Барилга МН-ийн зүгээс Барилгын салбар дахь шударга өрсөлдөөн, хэрэглэгчийн эрх ашиг хөндөгдөж байгаа болон чанаргүй материалын талаар Шударга өрсөлдөөн хэрэглэгчийн төлөө газрын удирдлагуудтай хамтарсан уулзалтыг өнөөдөр зохион байгууллаа. 

Уулзалтад ШӨХГазрын удирдлагууд, Барилга МН захирал Г.Батсүх, гүйцэтгэх захирал Д.Цолмонгэрэл болон барилгын материал үйлдвэрлэгч, ханган нийлүүлэгч Метро пласт ХХК, Ногоон титэм ХХК, Росторг ХХК зэрэг 10 гаруй байгууллагуудын төлөөллүүд хүрэлцэн ирж барилгын материалын салбарт тулгамдаж байгаа асуудлын талаар ярилцсан билээ. 

Уулзалтын үеэр Барилга МН захирал Г.Батсүх Барилгын материал чанарын асуудлаар илтгэл тавьсан юм.

Илтгэлд “Импортоор орж ирж байгаа чанаргүй материал, түүний чанар, татвар, гаальтай тээврийг сонгох шалтгаан юу байв, хулхи материал худалдан авдаг нь манайх өөрсдөө юм, хэрэглэгчдийн худалдан авах чадвар, барилгын материал хүний эрүүл мэндэд шууд нөлөөлөхгүй эрсдэл багатай гэж үздэг, мэргэжлийн хяналтын шалгалт, эрсдэлтэй материалын төрөл, зөрчил илэрдэг материал, хортой бодис ялгаруулдаг материалын талаар, 100 айл дээр худалдаалагдаж байгаа материал”  зэрэг асуудлуудыг хөндөн ярьсан бөгөөд дараах саналыг гаргасан юм.

Үүнд:

-Барилгын материалын худалдааны эрх зүйн зохицуулалттай болгон хэрэгжүүлэх

-Барилгын материалын импортлогч, худалдаачдын бүртгэлжүүлэх

-Импортоор оруулж ирэх гол нэрийн барилгын материалыг бүртгэн урьдчилан дүгнэлт гаргах эсвэл шинжлэх баталгаажуулж улсын хилээр оруулах зөвшөөрөл олгох

-Гаалийн жишиг үнэ тарифыг өндөр тогтоохгүй байх

-Барилгын материалын импорт тоо судалгаа прогнозтой болох 

Уулзалтад ирсэн компаниудын төлөөлөл нар “Чанаргүй материал их орж ирдэг, энэ нь эргээд хүний эрүүл мэндэд хэрхэн хор нөлөө үзүүлдэг, дотооддоо үйлдвэрлэдэг материалаас илүү Хятадаас орж ирж байгаа хямд өртөгтэй чанаргүй материалыг сонгодог нь цаашлаад ганц хүний биш нийт хотхоны иргэдийг хордуулж байна” гэдгийг онцолсон юм. 

ШӨХТГазраас "Компаниудын төлөөллүүдтэй тулгамдаж байгаа асуудлынх нь хүрээнд эргэн холбогдож уулзалт хийх мөн Барилга, Хот байгуулалтын яаманд уулзалтад яригдсан материалын чанар болоод барилгын материал ханган нийлүүлэгч, импортлогч компаниудад тулгамдаад байгаа асуудлыг хүргүүлэн шийдвэрлэх тал дээр хамтарч ажиллана" гэдгээ хэллээ.