Ухамсарт хүн буй болсон цагаас өдийг хүртэл бүх л барьж босгосон барилга  байгууламжийг эхлээд хүмүүн уураг тархиндаа урлаж, дүрсэлдэг бөгөөд үүний дараа энэхүү санаагаа зураг төслөөр зурж харуулдаг. Уураг тархиныхаа хүчээр барилгыг “урлаж“, мэдлэг, дадал, оюун ухаанаа зориулж байгаа архитекторуудын онцлох бүтээлүүдийг энэхүү булангаараа дамжуулан та бүхэнд хүргэж байна. 

Энэ удаагийн дугаарт архитектор Д.Дөлгөөний биежсэн бүтээлүүдээс дээжлэн хүргэж байна.

Д.Дөлгөөн нь 1997 онд 86 дугаар дунд сургуулийг төгссөн. Тухайн үед бөхийн спортоор хичээллэдэг, клубын системтэй цалин авдаг ховорхон тамирчин хүүхдүүдийн нэг байсан гэдэг. Бага байхаасаа зураг зурах авъяастай байсан түүнд түүний нагац ах, “Гудамж төсөл” -өөрөө бидний танил Б.Батболд гуай архитектор болохыг зөвлөсний дагуу ШУТИС-ийн Барилга архитектурын сургуульд элсэн оржээ. Энэ тухайгаа тэрээр “Тухайн үед их амархан шалгалттай санагдаж байлаа. Харин мэргэжлээрээ суралцах тусам цаанаасаа л архитектор болох хувь тавилантай байсан юм шиг мэргэжилдээ дурлаж эхэлсэн. Одоо миний амьдралын нэг хэсэг, “хобби” болсон гэж хэлж болох юм” хэмээн ярьсан юм.

Оюутан байхаасаа засварын ажлууд хийдэг байсан нь орон зай тал руугаа хөгжхөд ихээхэн нөлөө үзүүлсэн байна. Ингээд эд барилгын салбар хөгжиж, ажиллах хүчний эрэлт ихэссэн үед буюу 2000 онд “Монголын Дизайн” төвд техникчээр ажлын гараагаа эхэлжээ.

Тэрээр салбартаа 20 гаруй жил ажиллахдаа 180 гаруй зураг төсөл гаргасан бөгөөд Улаанбаатар Сонгдо эмнэлэг, Үндэсний архивын газар, MUDI residence, Ирээдүй хороолол, Highland Park, Аsa land ресорт, Ревэр гарден - 2 төслийн эскиз гэх мэт Улаанбаатар хотын өнгө үзэмжийг тодорхойлсон 100 орчим төсөл нь биежжээ. Харин эдгээр бүтээлүүдийнхээ 70 орчим хувийг 2004-2010 онд гүйцэтгэж байсан бол сүүлийн 10 жил хувиараа ажиллаж, илүү өөрийн санааг тусгасан бүтээлүүдээ ажил хэрэг болгож эхэлжээ.

Тэрээр концепцоо гаргахдаа нэгдүгээрт энгийн цэвэрхэн буюу минималист хэв маягтай, хоёрдугаарт барилгыг гүйцэтгэх технологи, гуравдугаарт дизайнд анхаарч ажилладаг бөгөөд сүүлийн жилүүдэд ногоон архитектурын элементүүдийг аль болох өөрийн бүтээлдээ шингээж байгаагаараа онцлог юм.

Д.Дөлгөөн нь барилгын зураг төсөл гаргахаас гадна хот төлөвлөлтийн ажилд ч өөрийн хувь нэмрээ оруулсан нэгэн. Тухайлбал, “Гудамж төсөл”, Сэлбээс  их тойруу хүртэлх 490 га газар бүхий хотын төвийн ерөнхий төлөвлөгөөний ажлыг гүйцэтгэж байсан. Хотын үндсэн төлөвлөлт болох зам, шугам сүлжээ, ногоон байгууламжаа хэрхэн шийдэх талаар саналаа тусгаж өгсөн байна.

Ингээд “Монгол уран бүтээлч” булангаараа түүний Монголын хамгийн анхны 9 м урт консол болох “Highland Park”-ыг танилцуулж байна.

2018онд ашиглалтад орсон ресторан, лоунж, клуб хаусны зориулалттай уг барилга нь690м2 талбайд баригджээ. “Highland Park Mongolia” барилгыг байгалийн үзэсгэлэн, холын харууц зэргийг хослуулан төлөвлөсөн бөгөөд барилга нь хэвгий өндөрлөг газар байрладаг учир орчин газартаа зохицсон хэлбэр дизайн бүхий, байгалийн гэрэл түлхүү ашиглах, хотын төвийн харууцыг өргөн харуулах цонхыг төлөвлөж өгсөн. 

Минималист хэв маягаар төлөвлөгдсөн уг барилга нь нарны гэрлийг тусгах дээврийн цонх, шөнийн тэнгэр харах шилэн дээвэр, задгай усан сан, задгай ванн, усан хүрхрээ бүхий усан толь, ил гал түлж тойрч суух буйдан гэх мэт онцгой шийдлүүдтэй. АрхитекторД.Дөлгөөн энэхүү бүтээлийнхээ талаар “Барилга дотор ороод баригдсан газрын онцлог төрх давуу талыг нууцлаг гэнэтийн байдлаар хүмүүст харуулахыг зорьсон. Мөн тухайн объект байгууламжид очсон сэтгэгдэл хэзээ ч мартагдахааргүй романтик мэдрэмжийг төрүүлэх, үзэж буй хүнд гүнзгий сэтгэгдэл төрүүлэхийг зорьж төлөвлөлтөө хийсэн” хэмээн ярьсан юм. 

Түүнтэй цөөн үгээр …

Архитектурын концептдоо баримталдаг гол зарчим 

Архитектурын концепц нь нэгдүгээрт энгийн цэвэрхэн минималист хэв маягтай, хоёрдугаарт барилгыг гүйцэтгэх технологи, гуравдугаарт дизайнд анхаарч ажилладаг. Сүүлийн үед барилгууд адилхан дөрвөлжин болоод байгаа нь Монголын архитекторууд техник тал дээрээ өндөр ач холбогдол өгч ажиллаж байгаа учраас гоо зүй  нь төдийлөн харагдахгүй байна гэж боддог. Энэ нь архтекторуудын сэтгэлгээ болон захиалагчийн өртгийн хэмнэлтээс болж үүсэж байгаа.

Архитектор хүнд төрдөг хамгийн сайхан мэдрэмж 

Дэлхий дээр юу ч байхгүй зүйлийг ухаан санаандаа ургуулан бодож, түүнийгээ цаасан дуур буулгаж,тэр нь биежиж, түүн дээр дотор хүн амьдарч байна гэдэг хамгийн сайхан мэдрэмж байдаг. Төсөөлөх чадвар илүү өндөр, тархин дотроо боловсруулах чадвартай байдгаараа онцлог юм. Бодсон бүхэн тэр чигээрээ биежих л хамгийн сайхан.

Зураг төслийг тань дураараа өөрчилсөн тохиолдол байдаг уу? 

Монголд оюуны өмчийг дээдэлдэггүй. Үнэлгээ маш багатай байдаг нь эмзэглүүлдэг. Яг үнэндээ Австрали, Герман ч юм уу ямар ч гадны оронд A4 хэмжээтэй цаасан дээр хар зураг гаргаж өгөхөд авдаг мөнгөөр архитекторын ур чадварыг үнэлдэг.  

Сонгдо эмнэлэг, архивын барилгын зураг төслийг гаргаж байсан ч хажуугаар нь өнгөрөхдөө барилгаа танидаггүй юм. Хөрөнгө оруулалтаас шалтгаалан гадна фасад, дотор заслын материалууд өөрчлөгдөж, талбайн инженер нь өөрийн дураараа барилгаа эргүүлээд барьчихсан. Хажуугаар нь гарах болгондоо “өмөлзмөөр” санагддаг юм. /инээв/ Энэ мэт архитекторыг үнэлдэггүй олон шалтгаанаас болж улсын томоохон төсөл хариуцахаа больж,  хувиараа ажиллаж эхэлсэн. 

Таны архитектурын онцлог, өөрийгөө олсон гэж боддог уу? 

Дэлхийн олон сая архитекторууд өөрсдийгөө хайж байгаа. Өөрсдийгөө олж чадсан нь нэр алдарт хүрч, хэн ч түүнийг бүтээлийг харсан таньдаг болдог. 

Би Японы алдарт архитектор Андо Тадаотой уулзаж, төслүүдтэй танилцах боломж олдож байсан юм. Японы Хайку гэдэг шүлэг нь хамгийн цөөхөн үгээр том агуулгыг илэрхийлдэг шиг хамгийн энгийн цөөхөн элементээр орон зайг илэрхийлэхийг өөрийн философи болгож, түүгээрээ хүмүүсд танигдсан байсан. Тэр хүн надад хэлэхдээ архитектор хүн өөрийгөө л олох хэрэгтэй. Чамайг гаднаас чинь хараад бусдаас ялгаж таньд агшиг чиний бүтээл бас тийм байх ёстой гэж хэлж байсан. Тиймээс би өөрийгөө хайж л явна даа.

Монгол архитектурын онцгой шинж чанар таны нүдээр 

Дэлхийн уртраг, өргөрөг дээр оршиж, өөрийн орны уур амьсгалаас шалтгалаад архитектур өөрсдийн онцлогтой байх ёстой. Монголчууд түүхэндээ дэлхийн талыг эзэлсэн гэдэг нь олон баримтаар батлагдсан байдаг. Тиймээс тэр өргөн тархацтай цаг үедээ олон уран барилгуудыг тухайн үеийн хаадууд бариулсан тухай батлаалагдаагүй яриа байдаг. Монголчуудын эзэлсэн газруудад бөмбөгөр оройтой барилгууд ихээр баригдсан. Жишээ нь Энэтхэгийн Таж Махал. Гэвч Монголынх гээд адилхан барьчихвал тухайн орныг дуурайсан болно. Тиймээс шинэ зүйлийг гаргаж ирэх хэрэгтэй гэж бодож байна.