Барилгын салбарын залуу бизнесмэн “Бэзү технологи” ХХК-ийн гүйцэтгэх захирал И.Зүч энэ удаагийн VIP ярилцлагын зочноор уригдлаа. Ганзгын наймаанаас эхлээд өнөөгийн компанийг бий болгосон түүний бизнесийн туршлага, салбарын талаарх санал бодлыг нь хуваалцлаа.

20 настай үеийн И.Зүч бизнесийн салбарт хэрхэн хөл тавьж байв? Тэр эхлэлийн цэгээс бидэнтэй хуваалцаач?

Барилга МН сэтгүүлийг уншиж буй нийт уншигчиддаа энэ өдрийн мэндийг хүргэе, мөн урьж оролцуулж буйд баярлалаа. Би 2004 онд КТМС-ийн програм хангамжийн ангийг төгссөн. Анхныхаа компанийг програм хангамжийн чиглэлээр байгуулсан боловч тухайн үед програм хангамжийн салбарт өдийлөн хөгжөөгүй, хүмүүсийн дунд ойлголт муу, үнэлгээ муу бас бид өөрсдөө бүрэн төгс боловсроогүй байсан учир компани маань жижиг вэбсайтуудыг л хийдэг байсан. Энэ үед манай үеийхэн ихэнх нь Америк, Япон руу мэргэжлээрээ ажиллахыгзорьж байлаа. Хэсэг хугацааны дараа байгалийн жамаараа дампуурав. Би ч бас бусдын адил гадаадруу явж сурч, ажилласан нь дээр юм гэж бодоод программ хангамжийн гэрээт ажилтнаар Япон улсруу явах шалгалт өгч тэнцээд хэлний бэлтгэлд сурч эхлэв. Япон хэлийг суралцах хугацаандаа Хятадруу наймаанд явж эхэлсэн бөгөөд БНХАУ-руу сурахаар шийдэж, олон улсын худалдааны чиглэлээр магистрын зэрэг хамгаалсан. Тэндээ нийт 7 жил сурч, амьдарч, ажилласан.

Хамгийн анх 10-н жилд байхдаа “Макс групп”-д ачаа зөөгчөөр ажиллаж байсан. Үүнээс хойш “Макс групп”-тэй байнгын холбоотой, Хятадад байх хугацаандаа төлөөлөгчөөр нь ажиллаж байлаа. Энэ хугацаанд барилгын салбартай ойртож, барилгын материал, бүтээн байгуулалтын талаар ойлголттой болж, одоогийн бизнесийн чиглэлээ ч эндээс олж авсан. Мөн энэ завшааныг ашиглан үргэлж дэмжиж байдаг “Макс групп”-ийн Д.Цэрэнжигмэд захиралдаа баярлаж явдгаа хэлмээр байна. Энэ хүнээс үлгэрлэн чиг баримжаа авч ажлаа, бизнесээ хийдэг.

2007 онд одоогийн “Универсум” ХХК-ийн захирал Т.Бээлбаатар найз маань Монголд барилгуудыг төвөөс үл хамаарах системтэй болгож, үзел гэдэг юмийг угсарч, суурьлуулах ажил нэмэгдэж байгааталаар тайлбарлан, түүнд орох тоног төхөөрөмжүүдийг худалдаалах, хамтарч ажиллах, хөрөнгө оруулалтын санал тавьсанаар одоогийн бизнесд 20000 юанийн хөрөнгө оруулалт хийж 4 насос, 2 ялтсан бойлууртайгаар эхэлсэн юм. Хятадаас бараагаа авчирч, Монголд борлуулж хүмүүсийн хэлж сурснаар бол “ганзгын наймаа” маягаар явагдаж байлаа. Улмаар өргөжин тэлж, 2011 онд хамтарсан компаниа байгуулсан. Гэхдээ 2017 оноос бид тус тусын бизнес эрхлэх болж, 2017 онд “Бэзү технологи” ХХК-аа байгуулаад, үйл ажиллагаа эрхэлж байна. 

ХОНИНЫ НЭХИЙНЭЭС ЦАВУУ ГАРГАХ БОЛОМЖТОЙ

Монголын барилгын зах зээлийг хэрхэн харж байна вэ? Сантехникийн материалыг дотооддоо үйлдвэрлэх боломжийг судалж байсан уу?

Барилгын гэлтгүй Монголын зах зээл жижигхэн. Тиймээс Монголын томоохон компаниуд барилга, уул уурхай, хүнс гэх мэтолон салбарт зэрэг ажилласны үр дүнд ашигтай, амжилттай байдаг юм болов уу гэж бодож байна. Олон жил Хятадад ажилласан учраас Монголын бизнесийн нөхцөлд дасан зохицох “хөрсөндөө буух”-д хэцүү байсан. Монголдоо буцаж ирээд ямар нэгэн үйлдвэр байгуулах юмсан гэж их бодсон боловч дотоодын зах зээл жижигхэн, хөрөнгө оруулалтаа нөхөх гэж нилээд хугацаа шаардлагатай болохоор энэ санаагаа орхисон. Хятадад хадаас үйлдвэрлэдэг хүн түүнийгээ сайн хийгээд байхад зах зээл нь том учраас өсөн дэвжиж, өргөжих боломжтой байдаг. Харин Монголд хязгаарлагдмал, үйлдвэрлэл явуулахад хангалттай зах зээл байхгүй, тэр жижиг зах зээлээ хамгаалсан бодлого ч байдаггүй. Арай хийж үйлдвэрээ нээгээд эхэлтэл, өөрхэн нэг нь Эрээнд хямдаар хийлгээд гаальтай машинд ачаад ороод ирнэ.

Сантехникийн материалыг дотоодод үйлдвэрлье гэсэн ч түүхий эд нь хангалтгүй. Тухайлбал, ялтсан бойлуурын хувьд үйлдвэрлэлийн гол түүхий эд нь нержин ялтас, мөн ган төмөр хавтан байдаг. Энэ хавтанг Монголд боловсруулдаггүй учраас гаднаас оруулж ирэх шаардлагатай болж байна. Түүхий эдээ гаднаас авчраад дотооддоо угсрах нь шууд импортоор оруулж ирснээс үнэтэй тусдаг. Ер нь үйлдвэрлэл явууъя гэвэл түүхий эд дээрээ түшиглэх нь зөв гэж бодож байна. Манай улс уул уурхайн баялаг ихтэй учраас үүнийг түшиглэсэн боловсруулах үйлдвэрүүд бий болгох боломжтой. Мөн мал аж ахуйн салбарт олон боломж бий.

 Жишээ нь танд ямар боломж харагдаж байна?

Жишээлбэл, Хятадад гахайн арьснаас желатин цавууг гаргаж авдаг шиг хонины нэхийнээс цавуу гаргах боломжтой. Монголд нэхий хямд үнэтэй, элбэг байдаг шүү дээ. Ер нь үндсэн түүхий эд нь байхад бусад тоног төхөөрөмж, нэмэлт бодисууд болон туслах материалуудыг оруулж ирж үйлдвэрлэл явуулах боломжтой гэж бодож байна. Гол нь үйлдвэрээ үндсэн түүхий эдээ дагаж байгуулсан нь дээр. Желатин цавууг хүнсний болон энгийн гэж ангилна. Хүнснийх нь үнэтэй, энгийн нь хямд борлогддог. Манай хонины нэхий ньямар нэгэн химийн урвалаар гарч ирээгүй байгалиараа учир хүнсний желатин цавуу хийхэд тохиромжтой. Манай оронд хүнсний желатин цавууны хэрэглээ байдаг ч хажууд асар том хэрэглэгч Хятад улс байна. Хятадад түүхий эдийн гарцаас хамаараад хүнсний желатин цавуу үйлдвэрлэх үйлдвэр цөөн байдаг. Монголдоо энэ төрлийн үйлдвэрийг барьвал ашигтай гэж би боддог юм. Гэвч манай оронд хүнсний желатин цавууг экспортлох хуулийн зохицуулалт болон гаалийн бодлого байхгүй. Нэг л өдөр Монгол эрдэмтэд, инженерүүд ийм үйлдвэрийг барьж, хуулийн болон бодлогын зохицуулалтууд хийгдэж, бид нэгэн шинэ бүтээгдэхүүнийг экспортлох боломжтой болно гэж боддог. 

 Хэдэн төрлийн, ямар тоног төхөөрөмжүүдийг барилгын салбарт нийлүүлж байна вэ?

Манай “Бэзү технологи” дулааны шугам сүлжээнд өргөн хэрэглэгддэг ялтасан дулаан солилцуур, халаалтын цахилгаан бойлуур, эргэлтийн насос, өргөлтийн насос, автомат хаалтууд гэх мэт үзелийн 100 орчим нэр төрлийн бүтээгдэхүүн, тоног төхөөрөмжүүдийг Монголын зах зээлд нийлүүлэн ажиллаж байна. 

Чанартай материалыг хямд үнээр нийлүүлэх зорилготойгоор 2007 оноос CNP брэндийн насосуудыг нийлүүлж эхлээд, 2017 оноос албан ёсны дистрэбютерийн эрхтэйгээр худалдаалж байгаа. Энэхүү брэнд нь Хятадад хамгийн том, олон улсын стандартыг хангасан үйлдвэр юм. CNP насосны стандартыг Хятадад үндэсний стандарт болгож тогтоодог. Мөн Хятад улсаас цорын ганц НАСА-д тоног төхөөрөмж нийлүүлдэг Хятад үйлдвэр гэдгээрээ онцлог. Уг насосыг НАСА -ийн  “пуужин хөөргөхөд ялгардаг асар их дулааныг усаар цохиж хөргөхөд ашигладаг”. Энэ нь CNP брэндийн насосууд ямар чанартай болохыг илтгэнэ гэж бодож байна. 

2019 онд Хятад улсын хамгийн том ялтсан дулаан солилцуурыг үйлдвэрлэгч SHINEHEAT брендийн дистребютер болсон. Ялтсан дулаан солилцуур гэдэг нь 0,5мм нимгэн ялтсаны нэг талаар нь халуун уснөгөө талаар нь хүйтэн ус гүйж дамжин өнгөрөх явцдаа тухайн ялтсаар дамжуулан халуун хүйтэн ус нь температураа хоорондоо солилцдог эд юм. 

Мөн манайд Германы SIEMENS брендийн температур тохируулах автомат хаалт, Туркийн BESTTANK брендийн тэлэлтийн савууд байдаг. Тэлэлтийн сав гэдэг нь ялтсан дулаан солилцуураар халаагдсан ус хэт халж тэлэхэд системийг хага дэлбэлэхгүйн тулд усны тэлэлтийг өөртөө шингээж, ус хөрөөд агшихад үед буцааж шингээсэн тэлэлтээ системдээ өгдөг сав юм. Харин температур тохируулах автомат хаалт гэдэг нь шугаманд хэдэн градусын ус өгөх вэ гэдгийг тохируулдаг. Жишээлбэл, гадна цаг агаарын температураас шалтгаалан паарны халаалтыг ихэсгэх, багасгах эсэхийг тохируулж, крантны халуун усыг 50 градусаас дээш гаргахгүй барих зэрэг тохиргоог хийнэ. 

ҮЗЕЛЬ ГЭДЭГ НЬ ДОТОР САН, ГАДНА САН ХОЁРЫГ ХОЛБОСОН ЦОГЦ ТӨХӨӨРӨМЖ ЮМ

Эдгээр тоног төхөөрөмжүүд нь узелийн гэдгээрээ онцлогтой юм байна. Энэ нь сантехнекийн материалаас юугаараа ялгаатай вэ? Мөн хэрэглэгч худалдан авалт хийхдээ юун дээр анхаарч сонголтоо хийх ёстой вэ? 

Сантехникийн хэрэгслийг дотор сан, узель, гадна сан гэж гурав ангилдаг. Дотор санд – бидний өдөр тутамд хардаг шугам хоолой, радиотар, турба зэрэг барилга дотор ашигладаг материалууд,  гадна санд - гаднаас тухайн барилгад ирж буй халуун, хүйтэн усны хоолой, дамжуулагч хэрэгслүүд, харин узель гэдэг нь доторсан гадна сан хоёрыг холбож байгаа цогц төхөөрөмж юм. 

Монгол улсад узелийн тоног төхөөрөмж зардаг нилээд олон компаниуд бий. Тиймээс хэрэглэгчид сонголтоо хийхдээ гол нь чанар, үнэ харж сонгох байх. Мөн борлуулалтын дараах үйлчилгээ буюу “serviceafter sales”, баталгаат хугацаа, үйлчилгээний чанар, харилцааны соёл гэх зэргийг харгалзан үзэж сонголтоо хийх хэрэгтэй байх. Манай байгууллага нь хэрэглэгчдэдээ илүү баталгаатай бүтээгдэхүүн нийлүүлэх үүднээс үйлдвэрлэгчийн баталгаан дээр нэмж даатгалтай бүтээгдэхүүн, “даатгалтай насос” гэдэг үйлчилгээг Монголын зах зээл дээр шинээр нэмж гаргаж ирсэн. Насос үйлдвэрлэгч нар бүтээгдэхүүндээ үйлдвэрийн баталгаа олгодог ч үүнд цахилгааны хэлбэлзлээс үүдэлтэй насосны хөдөлгүүр шатах гэмтэл хамаардаггүй. Үүнээс үүдээд цахилгааны хэлбэлзлээс хамаараад цахилгаан хөдөлгүүр шатахад нийлүүлэгч болон хэрэглэгч хоёрын хооронд маргаан их гардаг байсан. Тиймээс цахилгаан хөдөлгүүрийг даатгаснаар эрсдэлийг нь даатгалын байгууллага хариуцахаар болсон. Энэ даатгалын гэрээг бид Монголын хамгийн том даатгалын компани болох “Мандал даатгал”-тай хийснээрээ итгэл төгс бүтээгдэхүүнээ худалдаалж байна.

Амины орон сууцны узельд ашиглагдах тоног төхөөрөмжийн хувьд?  

Монголд ихэнх амины орон сууцууд төвийн дэд бүтцэд холбогдоогүй байна. Ийм газруудын цэвэр усны хангамжийг гүний худгаар, халаалтыг цахилгаан бойлуураар, халуун усыг нь эзэлхүүний цахилгаан бойлуураар шийдэж байгаа. Манай байгууллагийн хувьд Герман технологийн “Valet” брендийн цахилгаан бойлеруудыг Монголд худаалдаг ба хэрэглэгчид үнэлгээ маш сайтай байгаа. Цахилгаанаар халаана гэхээр ихэнх хэрэглэгчид тогны мөнгө хэд гарах уу? гэж асуудаг. Тог зарцуулалт нь таны байшингийн дулаан алдагдлаас шууд хамаарна. Дулаан алдагдал гэхээр ихэнх нь ханын зузаан яриад байдаг, хана чухал боловч байшин ихэнх дулаанаа цонх, хаалга, цонхны амалгаа, дээвэр хананы нийлсэн зааг, суурь шал гэх мэт газраар алддаг. Байшин барьж байгаа хүмүүс эдгээр газрууддаа онцгой анхаарч дулаалвал дулаан алдагдал бага байх болно. Энэ нь эргээд таны тогны мөнгө бага гарах үндэс болно.

      Хамтарч ажилласан,  хийж гүйцэтгэсэн ямар томоохон төслүүд байна вэ? 

Манай байгууллага нь гүйцэтгэгч болон төсөл хэрэгжүүлэгч байгууллагуудад бараа бүтээгдэхүүнээ нийлүүлдэг. Иймд хийж гүйцэтгэсэн гэхээсээ илүү манай тоноглолыг ашигласан төслүүдийг дурьдмаар байна. Бид жилдээ 300 гаран ялтсан дулаан солилцуур 600 орчин насос болон түүний дагалдах сэлбэг хэрэгслүүдийг  худалдаалдаг. Манай бүтээгдэхүүнийг ашиглаж байгаа томоохон төслүүд гэвэл Шинэ нисэх онгоцны буудал, Монгол Машин үйлдвэр, Увс аймгийн ус дулаан дамжуулан 1,3,4,5,7-р  төв, Дорнод аймгийн ус дулаан дамжуулах 4,11,55-р төв, “Шинэ Яармаг” орон сууцны хороолол төсөл, “Нутгийн Буян” төсөл, “Holiday inn” зочид буудал гэх мэт төслүүд болон Монгол улсын хэмжээнд 400 гаран аж ахуйн нэгж байгууллагуудад бараа бүтээгдэхүүнээ нийлүүлж байна.

Ихэнх барилгын материал импортоор орж ирдэг учраас худалдаа эрхлэгчид ч төдий чинээ байна. Үүнтэй зэрэгцээд чанаргүй материал асуудал гарсаар байна.

БНХАУ-д чанарын хувьд янз бүрийн материал үйлдвэрлэдэг. Чанартай материалууд нь өндөр үнээр борлуулагддаг учраас Европоос авсантай бараг адил үнэтэй. Гэхдээ Европынх чанартай, Хятадынх чанаргүй гэсэн буруу ойлголт бий. 100 айл дээр худалдаалагдаж байгаа материалууд чанараасаа хамаараад үнийн хувьд ч өөр өөр. Манайд нэг үеэ бодвол чанартай, үнэтэй материалууд их орж ирдэг болсон.

Чанартай чанаргүй материалаас гадна манай Монголд нэг том асуудал нь гаальтай машин. Гаальтай машинаар ороод ирсэн бараа нь ямар стандарт шаардлагатай, шаардлага хангах уу, үгүй юу хэн ч мэдэхгүй дотоодын зах зээлд нийлүүлэгддэг. Мөн Монгол улсад орж ирэхдээ ямар нэгэн НӨАТ болон гаалийн татвар төлөөгүй учир үнэ нь хямдхан. Энэ нь албан ёсны эрхтэйгээр, журмын дагуу татвараа төлөөд ажиллаж байгаа зарим компаниудад шударга бус юм. Гэхдээ гаальтай машинаар авчирсан гээд шууд хаах, өндөр хэмжээгээр торгох зэрэг нь “чи битгий амьдар” гэж байгаа мэт учир дутагдалтай учраас тодорхой зохицуулалт хэрэгтэй гэж бодож байна. Жишээлбэл, гааль дээр бүрдүүлэх материалийг нь багасгаж хялбаршуулах, татварын хэмжээг бага тогтоож улсдаа төлдөг болвол худалдаа эрхлэгчид ч татварын зөрчилгүй өөрсдөө тайван ажиллах нөхцөл нь бүрдэнэ, улсдаа ч ашигтай байх болно.

Ажилтнуудаа болон өөрийгөө хэрхэн цэнэглэдэг вэ?

Ихэнх барилгын компаниуд узелийн материалуудаа сүүлд буюу цас орохоос өмнө авдаг учраас манай компанийн хувьд намрын улиралд ажлын ачаалал ихээр нэмэгддэг. Бусад цаг үед харьцангуй бага ачаалалтай ажилладаг. Тиймээс тэр үед ажилтнуудаа сургалтад хамруулах, гэр бүлдээ цаг зав гаргаж анхаарал тавих, өөрсдийгөө хөгжүүлэх, цаашдын зүйлээ төлөвлөх боломжийг олгодог.

Манай ажилтнууд насаараа надад ажиллахгүй. Цаг нь ирэхээр хувиараа бизнес хийж, илүү хөдөлмөрлөж, илүү сурсан нь илүү сайн нөхцөлтэй, цалинтай ажилд орно. Магадгүй олон хүмүүсийг ажлын байраар хангасан ажил олгогчид болно. Тийм ч болоосой гэж хүсэж байна. Тиймээс өөрийгөө чадавхжуул, суралц, хөгж, хэрэгтэй зүйлээ сурч ав, өөрийгөө дайчил, чадвартай болго, бага залхуур гэж захидаг. Тухайн ажилтан ур чадвартай болж сайжирвал өөрт нь ч хэрэгтэй, компанидаа ч ашигтай ажиллана гэж боддог.

АЛДСАН АЛДАГДЛАА СУРГАЛТЫН ТӨЛБӨР БАЙСАН ГЭЭД Л БОДЧИХ...

Бизнесийн өрсөлдөөнд багагүй хугацааг өнгөрүүлж, төдий чинээ туршлагатай болсон байх. Тиймээс энэ хугацаанд суралцсан зүйлээсээ “шфи” болгож хэлвэл?

Миний аав Монгол улсын гавьяат багш Монголын Хүүхдийн Ордоны захирлыг албыг олон жил хашсан Борын Ишцог гэж хүн байдаг юм. Аав минь хэлэхдээ хамгийн түрүүнд шударга бай, өгөөмөр бай гэж зааж сургасан. Би энэ л зарчим замаар явж ирсэн. Тиймээс худал зүйл хэзээд илчлэгдэж, асуудал дагуулдаг учраас татвар тайлангаа үнэн зөв мэдүүлж тайван нөхцөлд бизнесийн үйл ажиллагаагаа хэвийн явуулах боломжоо битгий алдаарай гэж хэлмээр байна. Анх компани байгуулаад бизнес эхлэхэд Монголын татвар өндөр санагддаг. Татвар төлөх нь зүй ёсны хэрэг боловч жижиг эхэлж буй бизнест татвар төлөх нь хүндрэлтэй, дарамттай байдаг. 2020 оноос татварын хуулинд өөрчлөлт орсноор жижиг гарааны эхэлж буй бизнес эрхлэгчдэд таатай боломж олгож байна гэж ойлгодог. 

Хоёрдугаарт харилцагч нартаа үргэлж үнэнг хэлж байх. Захиалсан материал нь хэдэн хоногт үйлдвэрлэгдэх, Монголд хэд хоногийн дараа ирэх, чанарын хувьд ямар вэ гэдгийг шударгаар хэлснээр аль аль талдаа амар байдаг.  Тухайн хэрэглэгч таниас авах материал дээрээ уялдуулан дараа дараагийн ажлын төлөвлөгөөнүүдээ гаргадаг учраас бүх зүйл тодорхой байх хэрэгтэй. 

Гуравдугаарт хувиараа бизнес хийхээр гэр бүлдээ цаг гаргах нь багасч, гэр бүлийн амьдрал хамгийн их хаягддаг. Тиймээс хүүхдүүддээ, гэрийнхэндээ цаг гаргаж даалгавраа хийсэн үү гэхээс илүүтэй ярилцаж, тэдэнд юу тохиолдож байгааг нь сонсож, зөвлөлдөж, хамт тоглох нь чухал юм. Тиймээс гэр бүлдээ аль болох цаг гаргахыг хичээж байгаа. Ажилчдаа ч ийм боломжийг бүрдүүлэхийг хичээдэг. 

Бас нэг зүйл нь бүтэлгүйтээд алдсан бол хойноос нь бага харамс, үүнийгээ харин юм сурлаа гэж бодон дахин ийм алдаа гаргахгүй байх талаас нь өөрийгөө хөгжүүлэн ажилла. Алдсан алдагдлаа сургалтын төлбөр байсан гээд л бодчих.

Бизнесээ эхлүүлэхэд ямар асуудал тулгарч байв. Таны бизнесдээ баримталдаг зарчим тань юу вэ?

Хөрөнгө оруулалт, хүний нөөцийн асуудал их гардаг. Хөрөнгө оруулалт шаардлагатай үед зээл авах хэрэгтэй болно. Гэвч жилийн эцэст ихэнх ашгаа банкны хүүд төлдөг учраас хүндрэлтэй. Тиймээс бизнес эрхлэгчдээ дэмжсэн банкны бодлоготой болоосой гэж хүсдэг. Мөн анх бизнес эхлэхэд хүний нөөц, цалингийн зардал шийдэхэд хэцүү. Чадвартай ажилчид нь өндөр цалин хүсдэг, бага цалинтай ажиллуулахаар бүтээмж бага байдаг гэх мэт. 

Хамгийн анх програмын компани байгуулахдаа их мөрөөддөг байж. Компани байгуулаад захирал болохоор л мөнгөтэй болох юм шиг санадаг байлаа. Компанийн бүтэц зохион байгуулалт ямар байх, ажлын дэс дараалал, уялдаа холбоо, эргэлтийн хөрөнгө, тогтмол зардлуудаа яаж шийдэх, бичиг цаас гэх мэт тэр олон асуудлуудаа бодож, учрыг нь олохгүй шууд л захирал болсон. Тэгээд л удалгүй дампуурсан. Тэр нь нэг алдаа, нэг сургалт болсон юм. Гэхдээ энэ нь мөрөөдөхөө больсон гэсэн үг биш шүү.

Өнгөрсөн хугацаанд бизнес, наймаанд шатаж, мөнгөгүй хоосон болсон үе бий. Тэр үед том компанид, өндөр цалин аваад амьдрах боломж байсан ч хувийн бизнестэй болох санаагаа огт орхиогүй, ахин дахин оролдсон. Харин компани байгуулсаны дараа үргэлж өрсөлдөөн дунд ажил хэрэг явагддаг учраас зүгээр сууж огт болохгүй, байнгын судалгаа хийж, хөгжиж ажиллах шаардлагатай болдог. Үүнийг өөрийн зарчим болгож байнгын хөгжиж ажиллахыг зорьдог.

Ярицлагынхаа төгсгөлийн хариултыг танд үлдээе?

Миний хувьд үйлчлүүлэгч нартаа чанартай бүтээгдэхүүн нийлүүлэх, ямар нэгэн асуудал гарсан тохиолдолд түүнийг хурдан шуурхай шийдвэрлэх, сервис үйлчилгээг сайн үзүүлэхийг хичээдэг. Манай гол үйлчлүүлэгчид бол барилгийн салбарын хөрөнгө оруулагчид, барилгын эзэд, гүйцэтгэгч байгууллагууд, барилгийн салбарын инженерүүд учраас та бүхнийхээ итгэлийг нь алдахгүйгээр олон жил хамтран ажиллана гэж бодож байна. Намайг урьж ярилцсан “Барилга МН”- ийн хамт олон та бүгдэд баярлалаа, цаашдын ажилд нь өндөр амжилтыг хүсье. 

Нийт барилгын салбарын бүх хүмүүстээ хандаж хэлэхэд “хөдөлмөрийн аюулгүй байдлыг сахиж, осол авааргүй, урам зоригтой ажиллаж, сайн сайхныг хамтдаа бүтээцгээе” гэж уриалмаар байна.

Баярлалаа, та бүгдийн ажилд өндөр амжилтыг хүсье!