Монголын Үндэсний худалдаа аж үйлдвэрийн танхим байгуулагдсаны 60 жилийн ой тохиож байгаатай холбогдуулан баялаг бүтээгчдийн төлөөлөлд төрийн дээд одон, медаль гардууллаа.

    Үндэсний үйлдвэрлэлийг сэргээх, чөлөөт зах зээлийг хөгжүүлэх, иргэдийг ажлын байраар хангах болон барилга, дэд бүтэц, худалдаа, аж үйлдвэрийн салбарыг дэлхийн жишигт нийцүүлэн, эрхэлсэн ажилдаа олон жил үр бүтээлтэй ажиллаж, улс орныхоо нийгэм эдийн засгийн салбарт өндөр хувь нэмэр оруулж буй “Жигүүр гранд” группийн ерөнхийлөгч Дашбалжирийн Баттөр, “Макс” группийн ерөнхийлөгч Дагвадоржийн Ганбаатар нарыг Хөдөлмөрийн баатар, салбарынхаа хөгжил дэвшилд үнэтэй хувь нэмэр оруулсан “Хурд групп” ХХК-ийн барилгын даамал Мятавын Хүрэлбаатарыг Монгол Улсын Гавьяат барилгачин  цол, тэмдгээр тус тус шагналаа. 

    “Жигүүр Гранд Групп” нь Монгол Улсын хувийн хэвшлийн тэргүүлэгч ууган компаниудын нэг бөгөөд нийт 16 салбар компанитай, 1200 гаруй ажилтантайгаар барилгын салбарын том ачааг үүрэлцэж яваа юм. Д.Баттөрийн санаачилга, дэмжлэгтэйгээр “Грандперфект” төвдөө мэргэжил хараахан эзэмшээгүй 5000 гаруй залуучуудыг барилгын сантехникч, мужаан, бетон арматурчин, засал чимэглэлч, цахилгаанчин, гагнуурчин зэрэг мэргэжлээр бэлтгэн салбартаа мэргэшсэн ажилчин бэлтгэн гаргахад хувь нэмрээ оруулж байгаа нэгэн билээ. 

    Харин "Макс" групп нь 20 гаруй охин компанитай, 2300 гаруй ажилтантай их хотын нүүр царай болсон томоохон  бүтээн байгуулалтуудыг хийж, зам, барилгын салбарт үнэтэй хувь нэмэр оруулж байгаа юм.

Монголынхоо хөгжилд үнэтэй хувь нэмэр оруулж буй бүтээн байгуулагч та бүхэнд баяр хүргэе!