1.Хуучны 40, 50 мянгатын 4 давхар барилгуудын агааржуулалтын систем нь тус тусдаа /дангаар/ сорж хаяхаар төлөвлөгдсөн байдаг тул бараг дамжих боломжгүй. Нэг айлын  агаар зайлуулах хоолой нь  ариун цэврийн өрөө, гал тогоо тус бүрээс бохир агаарыг сорж зайлуулахаар төлөвлөж, угсрагдсан байдаг ба сорох хоолой нь дээд, доод айлуудтайгаа холбогдохгүйгээр дээвэр дээр сувагт цуглаж хаягддаг учраас айл хооронд агаар дамжихгүй гэсэн үг юм. 

2.Хуучны угсармал 5, 9 давхар, СОТ -ын 5 давхар тоосгон барилгуудын  агааржуулалтын систем нь одоо ч угсарч буй  агааржуулалтын хоолойн зарчмаар ажилладаг  бетон болон тоосгон суваг бүхий хоолойтой.  Суваг нь өөртөө үндсэн болон салбар сувагтай. Салбар суваг нь айлаас агаарыг сороод дээшлэхдээ дээд айлынхаа салбар шугамны доор үндсэн сувагтаа нийлэх зарчмаар холбогдсон байдаг. Нэг босоо үндсэн гол шугамд тухайн системийн босоо салбарууд холбогдож байгаа нь агаар дамжих магадлалтай мэт харагдаж байгаа ч  угсралт маш сайн хийгдсэн, агаар буцаж цохьдоггүй тул айлууд хооронд   дамжихгүй.  Сүүлийн үед  хуучны орон сууцны барилгуудад засварын ажил их хийгдэж, мэргэжлийн бус хүмүүс хоолойн хийцлэлийг эвдэн шууд хажуугаас холбох, гал тогоо ариун цэврийн өрөөний системийг нэгтгэн /холих/ асуудлуудаас болж өвчин дамжих магадлалыг үүсгэнэ.

3.Сүүлийн үеийн барилгуудад агаар сорох систем нь угсармал барилгатай ижил зарчимтай ба гөлмөн төмөр  хоолойгоор угсралт хийж байна. Айлуудын бохир агаар гол шугамдаа цуглараад дээш хаягддаг зарчмаар ажиллаж, бохир агаар нэгээс нөгөөрүү дамжихгүй байхаар хийгддэг. Гэвч зарим барилгуудын ердийн сорох системийн угсралтын чанар, сувгийн  битүүмжлэл, суваг дахь хоолойн дулаалга гэх мэт ажлуудын чанараас шалтгаалаад буцааж агаар цохих /үлээх/, гадна хаалга онгойлгоогүй байхад дээд доод айлуудын хоол, тамхи үнэртээд байдаг асуудлууд нилээн гарч байна. Ялангуяа өвлийн улиралд хүйтэн агаар орж ирж  өрөөг тав тухгүй болгосноор хүмүүс бодитойгоор мэдэрдэг. Ийм барилгуудад энэхүү ковид өвчин тархах магадлалтай юм. Мөн өндөр барилга их баригдсан, агаарыг хуйлралт үүсэх нь ихэссэн, дээврийн сувгийн битүүмжлэл эвдэрсэн, сувгийн хийцлэл тооцоогүйгээр хийгдсэн зэргээс шалтгаалж буцаж агаар цохигдон нөгөөгөөс нөгөөд дамжин орж болно.

Сүүлийн үеийн барилгуудын зураг төсөл нь норм стандартын дагуу зурагдсан боловч угсралтын явцад хямд төсөр хийх сэтгэл /аль хямд үнэ санал болгосон мэргэжлийн бус, харсанаараа хийдэг/-ээр мэргэжлийн бус хийгдсэн  тохиолдол маш их гарч байна. Үүнээс үүдэн бохир агаар нэг айлаас нөгөө айлд шууд дамжих, агаар холилдох зарчмаар өвчин дамжих магадлал ихсэж байна.

Мөн эмнэлгийн байгууллагын агаар сэлгэлтийн системийг төлөвлөхдөө тусгай зориулалтын тусгаарлах өрөөнүүдийн агааржуулалтын хоолойг тусдаа төлөвлөх ёстой ба цэвэр агаарыг коридорт өгч өрөөнүүдээс бохир агаарыг сорж зайлуулах /агаарын урсгал коридороос-өрөөрүү гэсэн зарчимтай/ байх ёстой. Өрөөнүүдээс бохир агаарыг зайлуулах систем нь 1-10 өрөөг хамтад нь зайлуулахаар төлөвлөсөн байдаг ба энэ тохиолдолд тухайн системийг ажиллуулаагүй үед цонх онгойлгох тохиолдолд /агаар оруулах зохилгоор /нэг өрөөнөөс нөгөөд бохир агаар дамжих магадлалтай.

Гэвч агаар-дуслын замаар халдварлах боломжтой аливаа халдварт өвчний үед ашиглах зориулалтын барилга байхгүй, эмнэлгийн хүрэлцээ муу зэргээс эмнэлгийн барилгаа бүхэлд нь тусгаарлан өвчлөлтийн төрөл бүрийн түвшинтэй өвчтөнүүдийг цуглуулан эмчилж байна. Тэгтэл коридороос-өрөөрүү гэсэн агаарын урсгалтай  төлөвлөөгүй, агаар сэлгэлтийн системээ ажиллуулдаггүй, чанаргүй угсралт хийгдсэн эмнэлгийн барилгууд нь  агаар-дуслын замаар өвчтөй хүнээс-эрүүл хүн рүү өвчин халдаах өндөр эрсдэлтэй.