“МонголынБарилгын Гүйцэтгэгч Байгууллагуудын Холбоо” нь барилгын гүйцэтгэлийн ажилэрхэлдэг аж ахуйн нэгжүүдийн үйл ажиллагаанд нь мэргэжлийн туслалцаа үзүүлэх, чадавхжуулах, удирдлагыг нь бэхжүүлэхэд туслах чиглэлд үйл ажиллагаагаа явуулдаг. 

Тус холбооны Ерөнхийлөгч Б.Жүгдэртэй барилгын үйлдвэрлэлийн технологи  өндөр хурдацтай хөгжиж буй өнөө үед гүйцэтгэгч байгууллагуудын мэргэжлийн ур чадвар, үүрэг хариуцлагыг дээшлүүлэх асуудал чухал байгаа талаар ярилцлаа.

Монголын барилгын салбарт тэр дундаа барилгын үйлдвэрлэлд чанарын асуудал хурцаар яригдаж байна. Энэ талаар яриагаа эхлүүлье.

Барилгын аюулгүй байдал, чанарыг сайжруулах нь иргэн хүний эрүүл аюулгүй орчинд амьдрах үндсэн эрхийг хангахад чиглэгдэх учиртай. Барилгын чанар нь хэрэглэж буй барилгын материал, техникийн шаардлага хангасан зураг төсөл, түүнийг үндэслэн тогтоосон өртөг болон барилгын ажлын гүйцэтгэгч, хяналт хэрэгжүүлэгч нарын чадавх, хариуцлагатай үйл ажиллагаанаас голчлон хамаардаг. Барилгын ажлыг батлагдсан зураг төсөл, норм стандарт технологийн шаардлагын дагуу гэрээний үндсэн дээр хийх нь гүйцэтгэгчийн үүрэг юм. Хяналт сайн байвал ажлын чанар сайн байх нь ойлгомжтой.Төрийн захиалагчийн, зураг төсөл зохиогчийн, гүйцэтгэгчийн удирдлагуудын гэх мэт хяналтууд нь ихэвчлэн тухайн үе шатны ажил нь хийгдээд дууссаны дараа явагдаж, яг ажлыг гүйцэтгэж байх үед нь хийх дотоод хяналт сул байгаа юм. Ур чадвартай мэргэжилтэй ажилтны хүрэлцээ хангалтгүй, ажлыг хариуцан хийлгэж буй инженер техникийн ажилтны ажлын ачаалал ихээс технологийн дагуу ажил хийгдэж буй эсэхийг бүрэн хянах бололцоо муу байдаг нь ихэнх барилгын гүйцэтгэгч байгууллагуудын өмнө тулгарч буй асуудал юм. Барилгын ажлын чанарыг сайжруулах нь тухайн ажлын гүйцэтгэл явагдаж байх үед нь технологийн шаардлагыг хангаж буй эсэхийг нь дотоодын хяналтаар үнэлэн тооцож байхаас эхэлнэ гэж хэлэх байна.

Барилгын үйлдвэрлэл дээр ажиллах хүн хүчний зохион байгуулалтад хийх ажлын олдоц, хүрэлцээ шаардлагаас хамааран томоохон өөрчлөлт орж бригад хэсэг, жижиг ААН болон төрөлжсөн нь сайн болон муу талыг дагуулах уу? Энэ талаарх таны бодол?

Барилгын үйлдвэрлэлд ажиллаж буй хүний тоонд харьцуулбал нэг ААН-д 10 хүн ч ноогдохгүй олон компани нэгжүүд байна. Улирлын нөлөөлөл, ажлын олдоц, цалин хөлсний тааруу үнэлгээнээс үүдэн бараг 20-иод жилийн өмнөөс барилгын үе шатны ажлын төрлөөр ажил гүйцэтгэдэг төрөлжсөн ААН, бригад-хэсэг бий болсон. Үүнийг буруутгах аргагүй. Төрөлжсөн хэлбэрээр ажиллах нь тухайн ажлыг хийхэд мэргэшсэн байх тул бүтээл өндөр, чанартай хийх бололцоо бүрдүүлнэ. Түүнчлэн шилжилт хөдөлгөөн хурдан хийх боломжтой. Энэ нь сайн тал гэж харж болно. Нөгөө талаас нь харвал төрөлжсөн жижиг бригад хэсэг, ААН нь ерөнхий гүйцэтгэгчтэй тохирсон үе шатны төрөлжсөн ажлаа л хийгээд шилжилт хийх тул гүйцэтгэх үеийн явцын хяналтыг сайн хийж, ажлыг нь хүлээн авах хэрэгтэй болдог. Туслан гүйцэтгэгчид ажлын чанарт доголдол гаргах, график хугацаа хэтрүүлэх, ерөнхий гүйцэтгэгчид дотоод хяналтыг хангалтгүй хийх, хэлцлийн дагуу санхүүжилтээ туслан гүйцэтгэгч нарт олгохгүй байх дутагдлууд их байна.

Энэ байдлыг яаж засах вэ? Танай холбоо энэ талаар юу хийж байна вэ?

Барилгын салбарын үйлдвэрлэх хүч нь бүгдээрээ хувьчлагдсан. Ажиллах хүч төрөлжин нөхцөл байдалдаа тохирон ажиллаж байгаа нь сайн хэрэг юм. Бид ажиллах хүчээ л мэргэжилтэй чадвартай болгоход гол анхаарлаа чиглүүлмээр байна. Манай холбооны хувьд ажлынүе шатаар төрөлжсөн бригад хэсэг, ААН-ийн талбайн ажлын удирдагч, ерөнхий гүйцэтгэгчийн технологийн хяналтын ажилтан нарыг богино хугацааны сургалтаар бэлтгэх,барилгын үе шатны ажлын чанарын хяналт, технологийн баримт бичиг болон барилгын талбайн дүрэм, бД боловсруулах ажлуудын эхлэлийг тавиад байна. Ажлыг гүйцэтгэж буй явцад нь технологийн шаардлагын дагуух хяналтыг тогтооход дээрх сургалт норматив, баримт бичгүүд зайлшгүй хэрэгтэй болно. Норм, дүрмээс гадна энэ сургалтын хүрээнд технологийн дагуу, ажлыг үе шатуудын дагуу хийж буйг харуулсан видео контент мөн одоо хийгдэж байна. Тэгэхээр сургалт маан өөрийн гэсэн норм, дүрэмтэй, контенттэй гэсэн үг.

Ажлын удирдагч бэлтгэх сургалтын талаар тодруулж асуумаар байна?

Ажлыг гардан гүйцэтгэх бригад хэсэг, ААН-ийн удирдлага, ерөнхий гүйцэтгэгчийн ажлын технологийн хяналт хариуцах ажилтан нарыг бэлдэнэ. Талбай дээр ажиллаж байгаа барилгын инженер техникч, өндөр мэргэжилтэй ур чадвар бүхий ажилчин, бригад-хэсэг ААН-ийн эзэн, удирдлага хамрагдах боломжтой. 

Сургалтын хөтөлбөрнь: 

а.Барилгын газар суурийн ажил, 

б.Барилгын бетон,төмөр бетоны ажил, 

в.Барилгын хэв хашмал хуурай хийцийн ажил, 

г.  Барилгын өрөгт болон угсармал бүтээцийн ажил,

д. Барилгын заслын ажил гэсэн үндсэн 5 бүлэгт хуваагдах ба нэгээс гурван бүлэг сургалтад хослон суралцах боломжтой. Сургалтнь 50-60 цагийн хичээл, дадлага байх ба 7-14 хоногт үргэлжилнэ. Сургалтын хөтөлбөрт мэргэжлийн хичээлээс гадна ХАБЭА-н удирдлага, барилгын бүтээцийн хамгаалалт, байгаль орчныг хамгаалах, эрчим хүчний хэмнэлтийн асуудал болон салбарын хууль эрх зүй, үйлдвэрлэлийн удирдлага зохион байгуулалт, хүнтэй ажиллах арга ажиллагааны талаар яригдана. Энэхүү сургалтыг барилгын талбай дээр олон жил үр бүтээлтэй ажиллаж буй зөвлөх, мэргэшсэн зэрэгтэй инженерүүд заан явуулах болно.

Гарын авлага 

Сургалтад хамрагдсанаар ямар давуу тал бий болох вэ? 

Энэ сургалт нь мэргэшсэн бригад-хэсэг, туслан гүйцэтгэгч аж ахуйн нэгжийг удирдан ажиллаж буй ахлагч, захирал нарыг технологийн зохих мэдлэгтэй, ажлын чанарыг явцын дунд хянаж чаддаг, ажилчдаа зөв зохион байгуулан ажиллуулдаг, өөрөө үлгэрлэн ажиллах чадвар бүхий ажилтан бэлдэх зорилготой. Харин сургалтад хамрагдсанаар ажлын удирдагч нар нь өөрийн бригад, ААН-ийн хийж буй ажлын чанарыг сайжруулахад хариуцлага хүлээх, ажлаа зөв үнэлүүлж санхүүжилтээ бүрэн авах, ажил авах эхлэлийг тавих мөн ерөнхий гүйцэтгэгчийн технологийн хяналтын ажилтантай хамтран дотоодын хяналтыг гүйцэтгэлийн явцад байнга хийж, ажилчдын мэргэжил ур чадварыг дээшлүүлэх, үнэлэх бололцоо бүрдэнэ гэж харж байна.