Аливаа хот, суурин газарт барилга, байгууламж, авто зам, гүүрэн байгууламж нь бүх хүнд тэгш хүртээмжтэй, ээлтэй байх ёстой. Олон улсын барилгын норм, дүрмүүдэд ч орон сууц, олон нийтийн үйлчилгээ, оффисийн барилгыг бүх төрлийн хөгжлийн бэрхшээлтэй иргэд ажиллаж амьдрахад саадгүй байх шаардлагыг тусгасан байдаг.

Тухайлбал, хөгжлийн бэрхшээлтэй иргэдэд хамгийн их тулгардаг бэрхшээл нь орчны саад юм. Байгууламжийн орц, гарцны хэсэг дэх өндөр шат, тэргэнцэр орох боломжгүй нарийн хаалгатай ариун цэврийн өрөө, өндөр босго, налуулалтгүй замын хашлага зэргээс шалтгаалан олон зуун хөгжлийн бэрхшээлтэй иргэн бие даан нийгмийн харилцаанд оролцож чадахгүй, байнгын хэн нэгнээс хараат, бусдын тусламж дэмжлэгийн дор амьдарч байна. Тиймээс хүн бүрийн тэгш оролцоот, хүртээмжтэй, саадгүй орчныг бүрдүүлэх, хөгжлийн бэрхшээлтэй иргэддээ тулгамдаж буй асуудлуудыг шийдвэрлэхэд хувь нэмэр болгох үүднээс Монголын тэргэнцэртэй иргэдийн үндэсний холбоо /МТИҮХ/ энэхүү мэдээллийг бэлтгэн хүргэж байна.

      Энэхүү мэдээллээр төлөвлөлт, архитектурын ямар шийдлүүд хөгжлийн бэрхшээлтэй иргэдэд илүү тохиромжтой байдаг талаар практик жишээн дээр тайлбарлан хүргэхийг зорилоо. Мөн гадны улс орнуудад бүх нийтэд зориулсан саадгүй орчинг хэрхэн бий болгосон тухай сайн жишээнүүдийг танилцуулах болно.

Налуу зам буюу пандусыг хэрхэн гүйцэтгэх вэ?

       Сүүлийн үед хамгийн түгээмэл баригдаж буй байгууламжийн орц гарцны хэсэг дэх налуу зам буюу зориулалт нь тэргэнцэртэй хүн хэн нэгний тусламжгүйгээр уг замыг ашиглан байгууламж руу орж, гарах нөхцөлийг хангахад оршдог.

      "Иргэний барилгын төлөвлөлтөд хөгжлийн бэрхшээлтэй хүний шаардлагыг тооцсон орон зай, орчин. Үндсэн шаардлага MNS 6055: 2009” стандартад зааснаар налуу зам 1х12 харьцаа бүхий налуутай байхаар заасан байдаг.

         Налуу замын хоёр хажуу талаар 90 см-ийн өндөртэй хоёр эгнээ бариул хийж, бариулын дунд хэсгээр 70 см-ийн өндөртэй хашлага хийх ба сургуулийн өмнөх насныханд зориулж 50 см өндөрт бариул төлөвлөж болно. Бариулын төгсгөл хэсгийг 30-45 см илүү гаргаж, үзүүр хэсгийг дугуйруулж доод бариултай холбож өгнө. 

      Налуу замын эхлэл, төгсгөлд тэгш талбайг төлөвлөнө. Замын чиглэл өөрчлөгдөх тохиолдолд тэгш талбайн өргөн тэргэнцэр эргэх боломжтой буюу 150,0 см-ээс багагүй байна. Налуу замын тэргэнцэр явах цэвэр зай 90 см байх шаардлагатай.

      Стандарт бус налуулалттай, бариулгүй налуу зам тэргэнцэртэй иргэдэд ихээхэн хүндрэл учруулдаг. Зарим тохиолдолд унаж бэртэх эрсдэлтэй байдаг.

Тэргэнцэртэй иргэдэд хүртээмжтэй орчныг бүрдүүлэх цуврал мэдээллийг сэтгүүлийн дараагийн дугаараас уншаарай.

Монголын тэргэнцэртэй иргэдийн үндэсний холбоо