Дулаахан, бат бөх зуны байшинтай болцгооё
Сүүлийн үед агаарын бохирдлоос болоод айл болгон өөрийн гэсэн зуслангийн сууц, амины орон сууцтай болохыг хүсэх болжээ. Иргэдийн энэхүү хэрэгцээ шаардлагыг дагаад чанартай, чанаргүй сууцууд ихээр баригдаж, стандартын бус материалаар захиалга авч барих хувь хүн албан байгууллагууд ч нэмэгдсэн. Энэ бүх эрсдэлээс сэргийлж, амины орон сууцтай холбогдолтой бүхий л мэдээллийг мэргэжлийн хүмүүсээс авах нь зүйтэй. Барилгын материалын сонголт, амины орон сууц угсралтын компаниудын мэдээлэл, худаг болон бохирын талаарх мэдээлэл, анхан шатны зураг төсөв гээд өөрт тулгамдаж буй асуудлыг мэргэжилтнээс нь лавласны эцэст шийдвэрлэх нь үр ашиггүй зарцуулалт, цаг хугацааг хэмнэх давуу талтай
ГАЗРАА ЗӨВ СОНГОХ
Амины орон сууцтай болоход юун түрүүнд тулгарч буй бэрхшээл бол газар, дэд бүтцийн хангамжийн асуудал юм. Мэдээж та өөрийн гэсэн газартай бол илүү хялбар байх. Гэхдээ газар авч амины орон сууц бариулахаар төлөвлөсөн иргэн танд зөвлөхөд газар сонгохдоо мэргэжлийн байгууллага, амины орон сууцаа бариулах компанийн мэргэжилтэнтэй зөвлөлдөж байж авахыг санал болгож байна. Тэгэхээр хамгийн түрүүнд газар биш, байшингаа барих компанийг сонгож таарна. Дараа нь газраа сонгож, ямар хөрстэй болох, тог цахилгааныг хаанаас татаж болох, худгийг хэдэн метрийн гүнээс гаргах, бохирын асуудлыг хэрхэн шийдэх, халаалт дулаанаа яаж шийдэхээ урьдчилан мэдэж, төсөвлөгдөөгүй зардал гаргахаас сэрэмжлэх болно. Газраа худалдаж буй иргэнд таны ямар төсвөөр амины орон сууц бариулж, хэрхэн амьдрах нь биш, газраа зарах нь л чухал гэдгийг бодох хэрэгтэй. Нийслэл хотыг тойрсон зуслангийн газрууд болон гэр хорооллуудад тог, цахилгааны асуудал ихээхэн бэрхшэлтэй байдаг. Ихэнх нь уулын аманд, Найрамдал, Гачуурт, Төв аймаг явах зам, Ар гүнт, хойд зуслангийн ам гээд улсын тодотголтой шугам сүлжээнүүдийн хүртээмж багатай газарт байдгаас хувь хүмүүс өөрсдийн хөрөнгөөр татсан шугам, трансформаторууд ашигладаг. Тэдгээрээс тог татахад ихээхэн зардал гаргадаг. Мөн улсын гэх тодотголтой шугам таарлаа гэхэд хүчин чадлаас хэд дахин олон айл татсан байдаг тул зохих хэмжээндээ хүрч ажиллах нь ховор байдаг.
БАЙШИНГИЙН СУУРЬ ТАВИХ
Тухайн байршлаасаа шалтгаалж, газар нь сийрэг, шаварлаг, намгархаг, цэвдэгтэй,
хадархаг шинж чанартай хөрстэй байдаг. Үүнд хөрсний шинжилгээ хийлгэж, мэргэжлийн хүнээс зөвлөгөө авч хөрсөндөө тохирсон суурь хийлгэх хэрэгтэй. Дараа нь шалыг ямар байдлаар хийлгэхээ шийдэх нь зөв болов уу. Шалыг модон болон төмөр араг бүтэцтэй, цутгамал байдлаар хийлгэж болох ба газрын хөрс, суурьтай уялдуулан хийлгэнэ. Мэдээж доороос цан цохихгүй дулаан байхаар бодож, мэргэжилтэнтэйгээ зөвлөлдөж, шийдвэрээ гаргаарай
БАРИЛГЫН МАТЕРИАЛАА СОНГОХ
Суурь болон шал хийлгэх асуудлаа шийдсэний дараа үндсэн байшингийнхаа материалын сонголтонд анхаарах хэрэгтэй. Гадна болон дотор заслын хувьд хүссэнээрээ сонголтыг хийж болох ч үндсэн хана, дээврийн араг бүтэц, хана дүүргэлтэд сайтар анхаарч, чанартай материал авах нь чухал.
Канад хаус, Канад технологи гэхээр л тийм төрлийн материал орох ёстой гэсэн ташаа ойлголт хүмүүсийн дунд байдаг. Амины орон сууц барьдаг байгууллагуудын ихэнх нь технологийн дагуу БНХАУ, БНСУ, ОХУ, Европын холбооны улсуудаас оруулж ирсэн барилгын материалыг ашигладаг бол цөөн хэд нь л Канад банз, Канад холтсон хавтан буюу ОСБ хавтан зэрэг гол түүхий эдүүдийг хэрэглэдэг.
Эдгээр материалаас гадна Монгол банзаар араг бүтээцийг зангидан хийж буй байгууллагууд ч байгаа. Технологийнх нь дагуу хийж чадвал Канад банз, төмөр карказ нь илүү бат бөх байдаг ч, захиалагчдын санхүүгийн боломжинд нийцдэггүй, өртөг өндөртэй байдгаас өөр төрлийн банзаар орлуулан хийх нь элбэг болсон. ОСБ хавтангийн хувьд манай зах зээл дээр борлогдож буй Канад, "EDGER", БНХАУ-ын "Bao Yuang" хавтангууд чанараараа тэргүүлдэг. Эдгээр хавтангуудаас сонгосон байхад та байшингийнхаа үндсэн хананд санаа зоволтгүй боллоо гэсэн үг. Энэ технологийн гол асуудал нь ус чийг тусгаарлагч бүхий бүтээгдэхүүн байдаг ба үүнийг гадна өнгөлгөөний дотор талд хийх ёстой. Энэ нь чанараасаа шалтгаалаад харилцан адилгүй байдаг.
Дараагийн нэг чухал зүйл нь мэдээж дулаалгын материал. Уг технологийн гол давуу тал нь амьсгалдаг байшин гэдэгтээ байгаа учраас дулаалга нь хөвсгөр бүтэц бүхий чулуун болон шилэн хөвөн байх нь илүү оновчтой. Импортын бүтээгдэхүүнүүдээс "GUARDIAN", "UNITED INSULATION" зэрэг дулаалгын материалууд нь дуу чимээ, дулаан, чийг тусгаарлахдаа сайн, хананд бат бөх бэхлэгдэх цаасан артай байдаг. Энэ чанараараа дулаан тусгаарлах чадвараараа ижил төрлийн бусад материалаас илүү сайн болох нь олон жилийн хэрэглээ, туршлагаас ажиглагдсан болно.
Энэхүү сууцны хананы зузаан нь 10-15 см боловч бусад технологийн байшингаас хавьгүй дулаахан, дулаан хадгалах чанар өндөр байдаг зэрэг нь дээрх дулаалгын материалтай салшгүй холбоотой.
Хананы бүтцийг тодорхойлбол
Энэ нь жишээ бүтэц учраас хэрэгцээ, шаардлагадаа нийцүүлэн өөрчилж болно.
ДЭЭВЭР
Дараагийн гол анхаарах зүйл бол дээвэр юм. Дээврийн бүтцээс хамаарч, дээврийн хөндий, агааржуулалтад сайтар анхаарлаа хандуулаарай. Дээврийн хөндийн оновчгүй зохион байгуулалт, агааржуулалтаас шалтгаалж таазнаас цан цохих, хүйтэн байх, ус гоожих, хөлдөх зэрэг асуудлууд түгээмэл гардаг тул та заавал мэргэжлийн хүмүүсээс зөвлөгөө авах хэрэгтэй. Дээврийн хучилтаас их зүйл хамаардаг тул онцлогт нь тааруулж хучилтын материалыг сонгох нь өнгө үзэмж харахаас илүү чухал ба ингэхдээ энгийн төмөр дээврээс татгалзсан нь дээр болов уу. Хэрвээ төмөр дээвэр тавих гэж байгаа бол чулуугүй халааж, наадаг хар цаасаар бүрж байгаад тавьсан нь илүү урт хугацаанд ашиглах боломжийг олгоно. Энэ нь халуун, хүйтэн агаар харшнаас үүдэн дээврийн хөндийд чийг үүсэхээс хамгаална.
Ямар ч байшинд суурь, даацын хана, дээвэр гурав гол хүчин зүйл нь байдаг. Харин бусад заслын материалыг та хүссэнээрээ сонгож болно.
ЦЭВЭР, БОХИРЫН АСУУДАЛ
Хэрвээ сууцаа ариун цэврийн өрөөтэй бариулах гэж байгаа бол цэвэр, бохирын
асуудлыг шийдэхдээ мөн л анхаарал болгоомжтой хандаарай. Худаг ухуулах бол
мэргэшсэн хамт олон, баталгаат хугацаа, үйлчилгээг сайтар бодолцох хэрэгтэй. Туршлага, чадвар, хариуцлагатай байдлыг нь харж, дүгнэж байж сонгоорой. Бохирын хувьд хөрснөөс шалтгаалж олон янзаар шийдэж болох ба хөрсөнд шингэдэг, эсвэл соруулдаг гэсэн хэлбэрээр зохицуулж болдог. Эцэст нь танд гэж хэлэхэд байшингаа барих газраас авахуулаад шууд мэргэжлийн байгууллагатай хамтран ажилласан нь танд амар байх болно.
“Dream Woodhouse” ХХК