“Дэлхийн архитектурын өдөр”-ийг “Toward а better urban future” буюу “Хотын ирээдүйн сайн сайхны төлөө” сэдвийн хүрээнд дэлхий нийтээр нэгэн зэрэг тэмдэглэхээр шийдвэрлэсэн бөгөөд тэрхүү өдөр нь өнөөдөр тохиож байгаа билээ. 

Монголын Хот Байгуулалтын Хөгжлийн Танхим (МХБХТ) нь Дэлхийн архитектурын энэ өдрийг тохиолдуулан Монголын шилдэг архитектор, уран бүтээлчдийн “Монголын Архитектур Өнөө цагт 2020” үзэсгэлэнг Их Монгол Улсын нийслэл Хархорум хот байгуулагдсаны 800 жилийн ойн хүрээнд 10 дугаар сарын 05-07-ны өдрүүдэд “Norphei Art Gallery” үзэсгэлэнгийн танхимд зохион байгуулагдаж байна. 

Үзэсгэлэнгийн нээлтэд Соёлын дэд сайд М.Батбаяр, Дэлхийн Монголчууд гарал үүсэлтэнгүүдийн төвийн тэргүүн доктор , Онц бөгөөд бүрэн эрхт Элчин О.Нямдаваа, Уран зургийн галлерейн дарга Б.Сарантуяа, Улаанбаатар их сургуулийн архелогийн тэнхимийн эрхлэгч, доктор Д.Эрдэнэбаатар,  Гавъяат багш, доктор Ж.Баясах, Соёлын яамны Урлаг, уран бүтээлийн газрын дарга Б.Сэргэлэн, “Монголын Хот Байгуулалтын Хөгжлийн Танхим” НҮТББ-ын ерөнхийлөгч Д.Мижидсүрэн, гүйцэтгэх захирал Б.Өлзийбаяр нар оролцлоо. 

Үзэсгэлэнд “Монголын Эзэнт гүрний нийслэл Хархорум олон улсын аялал жуулчлалын цогцолбор” төслийн санал санаачлагыг анх удаа олон нийтэд танилцуулж байгаагаараа онцлогтой.

Энэхүү үзэсгэлэн нь Монголын архитектурын түүхэн хөгжилд хувь нэмэр оруулж буй Архитекторуудын бүтээлч сэтгэлгээ, шинэ санаа, уран бүтээл, барилга байгууламжийн төлөвлөлт, дизайн, архитектурын шилдэг бүтээлүүдийг төр засаг, мэргэжлийн байгууллагууд бизнесийн төлөөлөл, олон нийтэд сурталчлан таниулах, нийгмийн бүтээн байгуулалт хөгжил дэвшилд уриалан дуудах зорилготой.

“МОНГОЛЫН АРХИТЕКТУР ӨНӨӨ ЦАГТ -2020” үзэсгэлэнд: 

-Түүх, соёл урлаг, архитектурын бүтээл 

-Орчин үеийн Архитектурын бүтээл

-Шинэ санаа, шилдэг бүтээлүүдийг дэлгэн харуулж байна. 

Үзэсгэлэнгийн өдрүүдэд тусгай хөтөлбөрийн дагуу зочин илтгэгчийн лекц, чөлөөт ярилцлага, уулзалт арга хэмжээ болох тул нийт салбарын мэргэжлийн байгууллагууд, нийгмийн бүтээн байгуулагчид, архитектор, уран бүтээлчид барилгын салбарын бизнес эрхлэгчид оролцож санал бодлоо солилцох, санал дэвшүүлэн оролцох боломжтой юм.