Монголын барилга бүтээн байгуулалтын салбарын төлөө хүчин зүтгэж, гар, бие оролцож яваа эрхэм харилцагч танд “Барилга МН”-ийн хамт олны зүгээс айлчлан ирж буй 2021 оны мэнд хүргэн мэндчилж байна! 

2020 он гарсаар багагүй хүндрэл, бэрхшээлүүдтэй тулгарч байгаа ч хамтын харилцаа холбоогоо хүндэтгэн, бидэнтэй хамтран ажиллаж байгаа Та бүхэнд гүнээ талархаж байгаагаа юуны өмнө илэрхийлье. 

Улиран өнгөрөгч 2020 онд харилцагч таны реклам, ярилцлага, нийтлэл, мэдээ мэдээллийг Барилга МН сэтгүүл болон Barilga.mn сайтаараа дамжуулан олон нийтэд түгээж хамтын ажиллагаагаа бататган тогтоож, бизнесийн  харилцаа холбоогоо өргөжүүлэн тэлсэн  амжилт бүтээлээр дүүрэн жил боллоо.

Бид өнгөрсөн хугацаанд үүссэн нөхцөл байдлаас үл хамааран харилцагчид руугаа чиглэсэн үйл ажиллагаануудаа тасралтгүй зохион байгуулж, хүлээсэн үүргээ биелүүлэхийг хичээн ажилласаар байна. 

Үүний нэгэн тод жишээ бол өндөржүүлсэн бэлэн байдлын үед “Barilga expo - 2020” үзэсгэлэн, яармагаа салбартаа анх удаа цахимаар зохион байгуулсан явдал юм. Энэхүү томоохон үйл ажиллагаагаар бид хамтдаа дижитал хувьсгалыг хийж, нэгэн шинэ хуудсыг бичилцсэн билээ. Түүнчлэн халдвар хамгааллын өндөр дэглэмийн доор “Барилга орон сууц 2020” үзэсгэлэнгээ танхимаар амжилттай зохион байгуулж,  салбарын удирдах ажилтнуудын дундах “Barilga billiard 2020” снүүкэр биллиардын тэмцээний аваргуудаа шалгарууллаа. 

Мөн Barilga.mn сайтынхаа 5 дахь удаагийн бүрэн хэмжээний шинэчлэлтийг хийж, нийт 1200 гаруй байгууллагуудыг нэгтгээд байна. Шинэчлэлт хийснээрээ харилцагчдынхаа маркетинг хийх талбарыг илүү зорилтот бүлэг рүү чиглэсэн, илүү мэргэжлийн түвшинд хүргэж, борлуулалтын гол суваг нь болохыг эрмэлзэж, цаашлаад дэлхий нийтээрээ цахим эрин үед шилжиж буй энэ цаг үетэй хөл нийлүүлэн алхах боломжийг бий болгож байгаадаа маш их баяртай байна. 

Барилгын салбарын ААН байгууллагуудад чиглэсэн бас нэгэн томоохон ажил бол “Барилгын байгууллагуудыг вэбжүүлэх аян” юм. Бид энэхүү аяныхаа хүрээнд барилгын салбарын 70 гаруй компанийг сургалтад хамруулаад байгаа бөгөөд харилцагчдадаа үнэ төлбөргүй мэдлэг мэдээлэл өгч ажилаж байна. 

Мөн манай хамт олон зарим үйл ажиллагаагаа цахим хэлбэрт шилжүүлэн, тогтсон цаг хугацаандаа сэтгүүлээ гаргаж, захиалагчдадаа түгээж байгаа бөгөөд “Барилга МН” сэтгүүлийн 12 дугаар сарын дугаар болон “БАРИЛГА 2021” календарь тогтсон хугацаандаа хэвлэгдэн гарч, вэбжүүлэх аяны оны сүүлийн сургалтуудаа онлайнаар амжилттай зохион байгуулсан билээ.

Бид Барилга МН сэтгүүлийн шинэ оны эхний дугаараа эрхлэн гаргахаар ажиллаж, 2021 оны томоохон төлөвлөгөөт ажлуудаа цаг алдалгүй хийж хэрэгжүүлсээр байна. 

 Эрхэм харилцагч танд эрүүл энхийг хүсч, угтан ирж буй 2021 оны ажил үйлсэд тань амжилтын дээдийг хүсэн ерөөе!