Дэлхийн үл хөдлөх хөрөнгийн салбарын топ франчайз компаниудын нэг болох RE/MAX компани Монголд үйл ажиллагаагаа эхлүүлээд 5 жил болж байгаа билээ. Энэ удаагийн VIP ярилцлагадаа тус компанийн гүйцэтгэх захирал  үл хөдлөх хөрөнгө зуучлалын салбарт амжилттай ажиллаж яваа залуу бизнесмэн Г.Тэмүүлэнг урилаа. Тэрээр RE/MAX франчайзыг анхлан нэвтрүүлэхээс эхлээд  50 салбар компанийн 1000 гаруй агенттай болтлоо өргөжин тэлж, өсөн  хөгжихөд гол үүрэг гүйцэтгэн ажилласаар байгаа юм.
Г.Тэмүүлэн 2012 онд ХУИС-ийг олон улсын харилцааны мэргэжлээр, 2013 онд АНУ-ын Доминикан Юниверситиг бизнесийн удирдлагаар тус тус төгсжээ.   

Юуны өмнө 5 жилийн ойн баярын мэнд хүргэе! Ойн хүрээнд ямар үйл ажиллагаа, арга хэмжээнүүдийг зохион байгуулж байна вэ? 

Бид ойн хүрээндээ  RE/MAX 5 жилийн турш үйл ажиллагаагаа явуулахдаа нийгэмд ямар өөрчлөлтийг авчирсан бэ?, хичнээн хүмүүсийн амьдралыг өөрчилж ямар хувь нэмэр оруулсан бэ гэдэг талаас нь мэдээлэл хүргэхийг хүсч байгаа юм. Эргээд харахад 5 жилийн дотор бидний нийт хийсэн үл хөдлөх хөрөнгийн борлуулалт 1 их наяд төгрөгөнд хүрч,   11,000 гаруй хэрэглэгчдэд мөрөөдлийн үл хөдлөх хөрөнгөө олоход тусалсан байна.  Мөн бидний зуучлуулсан үл хөдлөх хөрөнгөөс нийт 13,8 тэрбум төгрөгийг улсын татварт төвлөрүүлжээ.              

Үүний хүрээнд  гурван том арга хэмжээ зохион байгуулж байгаа. 10/08-нд брокер эзэмшигчид буюу “RE/MAX” - д хөрөнгө оруулагч захирлуудынхаа дунд VIP төвшний уулзалтыг “High land” паркад зохион байгууллаа. Мөн салбар компаниудын нийт 1000 гаруй агентуудынхаа дунд “RE/MAX GOT TALENT” - ыг яг л бодит шоу хэрхэн явагддаг тэр зарчмаар тайз, шүүгчдийг оролцуулан өргөн цар хүрээнд хийлээ. Удахгүй  эрхэм хүндтэй харилцагчдынхаа дунд VIP уулзалтыг зохион байгуулах төлөвлөгөөтэй ажиллаж байна. 

Энэхүү франчайзыг Монголд нэвтрүүлэх суурь судалгаанаас эхлээд бүрэн гар бие оролцож яваа хүнийхээ хувьд франчайзыг нэвтрүүлсэн анхны түүх, нөгөө талаараа туршлагаасаа бидэнтэй хуваалцаач? 

Би 3 дугаар ангид байхдаа АНУ - руу явж, тэндээ сурах болсон. Тиймээс бага байхаасаа Америкийн олон үндэстнүүдийн соёлын ялгаа, зан харилцааны шинж чанарыг мэдэрч өссөн нь ирээдүйд олон улсын тэргүүлэгч брокеруудтай уулзаж, тэдний соёл харилцааг ойлгож ажиллах, Монголын нөхцөлд тохирохгүй зүйлийг аль болох талаас нь ярилцах зэрэг давуу тал надад үүссэн болов уу гэж боддог. 

Хэдийгээр би гэр амьтай ч олон орноор явж, танин мэдэх хүслээ дагаад Олон улсын харилцааны мэргэжлийг сонгосон. Энэ мэргэжлийн нэг сул тал нь эмч шиг нарийн дагнаж болдоггүй, давуу тал нь хөрвөх чадвар сайтай учраас аливаа бизнесийг олон талаас цогцоор нь харах боломжийг надад өгч байсан. 

Мөн сургуулиа төгсөөд Голомт банкинд ажиллаад маш их зүйлийг сурсан. Монголд хамгийн эмх цэгцтэй, хяналт сайтай банкны салбарт ажилласанаараа удирдлагын арга барил, байгууллагын соёл, брэндингийн үнэ цэнэ ямар чухал болохыг мэдэж авсан. Мөн өдөрт 200 гаруй хүнтэй нүүр тулан ярилцаж, харилцааны ур чадварт суралцаж, миний хувьд том туршлага болсон. Ялангуяа Монголчууд амархан уурлаж, амархан баярладаг зан чанар, сэтгэл зүйтэй учир харилцааны ур чадвар их шаарддаг юм билээ. /инээв/

Банкинд ажиллаж байхаасаа шинэ бизнес эхлүүлэх бодолтой явсан. Үүнийгээ ч ойр тойрны хүмүүсдээ хэлдэг байлаа. Тэр үед манай эгч шинэ бизнес хийхээр төлөвлөж байсан одоогийн RE/MAX франчайзын Монгол дахь салбарын үүсгэн байгуулагчид болох Н.Батбаатар ах, Б.Бүжинлхам эгчтэй танилцуулсан юм. Ихэнх ажлын ярилцлага хослол өмсөөд  албаны яриагаар өрнөдөг бол бидний анхны уулзалт маш энгийн, чөлөөтэй, тэд намайг танин мэдэх зорилготой байсан нь үнэхээр таалагдсан. Ингээд 2012 оноос эхлэн үл хөдлөхийн судалгааны ажлыг хийж 3 жилийн дараа АНУ-ын Денвер хотноо “RE/MAX” франчайзыг Монголд нэвтрүүлэх гарын үсэг зурж байлаа. Тухайн үед дэлхийд хөгжөөд 200 гаруй жил болсон бизнесийг тэгээс нь эхлэх, эсвэл Монголдоо үл хөдлөхийн шилдэг компанийн “ноу хау” - аас суралцах боломж л байсан. Бид франчайзыг сонгосон. Шинэ бизнес учраас маш нууцлалын зэрэгтэй ажиллаж зах зээл, харьцуулалт, ирээдүйн ашиг гэх мэт бүх судалгаа харьцуулалт хийсэн. Хамгийн эхний алхам франчайз эрх авах байлаа...

Франчайз эрх авахад өрсөлдөөн хэр байсан бэ? Хүссэн болгонд боломж өгдөггүй болов уу? 

Тухайн үед Монголын нэр нөлөө бүхий 30 гаруй компаниуд аль хэдийнэ хүсэлтээ АНУ - ын RE/MAX оффисд өгсөн учраас тун өрсөлдөөнтэй байв. Дэлхийн брэндингийн нэр хүндийг унагахгүйгээр, хариуцлагатай ажиллах ёстой учир тавигдах шаардлага ч төдий чинээ өндөр байдаг. Мэдээж хүссэн хүн болгонд эрх олгодоггүй, шалгуур өндөр. 

Америкчууд зорилготой, хүмүүсийг уриалан дуудаж чаддаг хүмүүсд их дуртай. Хамгийн гол нь тухайн брэндингийг хөгжүүлэх чин хүсэл, дараа дараагийн алхмаа тодорхойлсон, зорилготой гэдгээ харуулах нь чухал байдаг. Тиймээс эхний уулзалтыг амжилттай хийхийг маш их хүсэж байлаа. Тухайн үед франчайз хариуцсан захирлууд нь Бээжин хотод ирснийг мэдээд шууд л очиж уулзсан. Гэтэл RE/MAX нь үл хөдлөхийн зуучлалын бизнес биш, харин үл хөдлөхийн бизнес хийх гэж байгаа хүмүүсд “ноу хау” - ыг олгох үйл ажиллагаа эрхэлдэг компани байсан юм. Бидний анхны бизнес санаанаас өөр байсан учир эргэлзэж байсан ч Н.Батбаатар захирал харин ч сонирхолтой, илүү өндөр боломжтой бизнес гэж үзэж байсан учраас энэ салбарт эргэлт буцалтгүйгээр ажиллахаар шийдэж, өмнө нь ажиллаж байсан франчайз бизнесийн туршлага дээрээ үндэслэн нарийн төлөвлөгөөнүүд гаргасан. 

Бид 30 гаруй орноор явж, RE/MAX-ын хөгжилтэй өөрсдийн биеэр танилцаж, бүсийн захирлуудтай уулзалт хийсэн. Тухайн үед  манай орон үл хөдлөхийн салбарын хууль зүйн зохицуулалтгүй байсан учраас Монголтой адил нөхцөлд үйл ажиллагаа явуулдаг салбаруудыг илүү судалсан. Мөн сар гаруй хугацаанд бүсийг хэрхэн удирдан зохион байгуулах, мастер эрхээ хэрхэн амжилттай авах талаар вакум сургалтыг авч, төслийн багаа маш сайн бүрдүүлж,  6 - 7  сарын дотор нутагшуулах ажлаа хийж гүйцэтгэж байсан. Одоо манай “RE/MAX” - ын фронтод 50 гаруй салбар компанийн 1000 гаруй агентууд нэгдэж, мэдээллийн сан дахь үл хөдлөхийн тоо 116, 850 хүрээд байна. 

Эдгээр 50 гаруй салбар компани нь төв оффистойгоой маш уялдаатайгаар ажиллах шаардлагатай болдог байх нь. Энэ харилцааг хэрхэн зохицуулж ажилладаг вэ? 

Энэ бол миний хариуцаж байгаа гол ажил. Франзайчийн суурь систем олон хүнийг зохицуулан ажиллах зорилготой байдаг бөгөөд хэдий чинээ олон агенттай байна төдий чинээ үр дүнтэй ажилладаг систем юм. Дотоод журам нь ардчилсан зарчмаар буюу  салбар компани бүрийнхээ дуу хоолойг сонсож, мэдээлэл солилцооны ажлуудыг байнга зохион байгуулдаг. Харин тухайн компани ямар төлөвлөгөөгөөр, хэрхэн хөгжиж ажиллах компанийн асуудал болдог. Мөн салбарууд улам нэмэгдэж байгаа учраас тавтын системийг ашиглаж байна. Миний хувьд байгууллагын соёлд их анхаардаг. Товчхондоо ийм л зарчмаар ажилладаг.  RE/MAX бол биеэ даасан бизнес. Манай брокер оффис бүр өөрийн гэсэн бизнесийг хийж байгаа тусдаа компани, тусдаа аж ахуйн нэгжүүд. Бид үйл ажиллагаагаа зохион байгуулахдаа оффис бүрийн биеэ даасан бизнес үйл ажиллагаанд нь хүндэтгэлтэй хандаж тэднийхээ бодлыг сонсож хамтран ажиллах зарчмаар ажилладаг.  

Хууль зүйн зохицуулалтгүй байхад энэ салбарт түр тоглогчид их байсан. Тиймээс ёс зүйгүй, худалдан авагч хохирсон ч хариуцлага хүлээх эзэнгүй, зохицуулалтгүй, дотоодын компаниуд хоорондоо уялдаагүй байв. Зарим хүмүүс хөрөнгө оруулалт хийгээд өөрөө билэг тэмдэг төдий сэтгэлгүй ажиллах нь бий. Тиймээс ундарга нь цэвэр бол ус нь цэнгэг гэдэг шиг салбар компанийн эрх авахаар ирсэн хүмүүст өндөр шалгуурыг тавьж байгаа. Салбартаа амжилттай ажиллах хүсэл зорилготой, санхүүгийн хувьд эрсдлээ даах чадвартай, бизнесийн манлайлын ур чадвар сайтай гэх мэт. Үл хөдлөхийн салбар нь үндэсний аюулгүй байдалтай хамаатай учраас мөнгөтэй болох, мөнгөнд дурлаж энэ салбарт ажиллаж байгаа хүмүүс хор хөнөөлтэй гэж үздэг. 

Дэлхийн бусад RE/MAX - ын салбарууд нийгмийн хариуцлагынхаа хүрээнд хандив тусламжийг байнга үзүүлдэг юм байна. Танай хувьд? 

Нийгмийн хариуцлагын хүрээнд үйл ажиллагаа зохион  байгуулдаг “RE/MAX Foundation” хороогоороо дамжуулан хандив тусламжийг үзүүлж байгаа. Манай брокер оффисууд гүйлгээ бүрээсээ 1 долларыг сайн үйлсэд зориулж, уг хандив нь тус хороонд цуглардаг. Одоогийн байдлаар 40 орчим сая төгрөгийг “Ид шидийн орон”-д хандивлаж, төрөл бүрийн арга хэмжээнүүдийг хамт зохиож байна. 

Хандивын хэмжээнээс хамааран “Miracle agent” цолыг олгож, тэр цолоороо тухайн агентууд бахархаж, нийгмийн хариуцлагатай гэдгээ илэрхийлж байдаг юм. Энэ нь зөвхөн ажил хийхээс илүү сайхан мэдрэмжийг бий болгодог гэж бодож байна. Заавал улс төрийн бодлого шийдвэрийг харж суухаас илүүтэй, өөрсдөө хийж бүтээхийг зорьж ажилладаг. Энэ ажлыг “RE/MAX city”  оффисын захирал Э.Ууганбаяр санаачлан зохион байгуулж байгаа. 

Франчайз үйл ажиллагаа нь мөнгөний урсгалыг гадагш чиглүүлдэг гэж зарим хүмүүс ойлгодог. Ер нь ямар зарчмаар ажилладаг юм бэ? 

Франчайз гэдэг нь өөрийнхөө хөрөнгөөр гадны компанийн “ноу хау” - г худалдаж аваад, Монголдоо нутагшуулан, дотооддоо ажлын байр бий болгож, НӨАТ - аа төлж, ашгаа хүртэж ажилладаг. Зарим хүмүүс гадаадын компани Монголын зах зээлд орж ирээд, хамаг ашгаа гадагшаа гаргадаг гэсэн буруу ойлголттой байдаг. Франчайз компаниуд нь Монгол улсын хуулийн дагуу ажиллаж татвараа төлж бүхий л хөрөнгө оруулалт, борлуулалт нь Монголдоо үлддэг. Дэлхийн олон улстай өндөр харилцаа холбоотой ажилладаг учраас гадны хөрөнгө оруулалтыг ч мөн Монголдоо татах боломжтой байдаг.

Агентууд хоёр талдаа тэнцвэртэй, шударга ажиллаж чадаж байна уу? Үүнийг заасан ёс зүйн зүйн дүрэм гэж бий юу?

RE/MAX нь 1913 онд ёс зүйн кодыг бичиж гаргасан. Энэ нь харилцагчийн өмнө хүлээх үүрэг, олон нийтийн өмнө хүлээх үүрэг, агентуудынхаа өмнө хүлээх үүрэг гэсэн гурван хэсгээс бүрддэг бөгөөд үүний дагуу бүх харилцаанууд зохицуулагдаж явагддаг. Бид ч олон улсын энэхүү кодын дагуу ажиллаж байгаа. Гэхдээ улс орны онцлог, ёс заншил, соёлоос шалтгаалаад хөрсөнд нь буулгаж ашиглах шаардлагатай болдог. Суурьшмал соёлтой хүмүүсийн ёс зүйн кодыг манайх шиг нүүдэлчин соёлтой улсад шууд хөрвүүлэх нь тохиромжгүй. Гэхдээ үүнийг ойлгуулахын тулд “ёс зүйн хороо” 11 гишүүнтэйгээр ажиллаж байна. 

Манай Монголын салбар сүүлийн 3 жил дарааллаад Ази, номхон далайн шилдэг бүс болсон. Анхны суурь тоглогчид, агентуудын ур чадвар, сургалтууд, стратегийн зөв бодлого, үргэлж үйлчилгээний стандартаа сайжруулан ажилласаны үр дүнд ийм амжилттай байна. Ялангуяа шинэ агентууддаа зориулан сард 2-3 удаа сургалт зохион байгуулдаг нь хамгийн ихээр нөлөөлсөн. Яагаад гэвэл ийм сургалтыг бусад оронд заадаггүй.  Сургалтаа дуусахад тангараг өргүүлж, ёс зүйн кодыг нь жаазалж өгдөг уламжлалтай. 

Хэрвээ чанаргүй барилгын бодит байдлыг нуун дарагдуулж худалдаалсан тохиолдол гарлаа гэж бодоход хэрэглэгч гомдол гаргавал үүнийг ёс зүйн хороогоор шийдвэрлэж өгдөг үү? 

Ёс зүйн хороо нь зөвхөн дотоод харилцааг зохицуулдаг. Хэрэглэгчийн гомдлыг шийдвэрлэх нь явцдаа хөгжиж, тодорхой харилцаанд шилжинэ гэж бодож байна. Манай салбарыг хариуцсан Санхүүгийн зохицуулах хороо, үл хөдлөх хөрөнгийн бизнес эрхлэгчдийн “Гүүр” холбоо, бусад холбоодууд ийм санал гомдол дээр ажиллах болов уу. Мэдээж ямар учир шалтгаантай вэ гэдгийг тогтоохын тулд хуультай холбогдож таарна.

Иргэд зайлшгүй үл хөдлөх зуучлалтын компаниар дамжуулан худалдан авалт хийх хэрэгтэй юу? Хэрэглэгчдэд ямар ач холбогдолтой вэ? 

2000 оны эхээр ченж гэж яригдах болсон. Энэ нь тухайн салбартаа урт хугацааны бизнес хийх сонирхол багатай, хэрэглэгчээ хохироодог, богино хугацаанд ашиг олоод гарчихдаг хүмүүс байв. Энэ нь эргээд салбартаа маш хортой байсан. Харин бидний бизнесийн онцлог нь эсрэгээрээ урт хугацаанд салбартаа амжилттай ажиллаж, олон хүмүүсийг энэ салбарт хөгжүүлж ажиллах сонирхолтой. Зөвхөн RE/MAX-ын хувьд гэхэд хэрэглэгчийн эрх ашгийг өндөр төвшинд хамгаалж ажилладаг. Хэрвээ үнэхээр гомдол ирсэн бол тухайн агентын захирал, төв оффис, цаашлаад АНУ - ын төв оффис гэх мэт шат шатны шийдвэрлэх хүмүүсд хандаж болно. 

Манай бас нэг онцлог бол хамтын борлуулалт юм. Бид сардаа 1000 орчим үл хөдлөх хөрөнгө дээр ажилладаг бөгөөд үүний 80 орчим хувийг хамтарч борлуулдаг. Тодруулбал, нэг компанид нь хэрэглэгч, нөгөө компанид тухайн хэрэглэгчийн хүссэн бүтээгдэхүүн нь байдаг учраас зайлшгүй хамтрах шаардлагатай. Үүнийг маш өндөр төвшний, өндөр төлбөртэй программ хангамжийн тусламжтайгаар шийддэг. Энэ нь амжилттай борлуулалт хийхэд ч  ихээхэн нөлөөлдөг юм.  

Өмнөх байгууллагуудын хувьд хоорондоо хамтрах гэхээр бизнесийн загварын хувьд зөрчилдөөд, хууль зүйн зохицуулалтгүй учир хамтарч ажиллахад хүндрэлтэй байсан шүү дээ. 

Барилгын салбарт мөнгө угаалт явагдаж байгаатай холбоотойгоор энэ онд журамтай боллоо. Ер нь олон улсын жишигт үл хөдлөхийн салбар ямар зохицуулалттай байдаг вэ? 

Барилгын салбар нь нийт эдийн засгийн гуравны нэг орчим хувийг эзэлдэг. Улаанбаатар хотын нийт иргэдийн 60 орчим хувь нь гэр хороололд амьдарч байгаа учраас цаашид энэ зах зээл хөгжиж, өргөжнө. Миний бодлоор ковид -19 цар тахал гарч, Монгол Улс саарал жагсаалтад орсон нь үл хөдлөхийн салбарыг асар хурдтайгаар “Boost” хийлээ. Хуулийн тогтолцоотой болоход 10 жил шаардлагатай гэж тооцоолж байсан ч хөгжлийг 5 жилээр урагшлуулсан. Урьд нь хөрөнгө оруулалтаас болж олон барилгын ажлууд зогсож байсан бол одоо асуудалгүй боллоо. Энэ нь манай улсын эдийн засагт эерэг нөлөө үзүүлнэ. 

30 гаруй орноор RE/MAX  -ийн судалгаа хийж явахад ийм богино хугацаанд хуульчлагдсан орон байгаагүй. Филиппин, Тайланд, Сингапур гэх мэт олон хөгжингүй орнууд хууль зүйн орчингүй үйл ажиллагаа явуулж байгаа. Тиймээс бидний хувьд маш том хөгжлийн шат бий болсон.  

СЗХ - ны мэдээллэсэнээр тусгай зөвшөөрөл авсан 140 гаруй ҮХХ зуучлалын байгууллага байна. Хэрвээ шинээр компаниуд нэмэгдвэл зах зээл нь байна уу? 

Идэвхтэй үйл ажиллагаа явуулж байгаа 200 орчим компани нь нийт зах зээлийнхээ 20 хувийг нь эзэлж байгаа. Тиймээс маш том зах зээл байгаа гэсэн үг. Үлдсэн 80 орчим хувь нь иргэд хоорондоо худалдан авалт хийж байна. Энэ бол олон улсын жишгээр байж болохгүй тогтолцоо юм. 

Үл хөдлөх хөрөнгийг сонголтыг хүн амьдралдаа дундажаар 5-6 удаа хийдэг. Иргэн хохирвол, улс хохирно гэсэн үг бий. Ийм чухал сонголтыг нарийн мэргэжлийн хүнээр хийлгэхгүй бол хувь хүнд алдагдал, улс орны хувьд ч асуудал болно. Бэлэглэлийн гэрээ хийж татвараас зайлсхийх, хуурамч гэрээгээр худалдан авалт хийх,  хуурамч захиалгын гэрээ байгуулах гэх мэт иргэд мэддэггүйгээс болж маш ихээр хохирч байгаа нь далд байгаа болохоос амьдрал дээр маш олон тохиолддог кэйс шүү дээ. 

Хэрвээ энэ 80 хувь бүгд зуучлалтын компаниар дамждаг болвол чанаргүй барилгын асуудал нэг талдаа шийдэгдэж болох уу? 

Одоо RE/MAX - ын компаниуд чанаргүй үл хөдлөх хөрөнгө гэрээлж авахаа больсон. Үүнтэй холбоотойгоор “танай компани үйлчилгээ үзүүлсэнгүй гэж” зарим байгууллагаас гомдол ирэх нь бий. Бид шаардлага хангахгүй үл хөдлөхөөс татгалзасанаар худалдан авагчид ч хохиролтой сонголт хийхгүй гэсэн үг. 

Хүн байр худалдан авахдаа дундажаар 100 цаг зарцуулдаг.  Зарын дагуу хэд хэдэн газартай ярьж, ажлаа тараад очиж үзээд сонголтоо хийх шаардлагатай болдог. Тэгвэл мэргэжлийн хүмүүс жилийн 365 хоногийн турш үл хөдлөхийн сайн мууг судалж, мэргэшиж ажилладаг учраас хэрэглэгчийн хүслийг сонсоод, зөвлөх үйлчилгээг үзүүлэх болно. Хэрвээ энэ 80 хувь зуучлалын компанид ханддаг болж, зуучлалын компани нь тэнцвэртэй ажиллаж чадвал барилгын компаниуд зайлшгүй барилгынхаа чанарт онцгой ач холбогдол өгөх шаардлага тулгарна. Одоо зарим компаниуд барилгын ажил эхлэхээсээ өмнө бидэнтэй уулзаж байна. Энэ бол хөгжлийн зөв гарц. 

Олон улсад "Ковид - 19" - ын нөлөөгөөр үл хөдлөхийн салбарт ямар өөрчлөлт гарч байна вэ? Монголд нөлөө хэр мэдрэгдэв? 

Нийт массаар нь харвал хямралд харьцангуй бага өртөж байгаа мэт боловч бидний нүднээс далд ядуу айл өрх, нэн ядуу болж хувирч байна. Тэд 2 хоногт 1 талх иддэг байсан бол одоо 4 хоногт 1 талх идэх хэмжээнд хүрснийг хүн бүр мэдэхгүй. Бодит байдал дээр 60 000 хүн ажилгүй болсон байна. 

Харин үл хөдлөх хөрөнгө нь соёлт нийгмийн анхдагч гурван хэрэгцээ /хоол, хувцас, орон сууц/- ний нэг учир ямар ч уналтын үед хамгийн уналт багатай байдаг. Бид өнгөрсөн сар гэхэд 53,5 тэрбум буюу бүх цаг үеийн хамгийн өндөр борлуулалтаа хийлээ. Үл хөдлөхийн хэрэгцээ дуусдаггүй учир хоёр дахь зах зээл ч үргэлж бэлэн бий. 

Мэдээж бусад орнуудын хувьд борлуулалтын хувь тодорхой хэмжээгээр уналттай байгаа. Гэхдээ Итали, Арабын нэгдсэн Эмират гэх мэт 10 гаруй бүсийн салбарууд хүнд нөхцөлд байгаа ч бүх цаг үеийнхээ рекордыг эвдсэн. Ийм амжилттай ажилласан гол шалтгаан бол төв оффисынхоо зааврын дагуу маш богино хугацаанд дижитал шилжилтийг хийж, үйл ажиллагаагаа зогсоохгүйгээр явуулсан явдал юм. Манай хувьд ч шинэ агентын сургалтаа шууд онлайн болгож, Zoom - ээр 800 хүнтэй уулзалтыг зохион байгуулж ажилласан. 

Ер нь дэлхийд үүсээд  100 жил болсон брэндинг нь эдийн засгийн уналт, дайн гэх мэт олон хүнд нөхцөл байдлыг даван туулж, төдий чинээ туршлага, ямар ч нөхцөлд хямархааргүй дархлаа суусан байдаг. Жишээлбэл, хамгийн сүүлд 140 орны онлайн уулзалтын үеэр цар тахал бидний хувьд шинэ зүйл огт биш, үүнийг хэрхэн даван туулах вэ гэдэг арга зам ч тодорхой бий гэж хэлсэн. 7 хоног бүр заавар, боломж, гарцыг хурлаар ярьж байлаа. Брэндинг гэдэг үүгээрээ л хүчтэй.

Брэндинг гэдэг байгуууллагад их чухал. Ялангуяа лого нь сайн сайхан бүгдийг хүсэж, ерөөж бүтээсэн байдаг. Тиймээс танай логоны утга учраар ярилцлагаа төгсгөе гэж бодож байна. 

RE/MAX гэдэг нь /REAL ESTATE MAXIMUM/ гэдэг үгийн товчлол буюу үл хөдлөхийн хамгийн өндөр зэрэглэлийн үйлчилгээг үзүүлнэ гэсэн үг. Мөн хамгийн өндөр ашигтай хөрөнгө оруулалт гэсэн утгыг агуулдаг. гоны өнгөнүүд хамгийн хүчирхэг өнгөнүүдийг хослуулсан. Бөмбөлөг нь бүхнээс дээгүүр, бусдаас дээгүүр хамгийн өндөрт байхыг билэгддэг. RE/MAX - ыг үндэслэгч нь нисгэгч хүн байсан учраас үүлнээс дээгүүр гэсэн утгыг илэрхийлсэн ийм брэндинг бий болгосон байдаг. 

Монголынхоо үл хөдлөхийн салбар үнэтэй хувь нэмэр оруулж яваа танд баярлалаа. Та бүхнийг үргэлж бүхнээс дээгүүр дүүлэн нисч, амжилттай ажиллахыг хүсэн ерөөе!