Байгалийн түүхийн музейн буурин дээр "Чингис хаан" музейн барилгын ажил өчигдөр эхэллээ. Уг барилгад 2020 онд улсын төсвөөс 53 тэрбум төгрөгийн санхүүжилтийг төсөвлөөд байна. 

Энд Монголын түүхийн судалгаа сургалт, соён гэгээрлийн цогцолбор байх бөгөөд соёлын хосгүй үнэт дурсгал, дэлхий даяар тархсан монголчуудын түүхийн их өвийг дэлгэх юм. Төрийн тахилгат 10 уул, их гол мөрөн, нуурын рашаан усны дээжис, 21 аймгаас залж авчирсан үнэртний дээжис зэргийг хүндэтгэн залж, шүншгийг бэлджээ. Түүнчлэн үзмэрийн тайлбарыг НҮБ - ын зургаан хэлээр орчуулан хүргэх төдийгүй бодит үзмэрийг шилэн хоргоос үзээд гарах биш виртуаль байдлаар тухайн цаг үед очсон мэт сэтгэгдэл төрүүлэх дэлгэцүүдийг бэлдэж байгаа юм. 

20500 кв.м талбайтай, нийт есөн давхар байх музейн барилгын зураг төслийг архитектор эртний түүхэн уламжлалыг орчин үеийн шинэчлэлт техник, технологийн дэвшилтэй нийцүүлэн архитектурын шинэ хэв маягийг бий болгодгоороо онцлогтой архитектор Д.Балдан гаргажээ. 

Музей 2021 оны хоёрдугаар улиралд  ашиглалтад орох юм.