Шинэ үеийн барилгын салбар үүсэж хөгжсөний 94 жилийн ойн баярыг угтсан “Барилга МН” сэтгүүлийн 124 дэх дугаар хэвлэгдэн гарлаа. Барилгачдын баярын шинэхэн дугаартаа баярын мэндчилгээ, салбарын төлөөллийн ярилцлага, салбарын мэргэжилтнүүдийн тодруулга, судалгаа, амины орон сууцны мэдээлэл, монгол уран бүтээлчийн бүтээн байгуулалт, иргэдэд зориулсан “Та чадна” булангийн хашаагаа тохижуулсан айлуудын туршлага, дугаарын тогтмол булан болох шинэ орон сууцны үнэ ханш, барилгын материалын үнэ, ажил гүйцэтгэлийн үнэлгээ болоод бусад мэдээ, мэдээллийг багтаан хүргэж байна. 

124 дэх дугаарт нийтлэгдсэн онцлох булангуудаас танилцуулвал...

VIP ярилцлага: Төрөөс барилгын салбарт баримтлах бодлогыг хэрэгжүүлж, төрийн үйлчилгээг иргэд, аж ахуй нэгж байгууллагуудад үзүүлдэг  төрийн өмчит үйлдвэрийн газар, Барилга хот байгуулалтын яам бодлого тодорхойлж, тэр бодлогыг хэрэгжүүлэгч байгууллага болох 11 хэлтэс, 167 ажилтантайгаар үйл ажиллагаагаа явуулж байгаа Барилгын хөгжлийн төвийн захирал Ц.Амарсанааг энэ удаагийн ярилцлагадаа урьж хувь хүн болоод ажил мэргэжил, салбарын хөгжлийн талаар ярилцлаа. 

Байр суурь: Монгол улсад шинэ үеийн барилгын салбар үүсэж хөгжсөний 94 жилийн ойн баяр тохиож буй энэ өдрүүдэд салбарын хэмжээнд өнгөрсөн хугацаанд хийсэн ажлууд болоод цаашдын чиг хандлагаа тодорхойлдог билээ.

Тиймээс 2020 онд Барилга, хот байгуулалтын яам /БХБЯ/ - аас хийж хэрэгжүүлсэн ажил, барилгын салбарын эдийн засгийн өнөөгийн байдал, нийслэлд баригдсан барилга, байгууламж болоод дотооддоо үйлдвэрлэж буй барилгын материалын талаарх мэдээллийг салбарын төлөөллүүдээс авсан тодруулгыг хүргэж байна. 

Монгол уран бүтээлч: Ухамсарт хүн буй болсон цагаас өдийг хүртэл бүх л барьж босгосон барилга  байгууламжийг эхлээд хүмүүн уураг тархиндаа урлаж, дүрсэлдэг бөгөөд үүний дараа энэхүү санаагаа зураг төслөөр зурж харуулдаг. Уураг тархиныхаа хүчээр барилгыг “урлаж“, мэдлэг, дадал, оюун ухаанаа зориулж байгаа архитекторуудын онцлох бүтээлүүдийг энэхүү булангаараа дамжуулан та бүхэнд хүргэж байна. Энэ удаагийн дугаарт архитектор Д. Дөлгөөний биежсэн бүтээлүүдээс дээжлэн хүргэж байна. 

Технологийн дэвшил: Дэлхийн барилгын салбар BIM - ээр дамжуулагдан даяарчлагдаж, төсөл хэрэгжүүлэгчид болоод барилгын салбарт үйл ажиллагаа явуулдаг бүхий л чиглэлийн компаниуд дэлхийн аль ч өнцгөөс хамтран ажиллах боломж бүрдээд байгаа билээ. Харин манай улсад “Төрөөс барилгын салбарт баримтлах баримт бичиг” - т 2021 оноос эхлэн BIM нэвтрүүлэхээр тусгасан байгаа бөгөөд дотоодын зарим компаниуд үйл ажиллагаандаа ашиглаж эхлээд байна. Бид 2020 оны нэгдүгээр сарын дугаараас “BIM гэж юу вэ?” “BIM  - ыг хэрхэн ашиглах вэ?” “BIM - ыг дэлхий даяар хэрхэн нэвтрүүлсэн” талаар цуврал мэдээллийг хүргэсэн. \Энэ талаарх мэдээллийг ЭНД дарж уншина уу\

Энэ удаад Монголд барилгын зураг төслийн салбарт хэрхэн нэвтрүүлсэн туршлагыг танилцуулж байна. 

Амины орон сууц: Амины орон сууцанд тав тухтай, эрүүл аюулгүй орчинг бүрдүүлж амьдрах нь маш чухал. Гадаад байдал, тохь тухын хувьд бүх шаардлагыг хангаж чадах амины орон сууц барихад их хугацаа, хүчин чармайлт орно. Шинэ техник технологи, шинжлэх ухааны хурдацтай хөгжлийг даган хүмүүсийн хэрэглээ, хэрэгцээ шаардлага өөрчлөгдсөөр байна. Одоогоос арваад жилийн өмнө хүмүүс барилгын чанар, зохион байгуулалтаас илүүтэйгээр байршлыг гол шалгуураа болгох хандлагатай байжээ. Харин одоо тав тухтай, сэтгэл хангалуун, эрүүл аюулгүй орчныг чухалчилж шийдвэр гаргалтдаа илүү нухацтай ханддаг болсон. Энэ удаагийн дугаартаа амины орон сууцны 2020-2021 оны чиг хандлага, шийдлийн талаар нийтэлж байна. 

Сэтгүүл захиалах