Шил барилгын салбарын хамгийн тогтвортой материал. Наранд ганддаггүй, өвөл хөлддөггүй, усанд нордоггүй, чийгэнд дэвтдэггүй, сунадаггүй, агшдаггүй. Тиймээс хүн төрөлхтнийг шилгүйгээр төсөөлөх аргагүй мэт. Энэхүү гайхалтай материалын зах зээл, үйлдвэрлэлтийн өнөөгийн байдлын талаар ярилцахаар “Шилэн хийц”  ХХК - ийн гүйцэтгэх захирал Д.Гантулгыг “VIP”ярилцлагын буландаа урилаа. 

Танай компани шил үйлдвэрлэлийн салбартаа ууган үйлдвэр. Олон зүйлээрээ анхдагч болсон нь өнөөдрийн өндөрлөгийг бий болгосон болов уу? Салбартаа хэдэн жил үйл ажиллагаагаа явуулж байна вэ? 

Хэрвээ та бизнесдээ анхдагч бол амжилтын 50 хувь таных. Харин түүнийгээ хөгжүүлж чадвал амжилтад хүрэх болно гэдэг. Манай компани анхнышил хатжуулах шугам, олон үет шил наах шугам, налуу болон хэвтээ ирмэгийн машин, шилний будгийн төхөөрөмж гээд орчин үеийндэвшилтэд техник, технологи бүрийг   алдалгүй үйлдвэрлэлдээ нэвтрүүлж зах зээлд онцлог, шинэлэг бүтээгдэхүүнүүдийг нийлүүлсээр ирсэн.

Компаниа анх 2002 онд байгуулж, автомашины салхины шил үйлдвэрлэж эхэлсэн ч, ашиг багатай, эрсдэл өндөртэй байсан. Тиймээс 2004 оноос барилга болон тавилгын шилэн бүтээгдэхүүний эрэлт, хэрэгцээ ихэссэн үед бид чиглэлээ өөрчлөн ажиллаж эхэлсэн. Одоогоор шил, толь боловсруулах үйлдвэр, хуванцар болон металл хаалга цонхны үйлдвэрлэл, шилэн багцын үйлдвэрлэл, шилэн фасадны суурилуулалт, сэргээгдэх эрчим хүчний чиглэлээр нарны панель үйлдвэрлэл, суурилуулалт гэсэн үндсэн гурван чиглэлд 140 орчим ажилтантайгаар үйл ажиллагаагаа явуулж байна. 

Түүхий эд материалаа ОХУ болон БНХАУ-аас авч, түүнийгээ боловсруулан шилэн багц, шилэн фасад, цонх, интерьерийн бүх төрлийн шилэн бүтээгдэхүүн, толь гэх мэт хэрэглэгчийн хэрэгцээт бүтээгдэхүүнийг чанарын өндөр түвшинд үйлдвэрлэж байна. 

 Шил нь бараг 100 хувь импортоор орж ирдэг. Монголд шилний үйлдвэрлэл хөгжихгүй байгаа шалтгааныг хэрхэн хардаг вэ?

    1990 онд хаалгаа барьсан Налайхын шилэн сав, лонхны үйлдвэрийг эс тооцвол Монголд шилний үйлдвэр огт байхгүй. Монгол улс шилний үйлдвэртэй байх ёстой боловч зах зээл нь хангалттай биш байна. Хамгийн жижиг шилний үйлдвэр 5 сая хүн амтай зах зээлд хоногт 150 тонн шил үйлдвэрлэж байж ашигтай ажилладаг. Гэтэл Монгол улс 3 сая гаруй хүн амтай, үүний 50 - иас илүү хувь нь гэрт амьдардаг учраас шилний хэрэгцээ тун бага. Тиймээс манайд ихдээ л 1,5 сая хүн амтай шилний зах зээл байна гэсэн үгюм.  

Мөн шилний үйлдвэрлэл нь тасралтгүй явагдах ёстой гэдгээрээ онцлог, нарийн технологи юм. Тодруулбал, зууханд шилний масс хайлуулаад эхэлсэн л бол тухайн зуухны насжилтыг дуустал ажиллах ёстой. Хэрвээ зогсоовол зуухыг дахин ашиглах боломжгүй болдог. Хамгийн жижиг хүчин чадалтайшилний үйлдвэрийг бий болгоход өртөг нь 30-40 сая $ болно. Энэ үйлдвэр бүрэн хүчин чадлаараа ажиллахад гуравхан сарын дотор дотоодын хэрэгцээг бүрэн хангах боломжтой. Хамгийн сүүлийн үеийн технологи болох 18 жил ажиллах хүчин чадалтай зуухыг авлаа гэж бодоход маш их шилний илүүдэл үүсэхээр байна. Экспортод гаргавал хөрш улсууд хангалттай шилний үйлдвэртэй учраас манайхаас худалдаж авахгүй нь тодорхой юм. 

Түүнчлэн шилний үндсэн түүхий эдийн70 хувь нь цахиурын элс (SiO₂), 30 хувь нь бусад нэгдлүүдээс тогтсон химийн орц найрлагаас бүрддэг. Уг нь Заамар, Халх гол, Дорноговь аймагт сайн чанарын цахиурын элсний орд байгаа боловч химийн бодис үйлдвэрлэдэг нэг ч үйлдвэр Монголд байхгүй. Цэвэр техникийн сод, цэвэршүүлсэн цагаан тугалга, төмрийн исэл гэх мэт олон нэр төрлийн химийн бодис шаардлагатай байдаг. Жишээ нь Монголд цагаан тугалганы орд байгаа боловч 99,9% цэвэршүүлэх үйлдвэр нь байхгүй. Бүх хэрэгтэй тоног төхөөрөмжийг нь авчраад түүхий эддээ тулгуурлан бусад химийн орцыг импортоор аваад үйлдвэрлэл явуулсан ч Орос, Хятадын үйлдвэрүүдийн бидэндсанал болгож байгаагаас хамаагүй өндөр өртөгтэй гарах болно. 

Иймд Монголулсад шилний үйлдвэр эдийн засгийн хувьд ойрын жилүүдэд үр ашиггүй гэж бодож байна.

ЭРЭЭНД МОНГОЛЫН ТЕНДЕРТ ЗОРИУЛСАН ХААЛГА, ЦОНХ БАЙДАГ 

Үндэсний үйлдвэрлэгчид дотоодын хэрэгцээгээ бүрэн хангах боломжтой байна уу. Танай компани ямар хүчин чадалтайгаар ажилладаг, нийт үйлдвэрлэлийн хэдэн хувийг эзэлдэг вэ?

Манай компанийн хувьд жилд 1500-2000 тонн шил боловсруулаххүчин чадалтай. Удахгүй хоёр дахь үйлдвэрээ ашиглалтад оруулах гэж байгаа бөгөөд хүчин чадлаа 2 дахин нэмэгдүүлэх төлөвлөгөөтэй байгаа. Энэ үйлдвэр нь бүх төрлийн шилэн багцын үйлдвэрлэл дээрдагнан ажиллахаар төлөвлөсөн. Мөн хамгийн сүүлийн үеийн автомат техник технологиудыг ашиглаж, эрчим хүчний хэмнэлттэй шилэн багц үйлдвэрлэж, аль болох импортын шилэн багцуудтай өрсөдөхүйц үнийн бодлогыг баримталж ажиллах болно. Монголд манай компанитай адил төрлийн үйлчилгээ тогтмол явуулдаг 4-5 компани бий. Манай улс одоогийн байдлаар боловсруулсан шилний зах зээлийн эрэлтийн 60 орчим хувийг дотоодоос хангаж, 40 хувийг импортоор оруулж ирж байна. Хэдийгээр дотоодын хэрэгцээгээ бүрэн хангах боломж байгаа ч гадны төсөл, хөтөлбөрүүднь хэрэгжүүлэгч орноосоо материалаа татаж авах, манай дотоодын үнэ өртөг зэргээс хамаараад импортын материал байсаар л байна.

Тэгвэл тэр бүрэн боломжийг ашиглахад юу чухал байна вэ? Үндэсний үйлдвэрлэгчдийн хоорондын уялдаа холбоо мөн нөлөөтэй болов уу?

Үндэсний үйлдвэрлэгчид бие биенийгээ их дэмждэг л дээ. Энэ дашрамд манай компанитай олон жил хамтран ажиллаж байгаа MCS, Анун, Камдер, Жигүүр Гранд, Нар Урт, МАК, Наран Трейд, Оюуны Ундраа, БҮТИ, Хурд групп болон бусад жижиг, дунд бизнес эрхлэгч байгууллагууд, хэрэглэгч нартаа талархал илэрхийлж байна. Цементийн импортын татвар нэмэгдсэнээр дотоодын үйлдвэрлэлээрээ хэрэгцээгээ хангах хэмжээнд хүрлээ. Гэтэл хаалга, цонхны импортын татварыг ганц хувиар нэмэгдүүлж, 6хувь болгосон нь биднийг дэмжсэн гэж хэлэхэд хэцүү. Төр өөрөө томоохон худалдан авагч болсон байна. Жилд маш олон тендерүүд зарлагддаг учраас хэрэглэгдэх материалуудыг дотоодын үйлдвэрлэгч нараасаа авбал урд хөрш рүү гарах мөнгө Монголдоо үлдэх болно. Өнгөрсөн намар Эрээн рүү явж судалгаа хийтэл хаалга, цонхны 30-40 үйлдвэртэй, зориулалтаасаа шалтгаалаад хаалга цонх нь 160-400 юанийн үнэтэй байсан. Хамгийн хямдхан нь /1м² нь 160 юань/ Монголын төрөөс зарлаж буй тендэрт зориулагдсан нь үнэхээр гайхмаар. Нэг бодлын Хятадуудын овсгоотойг магтмаар. Гэхдээ Монголд энэ чиглэлээр үйл ажиллагаа явуулдаг 300 гаруй аж ахуй нэгж байхад бодит байдал ийм байгаад харамсаж байна.

Төрөөс сургууль, цэцэрлэг, эмнэлгийн барилгын ажлуудад хамгийн их тендер зарладаг. Гэтэл хамгийн чанартай, аюулгүй, эрчим хүчний хэмнэлттэй цонхтой байх ёстой барилгын ажил нь хямд өртгөөр үйлдвэрлэгддэг, чанарын баталгаагүй бүтээгдэхүүнээр хийгдэж байгаад сэтгэл дундуур явдаг. Түүнчлэн дулаан алдагдал 40 хувьтай байгаа нь цаашлаад улсын төсвийн дулаанд зарцуулдаг зардал нэмэгдсээр л байна гэсэн үг. Хэрвээ дулаан алдагдалгүй цонх хийчихвэл тухайн үедээ өндөр өртөг гарсанч цаашдаа улсын төсвийг ихээхэн хэмнэх болно.

Бид хэд хэдэн сургууль дээр дулаан алдагдлын судалгаахийхэд хана, тааз, цонхоороо их хэмжээний дулаан алддаг гэж дүгнэлт гарсан.Үүний зөвхөн хаалга, цонхыг нь сайн чанарын дулаан алдагдалгүй цонхоор солиход л жилийн халаалтын зардал нь 30 хүртэл хувь хэмнэгдэх боломжтой байдаг.

Үнэ өртгөөс болж импорт байсаар байна гэж ярилаа. Импорт болон дотоодын үйлдвэрлэгч нарын бүтээгдэхүүн ньүнэ өртгийн ямар ялгаатай вэ?

 Хамгийн ихдээ 25 хувийн ялгаа бий. Шилний үйлдвэргүй учраас импортоор шилээ оруулж ирдэг. Тээвэр, татвар, НӨАТ зэргийг тооцоход БНХАУ- тай үнийн хувьд өрсөлдөх боломжгүй байна. Гэхдээ үйлдвэрлэх цаг хугацаа, загвар шийдлээрээ өрсөлддөг. Сүүлийн 2-3 жилд ихээхэн ажиглагдаж байгаа зүйл бол шилэн барилгуудын шил нь хагарч, алаг эрээн харагдах болсон явдал. Энэ нь урд, хойд хөрш улсад үйлдвэрлэсэн шилэн багцыг ашигласаны үрдүнгээс үүсэж байгаа асуудал юм. Тодруулбал, БНХАУ нь далайн төвшнөөс дунджаар 400 метр өндөрт байрладаг. Гэтэл Монгол 1400 метрийн өндөрт байна. Энэ их өндрийн ялгаанаас үүсэх даралт, эрс тэс уур амьсгал, температурын өөрчлөлтийг даахгүй шилэн багцууд хагарчихдаг. Үүнийг засах боломжтой ч ижил шилийг Хятадад цөөн тоогоор үйлдвэрлэдэггүй учраас адил төстэй өнгө, хийцтэйг нь олж нөхөж байна. Харин дотоодын үйлдвэрлэгч нар зөөвөрлөлт, ашиглалтын явцад эвдрэл гарсан ч яг адилхан шилийг цөөн тоогоор ч үйлдвэрлэх боломжтой нь давуу тал болж байна. Мөн Монголын цаг агаар, уур амьсгалд тохируулан үйлдвэрлэж байгаа учраас чанар, эдэлгээний хувьд ч урт насжилттай байх бүрэн боломж бий.

Бид дэлхий нийтэд нийтлэг байгаа технологиудыг бүгдийг нь ашиглаж байна. Тиймээс танай компани ямар ямар шинэтехнологиудыг салбартаа нэвтрүүлээд байгаа вэ?

Манай компанийн үнэт зүйлсийн нэг бол Шинэ дэвшилтэд техник, технологи бүрийг үйл ажиллагаандаа тасралтгүй нэвтрүүлэх явдал билээ. Тэр ч утгаараа хатжуулсан шил, олон үет шил, будагтай шил, бүх төрлийн хэлбэртэй шилний боловсруулалт, матсан шил, шил, толин дээр ховил гаргах, бүх төрлийн шилэн багцын үйлдвэрлэлийн бүрэн автоматжуулсан тоног төхөөрөмжүүдийг ашиглаж байна.  

Сүүлийн үед шилэн барилгууднэмэгдэж, Low - E шилэн багцыг өргөн хэрэглэх болсон байна?

Low - E шил нь дэлхий дахинд эрчим хүчний хэмнэлттэй шилгэдгээрээ өргөн хэрэглэгддэг. Үүний гол зарчим нь шилэн дээр түрхлэг түрхэж,нарны хэт ягаан туяаг нэвтрүүлэхгүйгээр буцааж ойлгох үйл явц юм. Мөн хүйтний улиралд барилгын дотор дулааныг гадагш дамжуулахгүй буцааж ойлгодог шилний түрхлэг юм. Энэ нь дотроо ялгаатай бөгөөд зөөлөн болон хатуу түрхлэгтэй гэж хоёр хувааж үздэг. Зөөлөн гэдэг нь энгийнээртайлбарлавал олонтөрлийн бодисыг хольж, тусгай нарийн шүршигч машинаар шүршин, нимгэн давхарга үүсгэхийг хэлдэг. Энэхүү түрхлэг нь 3-5 жилийн дотор нарны хэт ягаан туяанд ууршаад жирийн шил болдог сул талтай.

Харин хатуу түрхлэг гэдэг нь шилний зуухнаас дөнгөж гарч ирсэн халуун шилэн дээр бодисоо шүршиж хатаадаг процесс юм. Энэ технологийн онцлог нь  түрхлэгийн ууршилт огт явагдаггүй бөгөөд эрчим хүчний хэмнэлт урт удаан хугацаанд явагдана гэсэн үг юм. Тэгэхээр эдэлгээний хувьд ийм ялгаатай байдаг ба үнийн хувьд ч өөр байдаг.

Түрхлэг нь ууршаад энгийн болчихсон шилэнд дахиад бодисоо цацаж болох уу?

Түрхлэгийг сэргээх боломжгүй. Тиймээс сонголт хийхдээ л анхаарах хэрэгтэй. Low-E шилтэй бол супер гэсэн ойлголт өргөн байна. Гэхдээ түрүүн ярьсанчлан зөөлөн, хатуу түрхлэг, аргон эсвэл криптон хийтэй юу гэдгээсээ шалтгаалан дотроо ялгаатай. Ихэнх хүмүүс Low - E шил, аргон хийтэй байхад л төгс гэж бодох нь бий. Уг нь криптон хийтэй бол тухайн шилний эффект буюу нарнаас хамгаалах чадвар нь 7-8 хувь нэмэгдэхээс гадна аргон хийнээс илүү удаан ууршдаг давуу талтай. Гэвч манай оронд одоогоор криптон хийг ашиглах боломж бүрдээгүй байна. Урт удаан хугацаанд ашиглахыг хүсэж байгаа бол хатуу түрхлэгтэй, аргон хийтэй байхаар сонгох нь зөв гэж хэлмээр байна. 

ЦАНТАХ НЬ ЦОНХНООС БИШ ДОТОР ЧИЙГЭЭС БОЛЖ ҮҮСДЭГ

 Одоо цонх үйлдвэрлэлийн зах зээл ханачихсан юм болов уу. Ер нь хэр ашигтай бизнес вэ? Магадгүй шинээр энэ салбарт ажиллах гэж байгаа хүмүүст хэрэгтэй мэдээлэл болох байх?

Цонх, хаалганы зах зээл ханасан гэж би хувьдаа хардаг. Бизнес гэдэг ашигтай байх ёстой.  Гэтэл зарим хүмүүс бусдын ашигтай ажиллаж байгааг хараад дуурайх нь бий. Өөрөөр хэлбэл өөрийн гэсэн философи, үзэл баримтлалгүйгээр аливаа бизнесийг эхлэх нь ирээдүйд “шатах” “дампуурах” үр дагаврыг дагуулдаг. Тиймээс бизнес эхлүүлэх гэж байгаа бол зах зээлээ судал,  шинжилгээ тандалт хийх хэрэгтэй гэж хэлмээр байна. Манай барилгын гүйцэтгэгч байгууллагууд өртгөө бууруулахын тулд нэг төсөлдөө зориулаад хаалга, цонхны цех бий болгох тохиолдол байдаг. Энэ нь өртөг буурч байгаа боловч тухайн цонхны чанарын стандарт ихээр зөрчигдөж байдаг. Цаашлаад энэ нь тухайн барилгын ашиглалтын зардлыг нэмэгдүүлж байдаг сөрөг талтай.  Хоёр давхар шил, хуванцар рам  байвал манайхны нэрлэдгээр “вакум” цонх бий болно гэж боддог. Гэтэл Монголд “вакум” цонх үйлдвэрлэдэг нэг ч үйлдвэр байхгүй. Энэ нь бид буруу нэршдэг болоод удаж байна гэсэн үг. Буруу нэршлээс үүдэн гадны зочид, гийчид манай улсыг вакум цонх хийдэг юм уу гэж их гайхдаг шүү.

Нэгэнт энэ талаар ярьсных зөв нэршил, “вакум” гэж яг ямар цонхыг хэлдэг тухай товч тайлбарлавал?

Хоёр шилний хооронд 99,9 хувь буюу ямар ч агааргүй орчныг бий болгосныг вакум шилэн багц гэж нэрлэнэ. Үүний зөв нэршил нь хуванцар рамтай ВАКУМ ШИЛЭН БАГЦТАЙ ЦОНХ юм. Энэ чиглэлээр үйл ажиллагаа явуулдаг томоохон үйлдвэр Хятад улсад 3, Японд 1, Европд 1 байдаг бөгөөд маш нарийн технологитой, өндөр өртгөөр үйлдвэрлэгддэг бүтээгдэхүүн юм.Вакум шилэн багц нь дуу чимээг 100% тусгаарлаж, дулаан хадгалалт нь бусад цонхыг бодвол хэд дахин илүү байдаг гэдгээрээ онцлог давуу талтай.   

Хаалга, цонхыг дулаан алдагдалгүй болгохоор ердийн агаар сэлгэлтийн хууль үйлчлэхгүй болж байна. Энэ нь цантах, хөлрөх зэрэг асуудлыг үүсгэдэг үү? Шалтгаан нь юу байна?

 Цонх, хаалга үйлдвэрлэгчдийн дундах нэг маргаантай асуудал бол чийгшилт юм. Цаг агаар хүйтэн үед цонх цантаад, ус гүйж, хөлрөх цаашлаад мөс болох зэрэгасуудлууд үүсдэг. Энэ нь цонхноос биш тухайн барилгын агааржуулалт, дотоод чийгээс болж бий болдог. Өөрөөр хэлбэл таны амьдарч байгаа байрны чийг нь байх ёстойгоосоо давсан бол цонх чинь цантана гэсэн үг. Ялангуяа энэ үзэгдэл хавар барьж эхлээд, намар нь битүүрч байгаа барилгад дотоод чийг ихтэй учраас ихээхэн ажиглагддаг. Харин жил дамнаж баригдсан байруудад харьцангуй бага байдаг.  

Танай үйл ажиллагаа, зорилгоос харахад таныг “хүн төвтэй” ажилладаг юм уу гэж бодлоо. Хүний нөөцөө тогтвортой байлгахын тулд таны зүгээс ямар үзэл баримтлалтай ажилладаг вэ?

Япончууд үйлдвэрлэлтээрээ дэлхийд тэргүүлэгч байдаг нууц нь ердөө 5S менежмент буюу тасралтгүй сайжруулалт юм. Манай компани мөн адил 5S менежментийг үйл ажиллагаандаа эрчимтэй хэрэгжүүлж, үршимээ хүртсээр байгаа бөгөөд ажилтнуудаа тогтмол сургалт, мэдээллээр хангаж тэднийхээ гэрэлт ирээдүйн төлөө хамтдаа хөгжсөөр байна. Манай шилний салбарын эрэлтэд нийцсэн мэргэжлийн боловсон хүчинг бэлтгэдэг боловсролын систем Монголд одоогоор байдаггүй. Тиймээс бид “Шилчин” болон “Хаалга цонхны тоног төхөөрөмжийн оператор” зэрэг мэргэжилд ажилтнуудаа сургаж, бэлтгэдэг сургалтын баазтай ба онолын хичээл, практик дадлага, хөдөлмөрийн аюулгүй байдал, багийн ажиллагаа, ёс суртахууны сургалтуудад хамруулж зохих шалгалтыг авч мэргэжлийн үнэмлэх олгодог. Ингэж байгууллагын соёл, тусгай арга барилд сургасан хүнээ аль болохон удаан жил ажиллах нөхцөлийг бүрдүүлж, дэмжиж ажиллахыг хичээдэг. Мөн орон байраар хангах, ур чадварын зэрэг олгож урамшуулдаг. Зэрэг авахын тулд шалгалт өгч, тухайн ажилтан өөрийн ур чадвараар цалингаа нэмэгдүүлдэг гэсэн үг.  Түүнчлэн шинэ ажилтныг дадлагажуулж сайн шавь бэлдсэн багшийг нь ч давхар урамшуулдаг системтэй.

Ажилтнуудынхаа дунд урлаг, спортын тэмцээн, өвөл, зуны аялалыг тогтмол зохион байгуулдаг төдийгүй Япон, Бээжин, Хөх хот, Манжуур, Улан-Үдэ гэх мэт ойрын улс орнуудаар хамт олноороо аялсан байна. Компанийн энэ соёлууд нь тэднийг урам зоригтойгоор ажиллахад түлхэц болдог гэж боддог. Олвол олуулаа хуваанаа гэж үргэлж ажилтнууддаа хэлдэг. Тэд сайн ажилласан бол үр шимийг нь хүртэх ёстой.

2018 онд Олон улсын Чанарын удирдлагын тогтолцоо буюу ISO 9001:2015, ХЭМАБ-ын удирдлагын тогтолцоо буюу ISO 45001:2018 стандартуудыг нэгдмэл байдлаар үйл ажиллагаандаа нэвтрүүлж Олон улсын баталгаажуулалтын аудитад өндөр үнэлгээтэй тэнцсэн нь мөн л салбартаа анхдагч байсан. Өнөөдөр манай залуучууд олон улсын стандартын шаардлагын дагуу эрүүл, аюулгүй ажлын байранд чанарын өндөр хяналтан дор бүтээгдэхүүн үйлдвэрлэлийн үйл ажиллагаагаа явуулж байна.   

Танай компани 18 жилийн турш өргөжин тэлж, өнөөдрийн өндөрлөгт хүрсэн ноу-хау юу гэж боддог вэ? 

Бид салбартаа тэргүүлэгч, хөгжлийг чиглүүлэгч, ололт амжилтаа бусаддаа хуваалцсан үлгэр жишээ компани байя гэсэн зорилготой ажилладаг. Тийм ч учраас үйлдвэрлэлдээ байнга шинэ технологийг нэвтрүүлж, шинэчилж, сайжруулалтыг тогтмол хийдэг нь чухал нөлөө үзүүлсэн. Миний хувьд олон улсын шилтэй холбоотой үзэсгэлэнгүүдийг  алдалгүй үздэг. Түүнээс хөгжлийн гарцаа харж, бид аль шатанд явж байна, дараагийн технологийг нэвтрүүлэхэд бэлэн үүгэдгээ тодорхойлж чаддаг. 

Мөн салбарынхандаа нээлттэй ажилладаг. Та бүхэн ISO стандартыг хэрхэн нэвтрүүлсэн, 5S менежментийг хэрхэн хэрэгжүүлдэг, ямар тоног төхөөрөмжөөр,хэрхэн үйлдвэрлэл явагддаг гэдгийг  үзэж,сонирхох бүрэн боломжтой. 

Таныг армийн хүн гэж сонссон. Буудлагын спортоор олон улсад ч нэрээ гаргасан байна. Энэ талаараа уншигчдад сонирхуулбал?

Би ерөнхий цэргийн офицер хүн. Миний анхны мэргэжил бол явган байлдааны машины (БМП-1) ашиглалтын инженер. Зүүн-баянд алба хааж, халагдсан. Гэхдээ галт зэвсгийн хоббигоо хаяагүй буудлагын спортоор хичээллэсээр л байгаа. Одоо Монголын практик буудлагын холбооны гишүүн. Өнгөрсөн жил Шведэд болсон дэлхийн аваргын  тэмцээнээс мөнгөн медаль хүртсэн. Манай буудагч нар Азийн аваргаас мөнгө, хүрэл медаль, Москвад болсон дэлхийн аваргаас эрэгтэй, эмэгтэй баг хоёулаа хүрэл медаль авсан. Энэ спортоор Монголчууд дэлхийд нэртэй яваа гэж хэлмээр байна.

Ярилцлагынхаа төгсгөлд цаашдын зорилго, компанийнхаа хөгжлийг хэрхэн харж байна вэ?

Шинэ зүйл эхлүүлэх гэхээсээ илүү одоо байгаа зүйлээ төгөлдөржүүлэх нь хамгийн чухал гэж бодож байна. Тийм ч учраас бид тун удахгүй шилэн багцын зах зээлд хамгийн сүүлийн үеийн техник технологийг ашигласан, чанарын баталгаатай, хямд үнэтэй, хэмнэлттэй бүтээгдэхүүнээ сонирхогч талууддаа санал болгох болно. Үргэлж хамтран ажилладаг хэрэглэгч нартаа, мөн сайн туршлагыг бусдад түгээж буй танай хамт олонд баярлалаа.