Өнөө үед хот суурин газрын хүн амын нягтрал эрс ихсэж байгаатай холбоотойгоор орон сууцны хэрэглээ шаардлага өсөн нэмэгдэж, төв суурин газруудад орон сууцны барилга ихээр баригдаж цаашид ч өсөн нэмэгдэх хандлагатай байна.

Сууцны барилга нь хүний амьдралын чухал хэсэг болдогын хувьд тав тухтай, гэр бүлийн хэрэгцээ шаардлагад бүрэн нийцсэн, дотоод, гадаад орон зайг нэгтгэн зохиомжилсон, орчин үеийн архитектурын чиг хандлагыг тусгасан цор ганц урлагийн бүтээл байх ёстой юм.

Иймд орон сууцны барилгын архитектур төлөвлөлтийг боловсронгуй болгох, орон нутгийн онцлог, орчны төлөвлөлттэй уялдуулах, гадна байгууламжтай хамгийн оновчтой аргаар холбох зэрэг иж бүрэн боловсруулах шаардлага гарч байна.

Нэг айлын орон сууцны барилгажилтыг хот, хөдөөгийн суурин газрын хэтийн хөгжлийн ерөнхий төлөвлөгөөтэй уялдуулж, архитектур хот төлөвлөлтийн өндөр түвшинд шийдвэрлэх, өөрийн орны уламжлал онцлогийг тусгах зорилт тавигдсаар иржээ. Мөн энэхүү гарын авлагад суралцагчдадаа илүү мэдлэг өгөх зорилгоор нэг айлын сууцны төлөвлөлтийн арга зүйн талаар бичсэнээс гадна барилга байгууламжийн төлөвлөлтийн бусад шаардлагатай мэдээллүүдийг оруулахыг зорив.