Бид интерьерийн шийдлийг гадны оронд хийгдсэн гоё зурагнаас л хардаг цаг ард хоцорч, Монголын интерьер дизайнеруудын урчадвар өсөж, тав тухтай, тансаг орчинд амьдрах боломж хүн бүрийн өмнө бүрдсэн байна. Тиймээс Монголынхоо интерьерийн компаниудын дотооддоо хийсэн айл өрхийн, амины орон сууц, хаус, орон сууцанд хийж гүйцэтгэсэн интерьерийн шийдлүүдийг цувралаар хүргэж байна. Энэ удаагийн дугаартаа “Eden design” ХХК-ийн хийж гүйцэтгэсэн Япон захиалагчтай тансаг зэрэглэлийн “Ambassador Residence”- ийн 149м2 орон сууцад хийсэн интерьерийн шийдлийг онцоллоо.

Интерьерийг минималист буюу эмх цэгцтэй шийдлийг “ХҮН ТӨВТ” шийдэлтэй хослуулсан байна. Минимал интерьерийн гол тодорхойлох зүйл бол их гэрэл, цөөн өнгө, энгийн шийдлээр эрүүл, таатайгаар гэр бүлийн бүхий л хэрэгцээг хангахуйц байх шаардлагатай байдаг. Монгол хүний ахуйн хэрэглээний өнгө төрхийг шингээж өгсөн ба уужим цэлгэр зочны өрөө, таазнаас шал хүрсэн өндөр цонх, сүлэлдүүлэн урласан царс модон шал, дулаан уур амьсгал бүрдүүлэх ханын өнгө зэргийг “ХҮН ТӨВТ”-шийдлийн үндсэн шаардлагад нийцүүлэн төлөвлөжээ.

Зочны өрөө \42.66мк\

Зочны өрөөнд гэр бүлтэйгээ хамт ихэнх цагаа өнгөрүүлдэг учраас халуун дулаан, тав тухтай, амар тайван орчныг бүрдүүлэхийг зорьсон. Эрт дээр үеэс эхлэн бид байгальтайгаа хүйн холбоотой учир амьд ургамал, завсрын өнгөнүүд, байгалийн гэрлийн тусгалыг их орохоор төлөвлөж өгснөөр эерэг уур амьсгал бий болох юм.

Өнгөний шийдлийн хувьд улбар шар өнгө нь Монгол хүний өөдрөг сэтгэхүйтэй сайн зохицдогоос гадна айл гэрт аз жаргалтай дулаан сэтгэгдэл төрүүлдэг учраас акцент болгож оруулсан байна. Хар өнгө нь өөрөө хүчирхэг завсрын өнгөнд ордог тул бага зэрэг ашигласнаар интерьерийг илүү гүн гүнзгий дотно уур амьсгалтай болгодог.

Эмх цэгцтэй цөөн эд хогшилтой байх тусам хүн илүү тайван баяр хөөртэй амьдрах орон зай бүрдэж, амьдралын хэв маяг ч бас даган өөрчлөгдөж байдаг. Иймээс аль болох зөвхөн өөрт аз жаргал төрүүлдэг эд зүйлсээр хүрээлүүлснээр бидний өдөр тутмын амьдралд эерэг өөрчлөлтийг авчран илүү ухамсартай болгодог.

Гал тогоо \11.93 мк\

Гал тогоо нь хоол хүнсний "үйлдвэрлэл" явагдаж байдаг бидний амьдралын халуун дулаан уур амьсгалыг бүрдүүлэгч чухал орон зай билээ. Тэр ч утгаараа гал тогооны өрөөг айл гэрийн зүрх гэдэг. 

Гал тогооны өрөөг эзэгтэйд зориулан эмх цэгцтэй байлгах зорилгоор том шүүгээнүүд болон агуулах өрөөтэй шийдсэн. Зочны өрөөний хэсэгтэй уялдуулан хар саарал өнгийг цагаан гантиг чулуутай хослуулсан.  Мөн дарсны тавиурын хэсэгт цэвэр модны оруулга оруулж өгснөөр илүү эко, зөөлөн дулаан мэдрэмжийг төрүүлэх юм. 

Гэр бүлээрээ сууж хооллох ширээнээс гадна өдөр тутамдаа текэн дээрээ хооллох, өглөөний цайгаа уух боломжтой ба хоол хийхдээ ч хоорондоо харилцан чөлөөт орчныг бүрдүүлж өгөхийг зорьсон.

Мастер буюу гэрийн эздийн унтлагын өрөө \4.30мк\

Хүн амьдралдаа эрч хүч авахын тулд тав тухтай, бат бөх унтаж амрах хэрэгтэй байдаг. Тухтай амрахад гол нөлөө үзүүлдэг чухал зүйл нь мэдээж унтлагын өрөө юм.

Мастер унтлагын өрөөг завсрын өнгөөр шийдэж, тархийг амраах зорилгоор минимал байхаар төлөвлөжээ. Шалнаасаа тааз хүртэлх том цонхтой учир байгалийн гэрэл их тусч, дулаан уур амьсгал бүрддэг. 

Хүүхдийн өрөө \11.71мк\

Хүүхдийн өрөө бол түүний тоглож, сурч, хөгжих орчин нь болдог. Хүүхдээ өрөөнийх нь  интерьерээр дамжуулан хүмүүжүүлэх нь маш үр дүнтэй. Интерьерийн зөв шийдлээр тохижуулж, багаас нь эмх цэгцтэй амьдралын хэв маягт ч сургах боломжтой юм.

 Хувцасны 3.05мк хэмжээтэй өрөөг хүүхэд ашиглахад амар байдлаар шийдэж өгсөн. Шар өнгийг акцент болгож оруулсанаар илүү сонирхолтой, баяр хөөртэй эерэг орчинг бүрдүүлж байгаа юм.

Ажлын өрөө \15.36мк\

Бид хоногт 8 цагийг ажлын оффистоо өнгөрүүлдэг ч зарим тохиолдолд гэртээ ажлынхаа ямар нэгэн зүйлийг хийх шаардлага гардаг шүү дээ. Гэртээ байсан ч ажлын бүтээмжээ алдахгүй, тав тухтай орчинд,  үр бүтээлтэй ажиллах орчинг бүрдүүлэхийг зорьсон. 

Номын шүүгээг хананд суурилуулсанаар илүү багтаамжтай зай талбайн хэмжээг хэмнэж байгаа юм. Орон зайтай цэлгэр харагдуулах зорилгоор арын хэсгийг тольтой шийдсэн.

Угаалгын өрөө \4.30мк\

Гэр  бүлийн хамгийн цэвэр цэмцгэр байх ёстой хэсэгбол мэдээж ариун цэврийн өрөө юм.

 Тус өрөө нь эмх замбараагүй байх нь тав тухыг алдагдуулдаг учир эмх цэгцтэй байлгахын тулд эд зүйлс болон ариун цэврийн бүтээгдэхүүн, ахуйн хэрэглээний зүйлсийг хийх шүүгээ, тавиуруудыг  хангалттай байхаар төлөвлөж шийдсэн.  

Мөн эдгээр тавилгыг гантиг чулууг царс модтой хослуулан хийж, дулаан цэмцгэр орчинг бүрдүүлсэн. 

Гэрийнхээ интерьерийг хүссэндээ хүртэл маш сайхан болгох хүсэл хүн бүрт байдаг. Гэхдээ хаанаас эхлэх, ямар дизайнтай байхыг хараахан төлөвлөж чадахгүй, гадны интерьерийн зургуудаас санаа авсан ч бодит байдал дээр хэрэгжүүлж чадахгүй зэрэг олон асуудлуудтай тулгарч байдаг. Тэгвэл хамгийн зөв интерьерийн шийдлийг Монголынхоо мэргэжлийн интерьерийн компаниудаас зөвлөгөө аван хийлгэвэл сэтгүүл дээрээс хардаг тохилог, саруулхан, тав тухтай гэрийг бий болгоход  тийм ч холын мөрөөдөл биш болжээ.