Шударга өрсөлдөөн хэрэглэгчийн төлөө газар “Монголын барилгын үндэсний ассоциаци”-тай хамтран ажиллахыг санал болгож эхний ээлжид Өрсөлдөөний тухай хуулийн шинэчилсэн найруулгын төсөлтэй холбоотойгоор барилгын салбарт үйл ажиллагаа явуулж буй иргэн, ААН байгууллагуудын төлөөллүүдээс хэлэлцүүлэгт тусгах санал авах уулзалт, хэлэлцүүлэгийг өнөөдөр \2020.10.30\ хамтран зохион байгууллаа.

Хэлэлцүүлэгт ШӨХТГазрын дарга Б.Бат-Эрдэнэ болон холбогдох удирдлагууд, МБҮА-ийн салбарын бодлого, хамтын ажиллагааны асуудал хариуцсан зөвлөх Г.Лосол болон холбогдох албан тушаалтнууд, барилгын салбарт үйл ажиллагаа явуулж буй аж ахуйн нэгж байгууллагуудын төлөөллүүд оролцсон юм. 

Хэлэлцүүлгийн үеэр Өрсөлдөөний тухай хуулийн шинэчилсэн найруулгын төслийн танилцуулга илтгэлийг ШӨХТГазрын ТЗУГ-ын Ахлах мэргэжилтэн Б.Наранцэцэг болон Хуульч Ү.Амарбат нар танилцууллаа. Мөн салбарын төлөөллүүд хуульд оруулах санал, хүсэлтэй хүргүүлсэн юм. 

ШӨХТГазрын ТЗУГ-ын Ахлах мэргэжилтэн Б.Наранцэцэг

Өрсөлдөөний тухай хууль нь 1993 онд УИХ-аар Шударга бус өрсөлдөөнийг хориглох тухай хууль нэртэй батлагдаж байсан. Тус хуульд 2 удаа нэмэлт өөрчлөлт хийж байсан бөгөөд энэ удаад шинэчилсэн найруулгын төвшинд өөрчлөхөөр ажиллаж байна. Шинэчлэгдэж буй хуулийн төсөл 5 бүлэг, 31 зүйлтэй. Тус хууль дан ганц барилгын салбар гэлтгүй бүх салбарын аж ахуйн нэгж байгууллагын өрсөлдөөнийг хамгаалдаг тул зорилго нь шударга бус өрсөлдөөнөөс урьдчилан сэргийлэх, өрсөлдөөнийг хамгаалах зорилготой юм. Одоогийн мөрдөгдөж байгаа хуулийн 50-с дээш хувьд нь өөрчлөлт орж байгаа учраас шинэчилсэн найруулга хэлбэрээр боловсруулагдаж байна. Холбогдох бүх зохицуулалтад өөрчлөлт орж байна. 

Монгол базальт ХХК-ийн үүсгэн байгуулагч Л.Ариунболд 

1-т Өрсөлдөөний хуулийн 12-р зүйлд бараа шошгын талаарх заалт байна. Гэхдээ тухайн бүтээгдэхүүний шошго хаяг байхаас гадна “хаана, хэзээ, юугаар хийгдсэн, ямар бүтээгдэхүүн бэ” гэдгийг заавал зааж өгөх шаардлагатай. Мөн тухайн бүтээгдэхүүний гарал үүслийн гэрчилгээ, тохирлын гэрчилгээ, стандартуудыг зааж өгвөл цаашид барилгын салбарт компаниуд чанар, стандартаараа өрсөлдөх болно. 

2-т Монгол улсын хувьд үндэсний үйлдвэрлэгч нар хөгжиж эхлэж энэ үед 5-10 жил үйлдвэрлэгч нарынхаа тодорхой бүтээгдэхүүнд нь хамгаалсан, дэмжсэн заалт байвал зүгээр. Үндэсний үйлдвэрлэгч нараас ажлын байр нэмэгдэж, шинжлэх ухааны салбар хөгжинө. Үндэсний үйлдвэрлэгч гэхээр зөвхөн худалдаа хийхгүй учир энэ салбараа хөгжүүлэхийн тулд заалтандаа нэмээсэй гэж хүсэж байна.