Олон Улсын Архитекторуудын холбоо 1985 оноос эхлэн жил бүрийн 10 сарын эхний Даваа гарагийг “Дэлхийн архитектурын өдөр” болгон зарлаж, жил бүр тодорхой сэдвийн дор тэмдэглэн өнгөрүүлдэг бөгөөд манай улсад “Дэлхийн архитектурын өдөр”-ийг “Монголын архитекторуудын эвлэл” тухайн сэдвийн хүрээнд тэмдэглэн өнгөрүүлдэг билээ. 

Энэ жилийн “Дэлхийн архитектурын өдөр”-ийг 10 дугаар сарын 5-ны өдөр “Toward а better urban future” буюу “Хотын ирээдүйн сайн сайхны төлөө” сэдвийн хүрээнд дэлхий нийтээр нэгэн зэрэг тэмдэглэхээр шийдвэрлэсэн байна.

Монголын архитекторуудын эвлэл нь “Дэлхийн архитектурын өдөр”- ийг зарлагдсан сэдвээр архитекторууд, мэргэжлийн байгууллагууд болон төрийн захиргааны байгууллагуудтай хамтран тэмдэглэдэг уламжлал болгосон.

Энэ өдрийг тэмдэглэх албан ёсны байгууллага нь “Олон Улсын Архитекторуудын Эвлэл”-ийн гишүүн “Монголын Архитекторуудын Эвлэл” бөгөөд ажлын үр дүнг ОУАЭ-д тайлагнадаг байна.

"Дэлхийн архитектурын өдөр-2020"-ийг Барилга, хот байгуулалтын яам, Хот байгуулалт, хөгжлийн газар, Хот төлөвлөлт, судалгааны институт хамтран зохион байгуулж байна.

Энэ өдөр Монголын архитектур, хот байгуулалтын ололт амжилтыг, алдаа оноог хэлэлцэн, ОУ-ын сайн туршлагаас  хуваалцах, үр дүнд нь Монголын архитектур, хот байгуулалтыг хөгжүүлж, иргэн бүрийн амьдралын чанарыг дээшлүүлэх зорилготой. 

Та бүхнийг МАЭ-ийн ордонд 2020.10.05-ны өдрийн 11.00 цагт зохион байгуулагдах "Дэлхийн архитектурын өдөр-2020"-ийг тэмдэглэн өнгөрүүлэх ажиллагаанд өргөнөөр оролцохыг урьж байна.

Үндсэн илтгэл. УБ хотын Ерөнхий архитектор Ц.Тулга

Үзэсгэлэн. УБ хотын 2040 оны хөгжлийн ерөнхий төлөвлөгөөний концепц