Барилгын салбарт бизнесийн ёс зүй, шалгуур гэдэг зүйл байдаггүй. Үүнээс болоод салбарын нэр хүнд унаж байгааг салбарынхан хэлж байгаа билээ.  Тиймээс “Монголын барилгын инженерүүдийн холбоо”-ноос инженерүүдийг ёс зүйтэй байлгах үүднээс “Барилгын инженерүүд ёс зүйн дүрэм”-ийг шинэчлэн баталжээ. 

Энэхүү дүрмийг гишүүн байгууллагуудын болон хувь гишүүн инженерүүд үйл ажиллагаандаа мөрдлөг болгож ёс зүйтэй, шударга, хийж гүйцэтгэсэн ажил үүргээ бүрэн хариуцдаг, хууль дүрмийг нарийн чанд мөрддөг, хүрээлэн буй орчны бохирдлын эсрэг хатуу зогсож чаддаг, мэргэжлийн үйл ажиллагааны давуу талыг хангаж ажилладаг, инженерийн нэр хүнд, үнэ цэнийг өндөрт өргөн, мэргэжил нэгтнүүдээ манлайлан ажилладаг мэргэжилтэн байхаа баталж, энэхүү дүрмээр өөрсдийн үйл ажиллагаандаа мөрдлөг болгон ажиллахыг зорьжээ.

Барилгын инженерийн ёс зүйн дүрмийг баталж мөрдүүлснээр дараах гурван ач холбогдолтой. Үүнд:

1. Барилгын инженерийн үйл ажиллагаанд баримтлах нийтлэг зарчим, хэм хэмжээ, хүлээх хариуцлагыг тогтоож өгснөөр инженерүүдийн сэтгэлгээ өөрчлөгдөнө. 
2. Барилгын инженерийн хүлээх үүргийг маш тодорхой, нарийвчлан гаргаж өгснөөр энэ дүрэмд орсон зүйл, заалт бүрийг биелүүлж, хэрэглэхэд дөхөмтэй болгосны зэрэгцээ инженер үйл ажиллагаагаа мэргэжлийн түвшинд ёс зүйтэй явуулахад туслах  гарын авлага нь болно.
3. Инженерийн үүргийг хэм хэмжээ болгон тодорхой зааж өгснөөр түүнийг хэрэгжүүлж ажиллах эрмэлзлэл, хүсэл зоригийг инженерүүдэд өгөх болно.

Уг ёс зүйн дүрэм нь 6 зүйл, 70 заалтаас бүрдэнэ.

Барилгын инженерийн ёс зүйн дүрмийг энд дарж уншина уу