“Ногоон сууц” хотхоны амины сууцны хийц бүтээцийн шийдэл
Бид өмнөх дугаарт ногоон барилгын тухай ерөнхий ойлголт, пассив барилгын шалгуур үзүүлэлтүүд, “Ногоон сууц” хотхоны 87м2 талбайтай сууцны ерөнхий төлөвлөгөө, архитектур төлөвлөлтийн талаарх зөвлөгөөг хүргэсэн бол энэ дугаарт тус барилгын хийц бүтээцийн шийдлийн талаарх мэдээллийг хүргэж байна.
СУУРЬ:
Барилгын ачааг хүлээн авч буурьт дамжуулах үүрэгтэй барилгын бүтээцийг суурь гэж нэрлэдэг. Суурийн доор гадаргууг түүний ул гэж нэрлэх ба улнаас газрын гадаргуу хүртэлх эгц босоо зайг суурь суулгалтын гүн гэнэ. Суурь суулгалтын гүн нь буурь хөрсний төрөл, шинж чанар, хөлдөлтийн гүн, хөрсний усны түвшин, уг барилга зоорийн давхартай эсэх, зэргэлдээх барилгын суурь суулгах гүн, суурийн ажил гүйцэтгэх арга зэргээс хамаарна.
Суурийн улны өргөнийг барилгаас ирэх ачаалал болон буурь хөрсний даах чадвараас хамааруулан сонгоно. Суурь нь эвдрэхгүй, улаараа гулсахгүй, онхолдохгүй байх шаардлагатай.
Сууринд орох үндсэн материал нь шаардлага хангахуйц бат бөх, нягт, ус үл нэвтрүүлэх, хөлдөлт болон химийн урвалд өртөхгүй өндөр чанар бүхий төмөр бетон юм.
Амины орон сууцны суурийн төрлүүд:
1. Шугаман суурь
2. Баганан суурь
3. Хавтан суурь
4. Гадсан суурь
Амины орон сууцны барилгад тасралтгүй үргэлжилсэн шугаман ба баганан суурийг ихэвчлэн төлөвлөдөг. Мөнх цэвдэгтэй, намгархаг, овойлт үүсдэг хөрсөнд гадсан суурь, аяган суурь, хавтан суурь зэргийг хийж болно.
Архитектур төлөвлөлтийн даалгаврын дагуу “Ногоон сууц” хотхоны 87м2 талбайтай сууц нь цутгамал төмөр бетон шугаман суурьтай төлөвлөгдсөн. Суурийн бетоны анги В20, арматурын анги SD390 цутгамал төмөрбетон суурийн доор 10 см зузаантай бетон бэлтгэл хийнэ.
Суурийн байгуулалт
Шугаман суурийг ханын доор хийх учир хэлбэрийн хувьд хамгийн энгийн. Суурийн өргөнийг ханын зузаанаас багагүйгээр тооцоогоор тодорхойлно. Тэгш өнцөгт огтлолтой суурийг барилгын ачаа бага, хөрсний даац харьцангуй өндөр байх үед хэрэглэнэ. Суурь дээрх ачаа их, хөрсний даац бага үед суурийн улны өргөнийг нэмэгдүүлнэ. Өргөн ултай суурийн огтлол ньтрапец байж болно.
Шугаман суурийг бүхий л гадна дотор үндсэн хананы дор тавих бөгөөд урт нь барилгын нийт эргэн тойрны хэмжээтэй адил байна. Шугаман суурины дэвсгэрийг ихэвчлэн хөрсний хөлдөлтийн гүнээс 20 см дор байхаар хийдэг. Хуурай болон элсэн хөрсөнд суурийг хөлдөлтийн гүнээс дээр тавьж болох бөгөөд газрын хөрснөөс 50-70 см -ээс багагүй гүнд байна.
Төмөр бетон суурь цутгах технологийн дараалал:
- Суурь хийх улаан шугам тавих
- Суурийн тэг /±0,00/ тэнхлэг татах хатуу цэг авах
- Суурийн нүх ухах
- Суурийн нүхийг гараар засах
- Суурь суух буурийг гараар засах
- Буурь хөрсийг нягтруулах
- Ул бетон цутгах + арчлах
- Суурийн босоо тэнхлэгийг буулгах
- Арматурыг төслийн байранд угсрах
- Арматурчилалын алхам, тор, хүчитгэлийн хэмжин шалгалт
- Хэв угсрах
- Арматурын хамгаалалтын үе гаргах, хэмжин шалгалт
- Хэвний тулаас, бэхэлгээ, хэмжин шалгалт
- Суурийн бетон цутгалт
- Бетон арчилгаа
- Хэв хашмал хуулах
- Ус тусгаарлалт хийх
- Буцааж булах
- Булсан шороог нягтруулах
- Талбайн цэвэрлэгээ
ХӨНГӨН АРАГТ БҮТЭЭЦ:
Даацын үндсэн элемент нь хөнгөн арагт бүтээц ба энэ нь хүйтнээр боловсруулсан 4мм-с ихгүй зузаантай нимгэн ханат бүтээцийг хэлнэ. Хана бадээврийн хавтанг 90S40-1.00-550 огтлолтой Си төмрөөр хийх ба мөн хамар хана, дээврийн арагт бүтээцийн Си төмрөөр хийжөгнө. Бүтээцийг стандартын шаардлагын дагуу угсрахад холбоос нуруу, шилбэний бэхэлгээ, анкер, холбоос хэсэг болон бусад нэмэлт бэхэлгээнүүдийг хэрэглэнэ.Бетон, төмөр бетон, өрөг зэрэг бусад бүтээцүүдтэй холбогдох хэсэгт зориулалтын суулгах нарийвчийг хэрэглэнэ. Хөнгөн арагт бүтээцийн барилгад голлон хэрэглэгддэг материал бол ОСБ хавтан юм. Энэ нь модны зоргодсыг хэрчиж шахан, хуудас хуудсаар давхарга үүсгэж түүнийгээ тодорхой даралт, температурт тусгай зориулалтын цавуугаар наан бэхжүүлсэн инженерийн хийцлэл бүхий шахмал хавтан юм. Энэхүү хавтанг барилгын хана, шал хийхэд түгээмэл ашиглах бөгөөд гадна хананд давхарлаж хийх нь эрчим хүчний хэрэглээг бууруулдаг.
ХАНА:
Амины орон сууцны хамгийн гол хийцлэл нь хана бөгөөд ханын хийцлэлээрээ нэрлэгдэх нь олонтаа. Ханыг зориулалт ба байрлалаар нь
-гадна хана
-дотор хана
-хамар хана гэж ангилна.
Гадна хана барилгын доторх өрөө тасалгаануудыг гадны нөлөөллөөс тусгаарлан өрөөг тогтмол дулаантай, тодорхой чийглэгтэй байлгах нөхцөлийг хангасан байна. Дотор хана нь өрөөнүүдийг тусгаарлах үүрэгтэй, мөн дотор орон зайг зохицуулан хязгаарлаж, даацын үүргийг давхар гүйцэтгэнэ. Өрөөний хэмжээ, хийцлэлийн төрлөөс шалтгаалан ихэвчлэн ханаар даац авахаар төлөвлөгдсөн байдаг. Ажлын зурагт ханын бүтцийг сонгож, нарийн тусгасан байна.
Ханын дулаалгыг дээвэртэй холбогдох хэсэг болон цонх хаалганы амалгаа хийх хэсгүүдэд зургийн дагуу зай завсар гаргалгүй гүйцэтгэх хэрэгтэй. Мөн ханын дулаалгыг суурийн дулаалгатай хамтад нь хийнэ. Суурийн дулаалга булагдсан хэсэгт ус чийгнээс тусгаарлах түрхлэг, бусад материалаар тусгаарлах шаардлагатай.
Сүүлийн үед амины орон сууцанд канад, сип хавтан, хөнгөн ган каркас, конкреволл зэрэг олон улсын шинэлэг технологиуд ихээр нэвтэрч байна. “Ногоон сууц” хотхоны 87м2 талбайтай сууц нь ОСБ хавтан дүүргэлттэй хөнгөн ган бүтээц бүхий дулаалгатай ханатай юм.
Ханын бүтэц:
- 12мм гипсэн хавтан
- Агаарын үе (90мм зузаантай даацын Сипрофиль)
- 15мм ОСБ хавтан
- 650мм эрдэс хөвөн дулаалга
- 9мм зузаантай ОСБ хавтан
- Уур ус тусгаарлагч цаас
- Агаарын үе (50мм Си профиль)
- Нугалмал төмөр фасад
87м2 талбайтай амины сууцны хана-дээврийн хэсэглэлийн доорх зургаас хана, дээвэр нь ямар бүтэцтэй болох, орох материалуудын төрөл, зузаан, уулзварын дулааны гүүр, уулзварын энергийн урсгалыг харж болно.
ДЭЭВЭР:
Дээвэр нь барилгыг гаднын үйлчлэлээс хамгаалах, дуу дулаан тусгаарлах, хурын уснаас хамгаалах, барилгын дотоод дулааныг алдахгүй байх гол үүрэгтэй, барилгын үндсэн бүтээцийн угсралтын дараа гүйцэтгэх үндсэн ажил юм. Дээвэр нь тухайн барилгын архитектур төлөвлөлтийн хувьд хэлбэр, өнгө үзэмжид чухал нөлөөлдөг.
Тус амины сууц нь налуу дээвэртэй ба дээврийн шувуун нуруун татангыг хүйтнээр хэлбэржүүлсэн G550 ангийн, зэврэлтээс хамгаалж Z275 цайр түрхлэгтэй хөнгөн ган бүтээцээр төлөвлөсөн. Хана дээврийн агаарын урсгалыг хааж, битүүмжлэх зорилгоор ус чийг тусгаарлагч цаас хэрэглэнэ. Ус чийг тусгаарлагч цаасны уулзвар залгаа, ам даруулгыг тусгай зориулалтын наалдамхай тууз хэрэглэнэ.
Дээврийн бүтэц:
- 12мм гипсэн хавтан
- Агаарын үе (90мм зузаантай даацын Си профиль)
- 15мм ОСБ хавтан
- 650мм эрдэс хөвөн дулаалга
- 9мм зузаантай ОСБ хавтан
- Уур, ус тусгаарлагч цаас
- Агаарын үе (50мм Си профиль)
- Дээврийн нугалмал төмөр
ХУЧИЛТ:
Давхар дундын хучилтын бүтэц:
- Шалны өнгөлгөө
- Ус чийг тусгаарлагч PE
- 12мм ОСБ хавтан
- 650мм эрдэс хөвөн дулаалга
- Сипрофиль 90x40x10-0,95
- Ус чийг тусгаарлагч PE
- 8мм гипсэн хавтан
ЦОНХ, ХААЛГА:
Цонхны шилэн багц - Дөрвөн давхар шилтэй, Kr 90% криптон дүүргэсэн, MULTI-TECH G хуванцар спейсэртэй, шилэн багцны дулаан дамжуулалт, Ug 0.49В/м2К, нарны цацраг нэвтрүүлэлт g=0.53 үзүүлэлттэй.
Хүрээ, рам - Нягт EPS дулаалгын материалаар дулаалсан, 56мм зузаан мод, хөнгөн цагаан хосолмолрамтай. Цонхыг суулгахдаа агаарын битүүмжлэл болох наалт болон дулаалгыг заавал хийх шаардлагатай.
Гадна хаалганы аюулгүй байдлыг хангах үүднээс гадна талд нь төмөр торон хаалга нэмж хийж өгсөн.
Дотор модон хаалгыг зурагт үзүүлсэн хэмжээний дагуу наамал хуулгатай MDF хаалга байхаар төлөвлөсөн.
Ариун цэврийн өрөөний хаалгыг агаар сэлгэлтийн урсгалыг хангах зорилгоор доод
хэсэгтэй модон сараалжтай байхаар сонгосон байна.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.