Зуны дэлгэр цагт эзэмшил газраа тохижуулж, тав тухыг бий болгодог айл өрх олон болсон. Өөрийн амьдарч буй хашаандаа өөрсдийн гараар тохижилтыг зохион байгуулж хийх нь дурсамж хийгээд үнэ цэнийг бий болгож өртөг зардаг нь бага тусах гэх мэт  олон давуу талуудтай байдаг. Тэгвэл бид энэ удаад хашаагаа өөрсдөө тохижуулж тав тухыг бий болгосон айлын бодит жишээг хүргэж байна. 

Орхон аймгийн Баян-өндөр сумын Цагаанчулуут баг "Эко хороолол"-д оршин суух С.Эрдэнэ-Очирын эзэмшил газартаа өөрийн гараар хийсэн тохижуулалтыг танилцуулж байна.

Хүн бүр эрүүл ногоон орчинд тав тухтай амьдрах нь чухал. Тийм ч учраас өөрийн эзэмшил газартаа тав тухыг бий болгохоор өөрсдийнхөө нөөц бололцоонд тулгуурлаад сошиал орчноос мэдээлэл заавар үзэж, зарим нэг санааг авч хашаагаа ийнхүү тохижуулжээ.

Хашаан дах хөрсөө шинээр зүлэгжүүлж, 9 төрлийн 36 ширхэг мод бут буюу монос, үхрийн нүд, шинэс, нарс, алим, интоор, гүйлс, голт бор, тэхийн шээг зэргийг тарьж ургуулж байна. Мөн хүлэмжиндээ өргөст хэмх, улаан лооль, салатны навч, юуцай, брокли, чинжүү, улаан лууван, яншуй, гоньд зэрэг 9 төрлийн ногоо тарьжээ. 14 төрлийн мандлын цэцэг болон талбайн гүзээлзгэнэ тарьж ургуулсан байна.

Үүнээс гадна хашаагаа тохижуулж төмөр хашаа, сүүдрэвч, усан сан, хүлэмж 2 төрлөөр, элсний талбайтай сүүдрэвч, савлуур, хогийн сав 2 төрөл, хун шувуу том, жижиг 4, үүдний сандал зэргийг өөрсдөө хийж бүтээсэн.

1.Төмөр хашаа 4 тал- 140 м

  Цемент, хайрга, чулуу, арматурын төмөр, хашлага хавтан, шонгийн труба, хайсны төмөр /дөрвөлжин/, электрод, хар будаг, шар боронз, гоёл чимэглэл, хаалганы нугас гэх мэт материал орсон нийт 140 м хашааг 2,954, 000 төгрөгөөр 7 хоногийн хугацаанд хийсэн.

2. Сүүдрэвч

Цемент, хайрга, палк, прус, осво хавтан, 2-ын банз, дээврийн төмөр, ширээ сандалын материал/төмөр банз/, будаг  нийт 890, 000 төгрөгөөр 10 хоногийн хугацаанд хийсэн.

3.Усан сан

Цемент, хайрга, чулуу, чулууны лак, арматур төмөр, плёнк, битум, шингэн шил, хар замаск, гэрэлтдэг чулуу, усны насос, шланг, электрод, нарны энергээр ажилладаг 2 төрлийн гэрэл нийт 4 метрийн диаметртэй 5 тн усны багтаамжтай усан санг 1, 070, 000 төгрөгөөр 14 хоногийн хугацаанд боссон байна.

Усан санг байгалийн төрх шинжийг агуулж хийхийг зорьж чулуугаар, хүрхрээтэй хийж, мөн усаар хүлэмжний ногоо, мод бут цэцэг ногоогоо усалдаг.

4.Хүлэмж 2 төрөл

прус мод, банз, плёнк  4,5х8, 2х4,5 хэмжээтэй 2 төрлийн хүлэмж нийт 850 000 төгрөгөөр 10 хоногийн хугацаанд хийсэн.

5.Элсний талбай, сүүдрэвч

Банз, прус, будаг, сүүдрэвчний даавуу нийт 120 000 төгрөгөөр 2 өдрийн хугацаанд хийсэн.

6. Савлуур

Труба, квадрат төмөр, гинж, дээврийн төмөр, прүс, банз, электрод, будаг нийт 110 000 төгрөгөөр 2 өдөрт боссон.

7.Хогийн сав 2 төрөл

мод, төмөр, будаг, электрод 80 000 төгрөг 3 өдөр хийсэн.

8. Хун шувуу том жижиг тус бүр 2 ширхэг

төмөр тор, цемент, элс, хар замаск, будаг нийт 140 000 төгрөгөөр 5 өдөр хийсэн.

9. Үүдний сандал

төмөр, мод, будаг, электрод 50 000 төгрөг 2 өдөрт хийсэн.