Барилгын хөгжлийн төвийн дэд захирал бөгөөд ерөнхий инженер Б.Энхболдтой 2020 онд хийж хэрэгжүүлсэн онцлох ажлуудын талаар ярилцлаа.

2020 оны сүүлийн энэ өдрүүдэд хөл хорио тогтоосон ч  цахимаар маш их ажил амжуулсан өдрүүд  өрнөлөө. Таны  хариуцсан ажил үүргийн хувьд  хэр ажил амжуулж чадсан жил болсон бэ?

Монгол Улсын хувьд 2020 онд бүтээн байгуулалт өрнөсөн жил гарлаа. Хэдий цар тахал дэлхий нийтийг хамарсан ч Монгол Улс саяхныг хүртэл дотооддоо халдвар алдаагүй. Тийм ч учраас бүтээн байгуулалтын ажил зогсолтгүйгээр өрнөж байсан. Өнөөдрийн байдлаар Монгол Улсын хэмжээнд 2320 гаруй барилга байгууламжийн зураг төсөл магадлалаар орсон нь  бүтээн байгуулалтын ажилд онцгойлон анхаарсны нэг илрэл. Энэ нь өмнөх оныхтой харьцуулахад 400 орчим зураг төслөөр нэмэгдсэн үзүүлэлт.  Мөн 2020 онд Барилга, байгууламжийн зураг төсөлд хөндлөнгийн магадлал хийдэг орон тооны бус 240 экспертийг сонгон шалгаруулсан. Эдгээр экспертүүд орон сууцны 270 орчим зураг, олон нийтийн барилга 794, инженерийн шугам сүлжээний 680,  их засварын 276, Ерөнхий төлөвлөгөөний 18, гадна тохижилтын ажлын 212 зураг төсөвт магадлал хийсэн

Төсвийн ерөнхийлөн захирагчид барилга байгууламжийн зураг төсвийг  магадлалаар баталгаажуулахаас түрүүлж улсын төсөвт хөрөнгө суулгадаг асуудал гардаг байсан. 2020 онд энэ байдлыг халж чадсан уу?

Жил бүр сангийн яамны хөрөнгө оруулалтын газраас зохион байгуулдаг аймгуудын Хөрөнгө оруулалт, хөгжлийн бодлого төлөвлөлтийн газар, нэгжүүд, холбогдох яамдын хөрөнгө оруулалтын газруудтай хийх зөвлөгөөн дээр бүгд саналаа нэгтгэсэн гэж ойлгож болно. Өөрөөр хэлбэл барилга байгууламж иж бүрэн ажлын зураг төсөвтэй, магадлалын дүгнэлт нь гарч, хөрөнгө оруулалт нь тодорхой болсон төсөл арга хэмжээг улсын төсөвт суулгах тал дээр анхаарал хандуулсан.  Энэ онд Засгийн газраас  гаргасан нэг томоохон шийдвэр бол улсын төсвийн хөрөнгө оруулалтаар хэрэгжиж байгаа сургууль, цэцэрлэг, эмнэлэг бусад чиглэлийн барилга байгууламжийн зураг төсөл,  хөрөнгө оруулалт Барилга хот байгуулалтын яаманд шилжиж ирлээ.

Энэ дагуу нэг маягийн зураг болон давтан хэрэглэх зургуудад дүн шинжилгээ хийх шаардлага гарсан. Зарим нэг маягийн зураг болон давтан хэрэглэх зургуудын норм, дүрэм стандарт хоцрогдсон, хийцийн хувьд алдаатай гэсэн дүн гарсан. Тиймээс Барилга, хот байгуулалтын яаманд танилцуулсны үндсэн дээр нэг маягийн зураг болон  давтан хэрэглэх зургийг сайжруулах, шинэчлэх ажил хийгдэж байна. Энэ асуудалд Барилга, хот байгуулалтын яамнаас анхаарч 2021 онд нэг маягийн зураг, давтан хэрэглэх зургийн дагуу Монгол Улсын хэмжээнд бүтээн байгуулалт өрнөнө гэж ойлгож болно.  Энэ мэт Барилгын хөгжлийн төвөөс барилга байгууламжийн зураг төсөлтэй холбоотой нэлээд ажлууд хийгдлээ.

2021 ОНЫ ЭХНИЙ УЛИРАЛД БҮРТГЭЛ МЭДЭЭЛЛИЙН САНГ БАЙНГЫН АШИГЛАЛТАД ОРУУЛНА

Барилгын чиглэлийн бүртгэл мэдээллийн сан Барилгын хөгжлийн төв төдийгүй салбарын хувьд нэлээд томоохон ажил болсон.   Энэ ажил ямар шатандаа байгаа вэ?

Монгол Улсын хэмжээнд барилгын салбарын нэгдсэн бүртгэл мэдээллийн санг бүрдүүлэх тал дээр манай Барилга, барилгын материал үйлдвэрлэлийн хэлтэс хариуцаж ажиллалаа. Бүртгэл мэдээллийн санд Барилгын хөгжлийн төвийн бүх хэлтсийн үйл ажиллагаа чиглэл бүрээр, он цагийн дарааллаар мэдээллийн бааз бий болсон. 2019 онд төвийн бүх хэлтсийн үйл ажиллагаа цахим хэлбэрт шилжсэн гэж ойлгож болно. Тиймээс мэдээллийн сангийн бүрдлийг 2021 онд бататгаж,  цар хүрээг нь нэмэгдүүлэх, улам боловсронгуй болгон салбарын нийт үйл ажиллагаатай холбоотой тоон мэдээ, мэдээллийг иргэд, аж ахуй нэгжүүдэд илүү ил тод, нээлттэй  авдаг болгох тал дээр анхаарч ажиллана. Тиймээс 2021 оны эхний хагас жилд  нэгдсэн бүртгэл мэдээллийн санг байнгын ашиглалтад оруулна. Ингэхийн тулд  санхүүгийн болон  төлөвлөлтийн хувьд ч тодорхой үе шатны ажлууд хийгдэж байна.

Мөн Барилга, барилгын материал үйлдвэрлэлийн хэлтэс барилгын түгээмэл тархацтай орд газрууд, илэрц, барилгын материалын үйлдвэрлэлийн байршлыг газрын зурагт буулгаж шинэчлэн гаргасан. Энэ дагуу барилгын түгээмэл тархацтай орд газруудын газрын зураг бүхий мэдээллээр товхимол гаргахаар ажиллаж байгаа. 

Барилгын түгээмэл тархацтай орд газруудын мэдээлэлд ямар цар хүрээний мэдээлэл багтаж байгаа вэ?

Тухайлбал нүүрс гэхэд коксжих чанар, хэдэн жилийн хугацаатай ашиглагдах нөөц, тухайн төв суурин газраас хэдэн километрийн зайтай,  газар зүйн байрлалын солбилцол гээд бүхий л мэдээллийг тодорхой болгосон. Үүнийг дагаад тухайн орон нутагт хэрэгжиж байгаа төсөл хөтөлбөрүүд чанартай барилгын материал ашиглах, барилгад хэрэглэгдэж байгаа материалын тээврийн асуудал, тухайн  бүс нутагт ямар чиглэлийн материалын үйлдвэрүүд хөгжих боломжтой гээд дүн шинжилгээтэй тоон мэдээллүүд гарна.

Дээрх бүх мэдээлэлтэй холбоотойгоор  барилгын материалын аюулгүй байдал, газар хөдлөл, барилгын үнэнд нөлөөлдөг өргөн хэрэглэгддэг гол нэрийн материалын үнийн судалгаа, барилгын материалын  Монгол Улсад үйлдвэрлэх нөөц бололцоо гээд бүхий л мэдээлэл гарах боломжтой. Энэ бүх мэдээлэл нээлттэй байдлаар мэдээллийн санд байршина

Барилгын материал үйлдвэрлэлийн чиглэлд 2021 онд хийж хэрэгжүүлэх ажлуудын талаар дурьдахгүй юу?

2020 онд хийж хэрэгжүүлсэн онцлох ажлуудын нэг бол Барилгын чанарын улсын зөвлөгөөнийг анх удаагаа зохион байгуулсан. Үүний бэлтгэл ажил болгож, Барилгын материал үйлдвэрлэлийн улсын зөвлөгөө, барилга угсралтын, зураг төслийн гээд салбар зөвлөгөөнүүдийг зохион байгуулсан. Харин зөвлөгөөн болгоноос ажил үйлчилгээ, салбарын уялдаа холбоог сайжруулах шийдвэрүүд гарсан. Тиймээс эдгээр шийдвэрүүдийг хэрэгжүүлж ажиллах зорилтыг 2021 оны ажлын төлөвлөгөөндөө тусган үе шаттайгаар төлөвлөж байна. Энэ болгоноос чанар, хяналт, үр дүн гарч эхэлнэ.

Мөн гадаад болон  дотоодоос орж ирсэн барилгын материал, техник технологи,  бүтээгдэхүүнийг нийтэд сурталчлах чиглэлээр Мишээл экспо төвтэй хамтарч хавар, намрын  улиралд яармаг худалдааг зохион байгуулж оролцдог.  2021 онд энэ чиглэлээр илүү анхаарч ажиллаж, илүү өргөн цар хүрээтэй ажиллах тал дээр анхаарах төлөвлөгөөтэй байна.

Түүнчлэн гадаадын болон улсын төсвийн хөрөнгө оруулалтаар хэрэгжиж байгаа төсөл хөтөлбөрүүд дээр хяналт тавьж ажилладаг Барилга байгууламж захиалагчийн хяналтын хэлтсийн үйл ажиллагаан дээр нэлээд ажлуудыг хийхээр төлөвлөсөн. Энэ жил гэхэд 550 орчим төсөл арга хэмжээн дээр захиалагчийн хяналт тавьж ажиллалаа. Ингэхдээ улсын хэмжээнд гурван бүс болгож, инженер техникийн ажилтнуудаа бүс тус бүрт хуваарилж багийн системээр захиалагчийн техникийн хяналтыг тавьсан. Хяналтын хуудас болон хяналтын программ хангамжуудыг ашиглаад өдөр тутам барилга угсралтын үйл ажиллагаанд хяналт тавьж,  захиалагч  болон төсвийн ерөнхийлөн захирагчийг мэдээ мэдээллээр хангаж ажилласан. Үүний үр дүнд  150 гаруй төсөл арга хэмжээг байнгын ашиглалтад оруулж, 400 орчим төсөл арга хэмжээний ажил үргэлжлээд явж байна

Таны ярианаас бүтээн байгуулалтын ажил, түүнийг ашиглалтад оруулах үйл явц  цар тахалын үед ч өрнөсөөр байж. Ямар зохион байгуулалттай ажилласан бэ?

Хэдий өнөөдөр цар тахалтай байгаа ч манай инженер техникийн ажилчид өдөр тутмын үйл ажиллагаанд Улсын онцгой комиссоос өгсөн үүрэг чиглэл,  дэлхийн эрүүл мэндийн байгууллагаас гарсан зөвлөмжийг баримталж ажиллаж өдөр тутмын хяналтыг хийж хэрэгжүүлж байна. Энэ үндсэн дээр оны төгсгөлд ашиглалтад орох байсан эмнэлэг эрүүл мэндийг байгууллагыг ашиглалтад орууллаа. Улсын онцгой комиссын зүгээс ч Монгол Улсын Засгийн газрын зүгээс ч анхаарал хандуулсны үндсэн дээр үр дүнтэй ажиллаа. Нийслэл хэрэгжсэн төсөл хөтөлбөр дээр онцгойлон халдвар хамгаалалтын дэглэмийг сахиж ажилласан. Тиймээс ч Эрүүл мэндийн яамны 77 төсөл арга хэмжээнээс 27 төсөл арга хэмжээг байнгын  ашиглалтад оруулсан байна. Боловсрол шинжлэх ухааны  яамны 200 орчим төсөл арга хэмжээ хэрэгжиж байгаагаас 50 орчим төсөл арга хэмжээ, Барилга хот байгуулалтын яамны захиалгат  100 орчим арга хэмжээг байнгын ашиглалтад оруулж чадлаа.

Бид ирэх  оноос томоохон төсөл хөтөлбөрүүд дээр ажлын талбайг камержуулан өдөр тутмын хяналт, тайлан мэдээ мэдээллийг цаг алдалгүй хүргэх тал дээр анхаарна. Монгол Улсын хэмжээнд хэрэгжиж байгаа зарим томоохон төсөл хөтөлбөрүүд дээр инженер техникийн ажилтныг байнгын байршуулж ажиллуулах, өдөр тутмын үйл ажиллагаанд хяналт тавьж захиалагч байгууллагыг мэдээ мэдээллээр хангах тал дээр онцгойлон анхаарч ажиллахаар төлөвлөж байна. Дээр нь олон улсын томоохон төсөл хөтөлбөрүүд нэлээд хэрэгжиж байгаа. Үүн дээр өөрсдийн инженер техникийн ажилтнуудыг ажиллуулж хооронд нь туршлага солилцож, ур чадварыг сайжруулах мэргэжил ур чадварыг дээшлүүлэх тал дээр анхаарна.