорооны нутаг дэвсгэрт 11000 квадрат метр газрын асуудлыг шийдвэрлэн гэрчилгээжүүлэв” хэмээн бичжээ.

Ингэснээр Хүүхдийн номын сан, Хүүхэлдэйн театрын цогцолбор барих газартай болж, олон нийтийн хандив болон Засгийн газрын дэмжлэгээр энэ төслийг эхлүүлэх боломж бүрдсэн байна.

 “Хүүхдийн төлөө фонд”-д хандивласан төгрөг бүр хүүхдийн хөгжлийн төлөө зориулагдахаас гадна олон улсын стандартад нийцсэн бүтээн байгуулалтыг санхүүжүүлж, ил тод нээлттэй хэрэгжинэ гэж сангийн яамны хэвлэл мэдээллийн албанаас мэдээлэлсэн байна