Орчин цагт маркетинг сурталчилгааны арга хэрэгсэл улам

бүр сайжирч, бизнес эрхлэгчдэд илүү өндөр шаардлага 

тавигдах болжээ. Тэрхүү арга хэрэгслүүдийн нэг нь үзэсгэлэн, яармаг юм. Их Британийн нэгэн маркетингийн агентлагаас гаргасан судалгаанаас үзэхэд үзэсгэлэнд амжилттай оролцвол маш олон эерэг үр дүнгүүд гардаг байна.

Жишээлбэл,

- Ердийн үед бизнесийн борлуулалтыг амжилттай хийхийн тулд дунджаар 3.7 дуудлага хийдэг бол үзэсгэлэнд оролцож, мэдээллээ биечлэн хүргэсний дараа 0.8 дуудлага хийгээд борлуулалт амжилттай болдог гэсэн судалгаа байдаг.

- Мөн үзэсгэлэн дээр тогтоосон харилцаа холбооны дунджаар дөнгөж 12% нь тухайн бизнес эрхлэгчидтэй өмнө нь харилцаа холбоо тогтоосон харилцагч байдаг бол үлдсэн 88% нь шинээр холбоо тогтоож буй ирээдүйн харилцагчид байдаг.

- Шийдвэр гаргагчдад хүрч чадсан мэдээллийн 82% нь таны бүтээгдэхүүн, үйлчилгээг худалдан авах сэдэл төрүүлж чаддаг бөгөөд тэдгээрийн 49% нь идэвхтэй худалдан авалт хийхээр төлөвлөдөг байна.

Үзэсгэлэнд оролцох нь та бизнестээ маркетингийн өвөрмөц давуу талыг бий болгож, хэтийн төлөв, үйлчлүүлэгчидтэй уулзах, холбогдох, харилцаа тогтоох боломжийг олгодог учраас амжилттай, үр дүнтэй байх нь хамгийн чухал юм. Тухайн салбарын гол хүмүүстэй уулзах Бизнесийн харилцаа холбоог бий болгох хамгийн тохиромжтой платформ бөгөөд Дижитал маркетингаас ялгаатай нь үзэсгэлэн зорилтот бүлэгтэйгээ нүүр тулан харилцах, урт хугацааны бизнес харилцаа тогтоох боломжийг танд олгоно. Үзэсгэлэн худалдаа нэг талаас өндөр зардалтай тул оролцох үзэсгэлэн яармагийг зөв сонгох нь чухал юм. Тухайн сонгосон үзэсгэлэн таны хүсч буй зорилтот хэрэглэгчийг цуглуулж чадах эсэхийг эхлээд судалж, оролцсоноороо юу хүсч байгаагаа тодорхойлох хэрэгтэй. Нэгэнт багагүй хэмжээний зардал, хүчин чармайлт гаргаж үзэсгэлэнд оролцож байгаа учир ирээдүйд ирэх үр өгөөжөө бодолцон нарийн төлөвлөгөөтэй, тодорхой үр дүнд хүрэхүйц бэлтгэлээ сайтар хангаж оролцох нь чухал. Мөн үзэсгэлэнд амжилттай оролцох нэг чухал зүйл бол талбайн байршил юм.

Тиймээс талбайн байршлаа хүрэлцэн ирэх зочин болон танай байгууллагад тав тухтай байж болох байршлыг сонгох хэрэгтэй. Танайхыг зориод ирсэн зочид хэрэглэгчдэдээ мэдээллээ бүрэн дүүрэн өгч, сэтгэл хангалуун буцаахын тулд танай байгууллагын хэв маяг брэндингийг илтгэсэн, өнгө үзэмж утга агуулга бүхий талбай юм. Тиймээс талбайгаа өндөр ач холбогдол өгөн засч тохижуулах хэрэгтэй. Зочлон ирэх хүмүүсээ буруу тооцоолж танилцуулах материал болон бусад зүйлсээ дутуу бэлтгэснээс зорин ирсэн хэрэглэгчдээ алдах хамгийн том шалтгаан. Тиймээс танилцуулах материалын эхээ бэлдэхдээ бараа бүтээгдэхүүн, үйлчилгээнийхээ мэдээ мэдээллийг бүрэн илтгэхүйц, утга агуулга хэвлэлтийн чанар, өнгө үзэмжийн хувьд өндөр чанартай бэлтгэх нь зүйтэй. Энэ нь танай байгууллагын имидж нэр хүндэд эерэг нөлөө үзүүлэх юм.

Сурталчилгааны гарын бэлэг гэх мэт танай бизнесийг сурталчлах сонин содон зүйлсийг ч бэлдэх нь чухал. Үзэгчид жижиг гэлтгүй гарын бэлгэнд дуртай байдаг.

МӨН ХЭЗЭЭ Ч АНХААРАЛГҮЙ ОРХИЖ БОЛОХГҮЙ ЗҮЙЛ БОЛ ҮЗЭСГЭЛЭНГИЙН ТАЛБАЙ ДЭЭР АЖИЛЛАХ МЕНЕЖЕР

Танай компанийн нүүр царай болж ажиллах ажилтандаа ач холбогдол өгч, сургалт хийгээгүйгээс, мөн танай байгууллагын талаархи мэдээлэл ойлголтгүй цагийн ажилтан зогсоосноор нэгэнт өндөр зардал гарган оролцож буй үзэсгэлэнг үр дүнгүй болгох аюултай. Тиймээс үзэсгэлэн дээр аль болох шинэ ажилтан болон цагийн ажилтанизогсоохгүй байх, ажилтнууддаа сургалт хөгжүүлэлт хийх, идэвхижүүлэлтийн арга хэрэгслэл ашиглах гэх мэт арга хэмжээ авах хэрэгтэй. Компани, бүтээгдэхүүн үйчилгээний талаар мэдээлэл, мэдлэг багатай менежер сонгож үзэсгэлэнд орвол тэр үзэсгэлэнгээс өндөр үр дүн хүлээгээд хэрэггүй юм. Ихэнхи гадаадын үзэсгэлэн худалдаан дээр оролцогч компаниудын удирдах ажилтан, захирлууд нь өөрсдөө талбай дээрээ албан хувцастай, нэрийн хуудсаа бариад мэдээлэл өгөөд зогсож байдаг. Энэ нь өөрийн биеэр ажилтнуудаа манлайлан үлгэрлэхээс авахуулаад харилцагч хэрэглэгчдээ таньж мэдэх өндөр ач холбогдолтой юм. Хэрэглэгчид аль болох удирдах албан тушаалтантай холбоо тогтоож, мэдээлэл авахыг илүүд үздэг.

Дашрамд хэлэхэд Монголд болж буй үзэсгэлэнгүүдэд цагийн ажилтан болон бүтээгдэхүүн үйлчилгээгээ бүрэн гүйцэд мэдэхгүй ажилтан зогсох, удирдах ажилтнууд нь үзэсгэлэндээ ач холбогдол бага өгөх, амралтын өдрөөр салхинд гарангаа биеийн тамирын хувцастай талбай дээгүүрээ ороод гарах гэх мэт үзэгдлүүд ажиглагддаг.

Үзэсгэлэнгийн үеэр танайхыг сонирхсон хэрэглэгчид нэг дор цугласан давуу талыг ашиглан семинар сургалт, янз бүрийн эвент арга хэмжээ зохион байгуулах нь өндөр үр дүнтэй байх болно. Дараагийн маш чухал зүйл бол үзэсгэлэнгийн талбай дээрээ үзүүлэн таниулах материал, бүтээгдэхүүний биет загвар, макет зэргийг аль болох хангалттай хэмжээгээр бэлтгэж тавих хэрэгтэй. Нэгэнт зориод ирсэн хэрэглэгчээ хангалттай мэдээлэлтэй буцаах нь амжилттай оролцогч байх гол үндэс юм.

Үзэсгэлэн дээр танайхыг зорин ирсэн нэг хэрэглэгч ч танай ирээдүйн маш том харилцагч байх боломжтойг бодолцон харилцагч бүрийг алдахгүй байхын тулд бүртгэлийн маягт хөтлөн мэдээлэл цуглуулж үлдэх нь чухал. Үзэсгэлэн дууссанаар тус үйл ажиллагаа өндөрлөж байна гэсэн үг биш юм. Бүртгэж үлдсэн мэдээллийнхээ дагуу эргэх холбоо тогтоож танай вэб сайт болон сошиал хаягаар зочлон орохыг урин, утсаар холбогдож, харилцаагаа борлуулалт болгон хувиргах дараагийн алхмуудаа хийх хэрэгтэй.

ҮЗЭСГЭЛЭН ДЭЭР БОРЛУУЛАЛТ ХИЙЖ АМЖААГҮЙ БАЙСАН Ч ДАРАА НЬ ТОМ ХЭМЖЭЭНИЙ УРТ ХУГАЦААНЫ ҮНЭНЧ ХАРИЛЦАГЧТАЙ БОЛОХ АМЬД ХАРИЛЦААГ ҮЗЭСГЭЛЭН ӨГЧ ЧАДАХ ЮМ.

Зарим нэг борлуулалт хийхэд хэдэн сар, бүр хэдэн жил ч шаардагдаж болно. Холбоо харилцаатай байх нь урт хугацааны өгөөжийг нэмэгдүүлэхэд тусална. Жишээ нь "БАРИЛГА ЭКСПО" олон улсын барилгын үзэсгэлэн яармагийг дунджаар 32000 зорилтот үзэгч ирж үзэж сонирхдог ба нэг удаагийн үзэсгэлэн дээр 10 тэрбум орчмын борлуулалт хийгддэг гэсэн судалгаа байдаг. Тус үзэсгэлэнд олон жил амжилттай оролцсон компаниуд үр дүнгийнхээ талаарх сэтгэгдлээ бидэнтэй хуваалцсан юм.

         О.НАРАНГЭРЭЛ "АКВАТЕРМ ХХК" БОРЛУУЛАЛТЫН АЛБАНЫ ДАРГА  

Манай "Акватерм" төв 2006 онд байгуулагдсан цагаасаа эхлэн сантехникийн материалаа зах зээлд нийлүүлэн хэрэглэгчдэд биечлэн, бодитоор танилцуулах зорилгоор 2008 оноос одоог хүртэл жил бүр "Барилга Экспо" үзэсгэлэнд оролцож байна. Хэрэглэгчид нүдээр харж, гараар барьсаны дараа шийдвэрээ гаргахыг эрмэлздэг. Тиймээс үзэсгэлэнд оролцсоны дараа шинэ хэрэглэгчид манай төвөөр үйлчлүүлэх нь эрс нэмэгдэж, их үр өгөөжтэй байдаг. Жил бүр борлуулалтын тоо өсч, бидний нийлүүлж буй бараа, материалын нэр төрөл нэмэгдэж байгаа нь тодорхой жишээ гэж хэлмээр байна.

Мөн тус үзэсгэлэн жил бүр уламжлал болон зохион байгуулагддаг учраас яг энэ цаг үед хэрэглэгчид үзэсгэлэнгээс өөрт хэрэгтэй барааны бэлтгэн нийлүүлэгчийг хайж эхэлдэг болсон байгаа нь оролцож байгаа компаниудад олон давуу талын олгож байна.

 Н.ҮҮРИЙНЦОЛМОН КАРИТАС ЧЕХ РЕПАБЛИК ТББ-ЫН ТӨСЛИЙН МЕНЕЖЕР

Барилгын хог хаягдлын менежмент, дахин боловсруулалтын чиглэлээр төсөл хэрэгжүүлдэг бидний хувьд энэхүү үзэсгэлэнд оролцох нь зөвхөн олон нийтэд байгууллагын болон төслийн үйл ажиллагаагаа таниулаад зогсохгүй, барилгын салбарын байгууллага, ЖДҮ эрхлэгч, хувь хүмүүстэй холбогдож, тэдний санал бодлыг сонсох өөрсдийн үйл ажиллагаандаа оролцуулах боломжийг олгодог юм. Бид үзэсгэлэнд оролцсоноор хүрэлцэн ирсэн барилгын салбарынхан, хувь хүмүүс, олон нийтэд өөрсдийн төслийн үйл ажиллагааны талаар таниулж, төслийн хүрээнд хийгдсэн судалгаа, барилгын хог хаягдлыг дахин боловсруулан гаргасан бүтээгдэхүүний дээж, сургалтыг танилцуулж, өнгөрсөн жилийн үзэсгэлэнгээс л гэхэд 80 гаруй оролцогчийг сургалтандаа бүртгэн авсан.

    Э.ЛХАГВАСҮРЭН PUZZLEHAUS” ХХК – ИЙН МАРКЕТИНГ БОРЛУУЛАЛТЫН ЗАХИРАЛ 

Бид шинэ харилцагчаа нэмэгдүүлэх, борлуулалтаа өсгөх зорилгоор "Barilga expo" үзэсгэлэнд жил бүр оролцдог. Тиймээс тасралтгүй 10 орчим жил оролцож байгаа маань энэхүү үзэсгэлэн ямар үр дүнтэй байдгийг илтгэн харуулна гэж бодож байна. Манай компани үзэсгэлэнд оролцох болгондоо бидний тухай мэдэхгүй шинэ харилцагчаа нэмэгдүүлж, борлуулалтаа өсгөсөөр байна.