/Барилга угсралт, зураг төслийн гүйцэтгэгч компаний маркетинг/

Бид өөрийн гэсэн онцлогтой “Барилгын маркетинг” хэрхэн хийх талаарх цуврал нийтлэлийг бизнес эрхлэгч танд хүргэж байгаа билээ. Өмнөх дугаартаа барилгын салбарт маркетинг яагаад чухал вэ гэдэг талаар хүргэсэн бол энэ удаад барилга угсралт болон зураг төслийн гүйцэтгэгч компани маркетингаа хэрхэн хийх талаар бэлтгэн хүргэж байна. 

Барилгын салбарт барилгын угсралтын 5400, зураг төслийн 850, өргөх байгууламжийн 180 аж ахуй нэгж байгууллага /ААН/ тусгай зөвшөөрөлтэй үйл ажиллагаа явуулж байна. Эдгээр байгууллагуудын 50 орчим хувь нь идэвхитэй үйл ажиллагаа явуулдаг бөгөөд тэдгээрийг салбартаа хэрхэн ажиллаж буйгаар нь МЭРГЭЖЛИЙН болон ЧЕНЖ компани гэж 2 ангилан үзэж болно. 

Мэргэжлийн компаниудын ихэнх удирдлагууд барилгын мэргэжилтнүүд байх төдийгүй салбартаа сэтгэл зүрхээрээ, шударгаар ажилладаг. Харин ченж компаниуд бүх асуудлыг мөнгөөр шийддэг, олз, ашиг хайгч нар байдаг. 

Мэргэжлийн болон Ченж компанийн ялгаа

 Ченж компаниуд буюу чанаргүй муу ажил хийдэг, тамга кармаалсан цүнхтэй компаниудын хувьд хийсэн нүүр бардам ажил байхгүй,  чадварлаг мэргэжлийн боловсон хүчин байхгүй, хэл ам дагуулсан чанаргүй ажил хийдэг болохоор бусдад компанийхаа мэдээллийг харагдуулах сонирхол байдаггүй, олон нийтэд байгууллагын нэрээ гаргах дургүй, төрийн хууль, хяналт шалгалтын байгууллагуудаас нуугдмал байх сонирхолтой байдаг. 

 Мөн барилга угсралт, зураг төслийн ихэнх компаниуд төрийн байгууллагуудын тендерт оролцож, томоохон ажлуудыг авч хийдэг учир төдийлөн өөрсдийгөө рекламдах шаардлагагүй гэж үздэг. Тэд нэг ажил олоод хийгээд эхэлбэл тухайн жилдээ ажилтай болчихдог учир өөрийн байгууллагын маркетингт төдийлөн ач холбогдол өгдөггүй.

 Харин бизнесийн нэр хүнд, мэргэжлийн ёс зүйгээ эрхэмлэдэг, ажил, амьдралаа барилгын салбарт зориулж, цаашид өсөн дэвжиж, өргөжин тэлэхийг хүсдэг мэргэжлийн компаниудад МАРКЕТИНГ чухал байдаг.  

Барилгын гүйцэтгэгч байгууллагыг брэнд болгодог зүйл бол тухайн компанийн хийж гүйцэтгэсэн чанартай ажил, хамтран ажиллагчид, туслан гүйцэтгэгчид, ажилчдадаа хандаж байгаа хандлага зэрэг олон хүчин зүйлүүдийн нийлбэрээр тодорхойлогддог бөгөөд энэхүү давуу талуудаа салбартаа таниулсанаар нэр хүндтэй болж чаддаг. Мөн компанийн нэр хүнд удирдаж байгаа захирлын хандлага, ёс зүйгээс ихээхэн хамаардаг гэдгийг энд дурдах нь зүйтэй юм. 

МЭРГЭЖЛИЙН КОМПАНИ

Барилгын гүйцэтгэгч болон зураг төслийн компаниуд нь төсөл хэрэгжүүлэгч компани руу, хандсан харилцан уялдаа холбоотой маркетингийн бодлого явуулах шаардлагатай болдог. Гүйцэтгэгч компаниудын хувьд маркетинг хийхдээ өндөр зардал гаргах шаардлагагүй ч хийж гүйцэтгэсэн ажлаараа өөрийн байгууллагаа чанартай барилга барьдаг “сайн компани” гэдгээ танилцуулах нь чухал юм. Харин энэ санааг хэрэгжүүлэхэд туслах хамгийн энгийн бөгөөд өгөөжтэй арга бол цахим ертөнцөд албан ёсны хаягтай, тогтмол шинэ мэдээллээ нийтлэдэг байгууллагын вэб сайт болон нэрийн мэйл хаягтай байх ёстой. 

Энэ шаардлага барилгын зураг төслийн компаниудад ч адил үйлчилдэг. Төсөл хэрэгжүүлэгч чанартай барилга бариулахын тулд зураг төслийн шатандаа ихээхэн ач холбогдол өгч, судалгаа хийдэг бөгөөд хамгийн түрүүнд интернет google- ээр хайлт хийж, эрлээ эхлүүлдэг. Гэвч өөрийн гэсэн вэбсайт, хаяггүй бол хайлтын эхний хуудсанд тухайн компанийн ихэвчлэн муу мэдээ, тендерийн вэб, шүүхийн сайтын мэдээллүүд гарч ирдэг байна. Хэрвээ тухайн компанийг нэрээр нь интернэтээс хайхад ямар нэгэн мэдээлэл, илэрцгүй бол найдваргүй, тамга кармаалсан цүнхний компани төдийхөн гэсэн сэтгэгдлийг захиалагч талд төрүүлэх болно. 

Сүүлийн үед барилгын зарим жижиг компаниуд Facebook дээр пейж хуудас нээж байгаа хэдий ч энэ нь тухайн компанийг албан ёсоор төлөөлдөггүй. Учир нь үнэн худал нь мэдэгдэхгүй асар их мэдээлэл дунд живээд алга болдог ба мэдээлэл түгээхэд л дэмжлэг болох юм. Ялангуяа гадаадын хөрөнгө оруулалттай томоохон компаниуд нь хөрөнгө оруулан хамтран ажиллах Монгол компаниудыг сонгохдоо албан ёсны вэб сайтаар зочилж, мэдээлэл авдаг. Гэтэл барилгын салбарын зарим компаниуд yahoo болон gmail мэйл хаяг төдийхөн ашиглаж байна. Тиймээс танай компани руу хэзээ ч очихгүй хүмүүс интернэтээр мэдээлэл хайдаг гэдгийг ойлгож, өөрийн вэб сайтаа нээн, олон нийтэд хэрэгтэй, зөв мэдээлэл байршуулахыг зөвлөж байна. 

Барилгын байгууллага өөрийн өнгө төрх маркетингтаа анхаарсанаар компанийн нэр хүнд өсч тендерээс гадна гадаад дотоодын хөрөнгө оруулагчдын, хувийн хэвшлийн томоохон барилга байгууламжийг барих, хүний нөөц бүрдүүлэхэд илүү хялбар болж, ажиллаж байгаа ажилчдын сэтгэл санаа өөдрөг байх болно. Тиймээс барилга угсралт, зураг төслийн жижиг, дунд компаниуд ч гэсэн өөрийн өнгө төрхтэй болж, бага зардлаар ядаж дараах зүйлсийг хийхэд болох юм.

1. Өөрийн лого, өнгө төрхтэй болж, ажлын хувцас зэргээр ялгарах; 

2. Өөрийн вэбсайттай байх 

3. Вэбэд танилцуулга, гүйцэтгэсэн ажил байхаас гадна тогтмол  мэдээлэл, мэргэжлийн зөвлөгөө контент бэлтгэж оруулж байх;

4. Хэрэв сошиалтай бол вэб дээрх бэлтгэсэн мэдээлэл контентоо шейр хийх;

5. Салбарын хэвлэл мэдээлэлд мэргэжлийн ярилцлага, нийтлэл контент нийтлэх;

6. Салбарын олон нийтийн үйл ажиллагаанд оролцох;

7. Мэргэжлийн сургалт, семинар, уулзалт зохион байгуулах;

Хэрэв танай компани тогтвортой үйл ажиллагаа явуулдаг мэргэжлийн компани бол байгууллагынхаа олон жил бүтээсэн үнэ цэнийг бий болгож, мэдээллээ цахим орчинд байршуулан олон нийтэд эерэг зөв мэдээлэл хүргэх нь чухал юм.

Компани бүр байгууллагынхаа тухай, ажил мэргэжлийн мэдээлэл, зөвлөгөө контент бүтээж олон нийтэд түгээснээр энэ нь бидний хамтдаа хийж буй салбарын хамтын маркетинг болох тул Барилга.МН бүх талаар дэмжин ажиллана. Barilga.mn сайтад гишүүнээр бүртгүүлснээр өөрийн компанийн сайтыг нээж, мэдээлэл зөвлөгөө, контентоо зорилтот хэрэглэгчдэд түгээх боломжтой боллоо.

Монголын барилгачид хийсэн бүтээснээрээ бахархаж, хийж бүтээж байгаагаа залгамж үе, хүүхэд, залууст мэдүүлснээр бүтээн байгуулагч болох хүслийг бадраасан, иргэдэд хэрэгтэй мэдээлэл, зөвлөгөө контентийг хамтдаа олон нийтэд түгээцгээе.

------------------------------------------------------------------------------------------------------------------------

Дараагийн дугаарт Барилгын материалын үйлдвэрлэгч, ханган нийлүүлэгчдийн маркетингийн тухай нийтлэлийг хүргэх болно.