Гэр бүл, үр хүүхдүүдтэйгээ зусланд гарч зуны нарлаг дулаахан өдрүүдийг зугаатай өнгөрөөж байна уу. Ихэнх хүний хувьд зуслангийн газрыг зөвхөн ногоон тохижилтоор төсөөлдөг.  Бие махбодид ашиг тустай эрүүл амрах,  үр хүүхдүүдээ эрүүл чийрэг өсгөхийн тулд бидэнд спортын талбай хэрэгтэй. Мэдээжийн хэрэг, хүн бүхэн өөрийн үзэмжээр спортыг сонгодог бөгөөд сагсан бөмбөгийн талбайг өөрсдийн гараар хийхэд нэг их хүчин чармайлт, цаг хугацаа шаардахгүй. Тэр дундаа сүүлийн үед залуучуудын их сонирхож байгаа 3х3 сагсны талбайг байгуулаад хүүхдүүдтэйгээ тоглохыг хүсч байна уу.

3х3 сагсан бөмбөгийн тухай

FIBA-гийн дүрмийн дагуу тоглож буй 3х3 сагсан бөмбөгийн талбайн хэмжээ нь хажуугийн шугамуудын хооронд 15 м, урт нь 11 м байдаг. Сагсан бөмбөг 3х3-т холын зайн шидэлт хийх шугам нь хажуу талаас 75 см зайтай, нумын радиус нь 6.75 м. Гурван секундын бүс нь 5.80-аас 4.90-ийн хэмжээтэй тэгш өнцөгт хэлбэртэй байна. 

Ердийн сагсан бөмбөгөөс ялгаатай хамгийн том онцлог нь нэг самбарт тоглодог. Стандарт талбайн талыг аваад (5×5 сагсан бөмбөгт 15×28 метр) хурд, өрсөлдөөнийг нэмэхийн тулд богиносгосон.

Бас нэгэн онцлог нь ойр, дундын зайнаас хийсэн гоол нэг оноо авдаг. Харин холын зай буюу 6,75 метрийн радиустай шугамны гаднаас  оруулахад ердөө хоёр оноотой. Том сагсан бөмбөгт гурван онооны шидэлт гэж ярьдаг бол энд холын шидэлт нь хоёр оноотой. Энэ бол маш том ялгаа юм. Учир нь том сагсан бөмбөгт холын зайн оноо жирийн гоолоос 1.5 дахин л их байгаа бол 3×3 төрөлд хоёр дахин их байгаа нь холоос оноо түүн, хөөн гүйцэх боломж олгодог.

Бөмбөг нь ч өвөрмөц, нэгдүгээрт хэлбэр нь өөр. хоёрдугаарт бага зэрэг жижиг. Өөрөөр хэлбэл их сагсан бөмбөгийн эмэгтэйчүүдийн тоглодог бөмбөгний хэмжээтэй. 

 FIBA 3x3 дүрэм:

-       Багт 4 тоглогч байх ба талбайд 3 нь гарна

Тоглолт эхлэх:

-Тоглолт эхлэхийн өмнө зоос шидэж, хэн нь бөмбөгөө авахыг шийднэ

-Тоглолт эхлэхэд бөмбөгийг тоглолтонд оруулах багийн тоглогч өрсөлдөгчдөө бөмбөгийг өгч "CHECK" хийлгэх ба буцааж бөмбөг авсаны дараа шууд залж эсвэл дамжуулсанаар тоглолт эхэлнэ

Тоглолтын оноо:

-Тойрог дотроос амжилттай довтолвол 1 оноо

-Тойргийн гаднаас амжилттай довтолвол 2 оноо

-Чөлөөт шидэлт бүр 1 оноо

-Түрүүлж 21 оноонд хүрсэн баг нь хожно

Тоглолтын хугацаа:

-Тоглолтын хугацаа 10 минут ба цаг дуусахад илүү оноотой баг нь хожно. Чөлөөт шидэлт, завсарлага захиалсан үед цаг зогсоно. 

-Хэрэв оноо тэнцсэн тохиолдолд нэмэлт үе гаргах ба түрүүлж 2 оноо авсан баг хожно (ямар ч байдлаар түрүүлж 2 оноо авна)

Сагсан бөмбөгийн талбайгаа хаана байрлуулах вэ?

Спортын талбай байнга ашиглалттай, бөмбөгөөр тоглоно гэдгийг тооцож талбайг сонгож авахдаа хариуцлагатай хандах хэрэгтэй. Байшин, цэцэрлэгээс хол зайд байрлуулах, усны ойролцоо, налуу нам дор, хөрс, газрын доорхи усны түвшин өндөр газарт сагсан бөмбөгийн талбайг байрлуулж болохгүй.

Бэлтгэл ажлууд:

Сагсны талбайг хэмжээд, орох материалуудаа жагсаагаад үнийн судалгаа хийж ойролцоо төсвөө хийнэ. Сагсны бэлэн шит авбал ажил хөнгөвчлөгдөж цаг хугацаа хэмнэнэ. Зах зээлд модон, шилэн болон хуванцар (тунгалаг) самбартай, бөмбөгний ойлт стандарт, ус чийгний хамгаалалттай хавтантай, төмөр листэн хамгаалалттай шитүүд байдаг. Самбарууд бүгд тохиргоо хийдэг татуургатай. Шон нь урт болон богино хүзүүтэй сонголттой сагсны шитийг 320,000-650,000 төгрөгөөр зарж байна. Бэлэн шит авбал бидэнд талбайгаа бэлдэх ажил үлдэнэ. 

Талбайгаа бэлтгэх дараалал:

1.Хөрс хуулах 

Хөрс хуулалтын ажилд 30-40 см орчим газар ухах шаардлагатай. Эхлээд ургамлын давхаргыг, дараа нь хөрсний давхаргыг хуулна. Үндсэн бүрхүүл үе тавихаас өмнө ус зайлуулах суваг хийж өгөх шаардлагатай.

2.Талбайг тэгшлэх

 0-5 мм ширхэглэлтэй хайрга асгаж талбайг 10см зузаантай нягтруулан тэгшилгээ хийнэ.

3.Шигшсэн элсээр 5см элсэн дэвсгэр тавьж нягтруулна.

4.Сагсны шит зоох 

Тухайн газарт тохирсон хэмжээний бэлэн хөлтэй самбарыг суурилуулж өгнө. Хөдөлгөөнгүй бэхлэх хэрэгтэй, нүх ухаж шонг суулгаж, хайргаар чигжззд цементэн зуурмагаар цутгана.

5.М250 маркийн бетон тэгшилгээ хийх 

М250 маркийн бетон зуурмагт 

              Элс-0,373м3

              Хайрга-0,336м3

              Цемент-327кг

              Ус-183л орчим орно. 

Тэгшилгээний бетон зуурмагийн тооцоог хийхдээ талбайн урт, өргөн, өндрийн харьцаа хэрэгтэй. 

Жишээ нь:  5х6 м-ийн харьцаатай 0.25 м-ийн өндөртэй гэж тооцоход 6м3 бетон зуурч хэрэглэнэ гэж тооцно.

6.Бэлэн болсон талбайд хэмжээ зурвасуудыг резинэн будгаар тавьж өгвөл гулгахгүй. Ингээд сагсны талбай бэлэн болно. 

О.Хишигмөнх Барилгачин групп, Инженер 

Барилгачин групптэй холбогдох бол ЭНД дарна уу.