Хулгана жилдээ өрөө тасалгаандаа эерэг энерги нэмээрэй
Шинэ оны эхний саруудыг зохион байгуулалт, төлөвлөлтийн сар гэдэг. Энэ саруудад орон байрны Фэнг-шүйгийн тусламжтай гэрээ энергижүүлэхэд хамгийн тохиромжтой юм. Өрөө тасалгаагаа төлөвлөх, тавилгынхаа байршлыг өөрчлөхдөө үргэлж эерэг энергитэй байлгахыг хүсдэг гэрийн эзэн, эзэгтэй нарт тус болж, “Фенг шүй”-г дагаж мөрдөх нь ямар ашиг тустай талаарх мэдээллийг хүргэж байна.
Юуны өмнө Фэнг Шүйн талаар товч ойлголтыг хүргэе. Фенг шүй бол амьдрах ухаан юм. Тиймээс амьдралын хар ухаан, шинжлэх ухаан, шашин шүтлэг, гүн ухаан, анагаах ухаан гээд олон зүйлийг судлах хэрэгтэй болдог. Улс орон болгоны газар зүйн байршил, хүн амын нягтаршил, шашин шүтлэг, ёс заншлаас хамаарч тив бүрийн Фэнг Шүй өөр байдаг. Ази тив тэр дундаа Япон, Солонгос, Тайланд, Сингапур, Малайз, Хятад зэрэг улсууд гар үйлдвэр, суурин иргэншил их хөгжсөн учир Фенг Шүйн бэлэгдлийн ухаан буюу зэмсэг талаас нь хөгжүүлсэн байдаг. Жишээлбэл салхин хонх, зоос, мэлхий гэх мэт. Харин Европт тэр чигээрээ зөв байршлын Фэнг Шүй буюу барилга байшин, архитекторын Фэнг Шүйхөгжсөн байдаг. Тиймээс тэд эдлэн газарт амьдардаг, эцэг эхийн өрөө, хүүхдийн өрөө, зочны өрөө, гэрийн үйлчлэгчийн өрөө гэх мэт бүх өрөөг тусад нь хийдэг. Усан оргилуурыг хаана хийвэл хэдэн үеэрээ идэх үүсэх үү, цэцэрлэгт хүрээлэнгээ зөв газар баривал өөрийнх нь удмын нэр хүнд өснө гэж үздэг. Тэр утгаараа сонгодог уран зураг, барилга байшин тэнд л хөгжсөн. Европчууд усан онгоцоор АНУ, Австрали, Шинэ Зеландыг эзэлж тэнд суурин иргэншлийн Фэнг Шүйг үүсгэсэн байна. Хятадууд Фэнг Шүйг Юнеско-д "Манай соёлын өв" гэж бүртгүүлсэн учир арга билэг буюу орчлон ертөнцтэй зохицож амьдрах ухаан нь олон улсад Фэнг Шүй гэдэг нэрээрээ алдаршсан. Харин Монгол улсын хувьд хорио цээр талаас нь тайлбарласан байдаг. Явган сууж хоол бүү ид, ширээ битгий өнцөгдөж суу, сэтэрхий аяганд цай битгий уу гэх мэт. Шаазгай гэрийн гадаа шагширхаар зочин ирэх нь, улаан хошуут дуугарахаар хол ойрын мэдээ дуулах нь гэх зэрэг.
Фенг шүйн нууцаар өрөө тасалгаандаа цоо шинэхэн тохижилт хийж энергийг цуглуулаарай.
Зочны өрөө буюу бидний хэлж заншсанаар том өрөө нь Фэнг Шүйн хувьд гэрийн энергийг хүлээн авагч гол хэсэг гэж үздэг. Тийм болохоор бид энэ өрөөнд өөрт хэрэгтэй байгаа бүхий л энергийг нөхөн авч үлдээж байдаг байна. Гэрийн эзэд энэ өрөөнд яавал илүү тав тухтай байх вэ гэдгээ сайн бодож байх ёстой. Хамгийн түрүүнд огт хэрэглэдэггүй зүйлс болох хуучин хөгжим, ашигладаггүй гэрийн театр, уншдаггүй DVD тоглуулагч, байнга тоос дараастай байдаг тийм зүйлсийг өрөөнөөсөө гаргаж хаяарай. Энэ нь таны ажлыг зогсонги байдалд оруулж, ямар нэгэн саад тотгорыг дуудаж байдаг. Материал нь муудаж сэмэрсэн хөшиг, хэрэглэдэггүй хуучин хивс, диваны бүтээлэг, толгой халаад удаан сууж болдоггүй буйдан, шатсан гэрэл, бүүдгэр орчин, жижигхэн санжганасан сэтгүүлийн ширээ гээд хуучирсан зүйлс зочны өрөөнд тохиромжгүй юм. Ийм учраас байнгын шинэчлэлт хийж гэр бүлийнхээ хэрэгцээг мэдэрч, хэрэггүй зүйлсээ хаяж, гэрээ тохижуулах талаар бодох хэрэгтэй. Боломжтой болохоороо тохижуулна гэж хойшлуулах тусам сөрөг энерги удаан байсаар л байх болно. Өөрчлөлт шинэчлэлтэд үргэлж бэлэн байх хэрэгтэй. Зочны өрөөгөө өөрийн сэтгэлд нийцүүлэн тохижуулснаар илүү гайхалтай амжилт, өсөлттэй ашиг орлогыг бүтээх боломжтой юм шүү.
Зочны өрөө тохижуулалтын хамгийн чухал хэсэг
Гэр бүлийн зураг: Мэдээж бүгд инээж гурвалжин, пирамид хэлбэртэй зогссон байх. Мөн эмэгтэйчүүд чихэндээ гоёл чимэглэлээ зүүж, бүгд аз жаргалтай байх үеийн зураг зочны өрөөнд байх ёстой зүйлүүдийн нэгдүгээрт тавигдаж байна.
Буйдан: Наалдаж хөлөрдөггүй, зөөлөн бөгөөд биед эвтэйхэн, хэвтэж болдог, хэт өндөр болон намхан биш, хэт хүнд болон хөнгөн ч биш дунд зэргийн хэмжээтэй байх хэрэгтэй.
Хивс: Хэт нүсэр, хурц тод өнгөтэй байж болохгүй. Цулгуй цайвар өнгөтэй, ямар нэгэн араатан амьтны зураггүй байвал зохистой. Харин уран хээтэй байвал бүр тааламжтай.
Гэрэл: Хөлтэй босоо нэмэлт гэрлийг зочны өрөөндөө заавал байрлуулаарай. Гоёмсог гэрэл байх нь айл гэрийн уур амьсгалыг зөөллөж өгдөг.
Чихрийн таваг: Төрөл бүрийн амттан хийсэн тавгийг зочны өрөөний ширээн дээр байнга байлгаарай. Ямар нэгэн юм идэх зүйл хийсэн таваг байх нь айл гэрийн эрүүл мэндийн энергийг хамгаалж өгдөг.
ГАЛ ТОГОО
Байгаль дэлхий дээр нар, сарыг энерги үүсгэгч гэж үздэг. Харин Фенг шүйд зааснаар орон гэрт гал тогооны өрөөг энерги үүсгэгч гэж үздэг юм. Иймд гэртээ ямар энерги үүсгэх нь гал тогооны өрөөндөө хэр зэрэг анхаарч байгаагаас хамаарна. Хамгийн түрүүнд гал тогооны агааржуулагч маш чухал. Эзэгтэй нар агааржуулалтын хоолойн хар тоос, бохир зүйлийг огт цэвэрлэдэггүй. Монгол гэрт амьдардаг айлууд ч гэсэн тооноо сайн цэвэрлэж арчдаг байх хэрэгтэй юм. Гал тогооны агаар сайн байх нь энергийн таатай урсгал гэрт бүрэлдэж байна гэж ойлгох хэрэгтэй. Зоогийн ширээний дээд таазанд хамгийн том бүрхүүлийг өлгөх нь ширээн дээрх хоол хүнсийг арвин тансаг болгоно хэмээн бэлэгшээдэг.
Анхаарах зүйлс:
- Маш цэвэрхэн, халуун зүйл барихад жийрэглэдэг бээлий байх ёстой. Загвар нь гоё бөгөөд сайн чанарынх. Энэ нь гэр бүлийн бүхий л боломжийг хамгаалан авч үлддэг. Санал болгоход мөөгний зурагтай болон цулгуй саарал өнгийн бээлий сонговол илүү тохиромжтой юм шүү.
- Халбага, сэрээний савыг болж өгвөл никель, ган төмөр сав сонгох нь зүйтэй.
- Гал тогоонд цаасан алчуур заавал байлгаарай. Энэ нь гал тогооны гал махбодыг нэмэгдүүлэхэд тустай.
- Нимгэн материалтай сав, нимгэн ширэмтэй будаа агшаагч, халуун тогоо гэх мэт нимгэн зүйл битгий хэрэглээрэй. Энэ нь гэр бүлийн хуурамч харилцааг үүсгэх сөрөг талтай.
- Хоол хүнсэндээ маш сайн чанарын тос хэрэглэх хэрэгтэй. Мөн тос цэвэрлэгч шингэн ашиглаж өдөр бүр плита, плитка болон ойр орчмын тос болон бохирдсон хэсгийг цэвэрлэж занших. Муу тос хэрэглэдэг, тосоо цэвэрлэдэггүй гал тогоотой айлын хөрөнгө санхүү хэзээ ч тогтвортой байдаггүй байна.
ХҮҮХДИЙН ӨРӨӨ
Бидний амьдралд өнгө нэмж, инээмсэглэл бэлэглэдэг үр хүүхдийнхээ амьдрах орчин хамгийн их анхаарах хэрэгтэй.
- Хүүхдийн өрөө сайн гэрэлтүүлэгтэй байх ёстой. Өрөөнд нь ямар нэгэн харанхуй булан байж болохгүй. Энэ нь өвчин ороодог.
- Өрөөний хананууд бүгд нэг өнгийн цулгуй цайвар өнгөтэй байх хэрэгтэй.
- Хүүхдийн өрөөг хэрхэвч чийгтэй байлгаж болохгүй.
- Хөдөлгөөнтэй цаг болон тоглоом байршуулж хөдөлгөөний энерги үүсгээрэй.
- Ил номын сан байрлуулах нь хичээл сурлаганд нь сайнаар нөлөөлдөг.
- Цонхтой өрөөг хүүхдийн өрөөгөөр сонгох хэрэгтэй юм шүү.
- Гар буу болон танк, сэлэм гэх мэт зэвсгийн шинжтэй тоглоомуудыг заавал далд газар хийж хадгалаарай.
- Хаалга цагаан эсвэл тод өнгөтэй байх нь хамгийн сайн хамгаалалт болдог гэж Фенг шүйд үздэг байна.
УНТЛАГЫН ӨРӨӨ
Хүн амьдралынхаа гуравны нэг хувийг унтаж өнгөрөөдөг. Тиймээс унтлагын өрөө тохилог байвал зохино. Мөн унтаж байгаа хүн маш эмзэг байдаг тул Фенг шүйд энэ өрөөг их анхаардаг. Унтлагын өрөө тэгш өнцөгт болон дөрвөлжин хэлбэртэй байвал тохиромжтой байдаг ба ийм хэлбэрийн өрөөнд сайн энерги чөлөөтэй нэвтэрдэг. Унтлагын өрөө ганц хаалгатай байхад л болно. Нарны гэрэл орон дээр шууд тусахаар байж болохгүй. Мөн ургамал цэцэг тавих шаардлагагүй. Унтлагын орны толгой хэсгийг цонхны доор байршуулж болохгүй. Орыг хаалгатай хөндлөн байрлалаар тавих нь Фенг шүйд тохиромжтой гэж үзнэ. Орон доогуур элдэв зүйл тавихгүй, чөлөөтэй байлгавал сайн энерги нэвтэрнэ. Энэ өрөөнд толь байх хэрэггүй, зайлшгүй шаардлагатай бол дугуй толь тавиарай. Ягаан, улаан хүрэн өнгийн ор болон бүтээлэг, хөшигтэй байж болно.Харин орны дэвсгэр даавуу цагаан байх хэрэгтэй. Хэзээ ч цэнхэр даавуу дэвсч болохгүй хэмээн Фэнг Шүйд үздэг байна. Мөн амьд цэцэг, ургамал байх ёсгүй. Харин анар жимс урт удаан хугацааны үржил хөгжлийн бэлгэдэл учраас унтлагын өрөөнд байхад маш сайн энерги үүсгэдэг. Усыг төлөөлсөн элдэв зүйл, нуур далайн зураг, аквариум, усан сан байлгах нь үл ойлголцол авчрахаас гадна унтахад хэцүү болгодог тул үүнийг цээрлэх хэрэгтэй.
ҮҮДНИЙ ХЭСЭГ
Үүдний хэсэг бол Фэнг шүйд онцгой цэвэрхэн байх ёстойг шаарддаг. Гэрэл гэгээтэй, ямар нэгэн овоолсон зүйлгүй байх. Том гутлын шүүгээ, шкаф, өргөн сандал, шалаар нэг хөглөрсөн гутал, хуучин шалны алчуур зэргийг байлгах нь таагүй юм. Мэдээж гутлын шүүгээ, том шкаф үүдэнд байх ёстой ч гол хаалга нь бат бөх, дотор талдаа зориулалтын гэрэл асдаг, эмх цэгцтэй байх ёстойг сануулаад байгаа юм шүү. Гутлын тавиур цэгцтэй, дотор нь шороо тоостой гутлыг шүүгээндээ хийхээсээ өмнө цэвэрлэж хийх ёстой. Шалны алчуур шинэ, цэвэрхэн байх хэрэгтэй. Үүдний өрөөнд болор бүрхүүл байрлуулах нь гэрт "ци" энергийг тэтгэх бөгөөд баруун өмнө зүг байрлуулбал харилцаанд сайн сайхныг бэлэглэдэг. Ийм үүдний өрөөтэй айл өөдлөн дэвжихэд ойрхон байдаг юм шүү. Өмнө зүгт харсан гол хаалга сайн азыг дууддаг хэдий ч гадагш онгойдог бол азыг тогтоон барьдаггүй тул ээлгүй юм. Энэ тохиолдолд гол хаалгыг дотогш онгойдог болгох хэрэгтэй. Гол хаалганы эгц өөдөөс цонх харах нь "чи" энергийг тогтворгүй болгодог бөгөөд ийм байрлалтай байшинд амьдардаг хүмүүс амархан уурлаж цухалддаг, идэвхгүй байх бөгөөд хөрөнгө мөнгө тогтоход ч бэрх байдаг. Энэ тохиолдолд хаалга цонхны хооронд савтай өндөр ургамал тавих, мөн хаалганы дээр тухайн зүгийн махбодид тохирсон салхин хонхыг өлгөнө.
АРИУН ЦЭВРИЙН ӨРӨӨ
Фенг шүйд угаалгын өрөөг устай хамт мөнгө гадагшилж байгаа хэмээнүздэг. Ариун цэврийн өрөө байрны төвд байвал муу энергийг тараах эх үүсвэр болно. Харин ийм байрлалтай бол хаалганы дотор талд толь тавьж муу энергийг буцаадаг. Мөн тосгуурын таг хаалгыг байнга хааж байх хэрэгтэй. Фенг шүй гэдэг зөвхөн мухар сүсэг биш, хүрээлэн буй орчин, байгаль дэлхийтэйгээ зохицон амьдрахын тулд энергийн урсгалыг өөртөө тааламжтайгаар зохицуулдаг арга ухаан юм. Тиймээс энергийн зөв урсгалыг орон байрны Фенг шүйгийн тусламжтайгаар гэртээ бий болгоорой.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.