Сүүлийн үед барилгын салбарт хавтгай дээврийн технолгийг түлхүү ашиглах болсон. Барилгын салбарт 1990-ээд оны сүүл хүртэл хавтгай дээврийг хуйлмал материалаар хучихад хятад болон оросод үйлдвэрлэсэн хар цаасанд лак түрхэж наадаг байсан. Энэ нь манайх шиг эрс тэс уур амьсгалтай оронд хэдхэн жил болоод л хагарч, хөндийрч цоорох, хорчийн агшиж, ус тусгаарлах шинж чанараа алддаг сул талтай. 

Харин сүүлийн жилүүдэд халааж наадаг олон янзын зориулалттай ус чийг тусгаарлах чанар сайтай материалыг хэрэглэж байна. Эдгээр материалаас хамгийн өргөн хэрэглэгддэг нь битум рулонон хар цаасууд юм. Бүтээгдэхүүний доод гадарга нь амархан хайлдаг полимер хальтай, өнгөн тал нь чулуун бүрхүүлтэй үйлдвэрлэгдсэн. Үндсэн суурь материал нь үл ялзрах органик нийлэг эд байдаг. Харин чулуугүй цаасыг бусад төрлийн дээврийн материалын доор суурь болон уур ус тусгаарлагч байдлаар ашиглаж  дуу чимээг зохих хэмжээгээр намсгаж өгдөг байна. Чулуутай цаасаа гадна давхаргад наах нь нар салхины нөлөө, цас бороо, механик гэмтлээс  хамгаалах үе болдог. Эдгээр материал нь шинээр хийж буй болон дахин засварлаж буй дээврийн аль алинд сайн тохирно. 

Хучилт хийхээс өмнө дээврийн бетон гадаргууг ус чийг тусгаарлагчаар тэгшхэн өнгөлж бэлтгэсэн байх эсвэл элс цементэн өнгөлгөө хийх хэрэгтэй. Мөн дэвсгэр гадарга нь  маш тэгшхэн хуурай байлгах хэрэгтэй ажээ.

Хавтгай дээврийн өөр нэг шийдэлд өргөн ашигладаг өөр нэг материал нь АНУ-ын "Firestone Building Products" компаний ЭПДМ (этилен- пропилин -  дайн-терполимер мембран) суурьтай нэг үет дээврийн хуйлмал резинэн материал юм. "Firestone Building Products" –ийн энэхүү технологи нь 1900-аад оны үеэс барилгад ашиглагдаж эхлэсэн битум болон чулуутай, чулуугүй хар цаасан дээврийн дараагийн үе гэж нэрлэдэг.

Манайд нэвтрүүлж буй дээврийн энэхүү системд голдуу 3,05 - аас 6,1 м өргөнтэй хуйлмал, резинэн материалыг ашиглах бөгөөд дээш гарсан хийцлэлүүд, хашлага хананд зориулалтын "Bonding Adhesive" буюу тусгай цавуугаар наана. Резинэн хучилтуудыг 100 мм – ээс  120 мм –ээр зөрүүлэн залгаж наах бөгөөд зориулалтын хурдан наагч "Splice Tape" туузыг хавчуулан наана.  Ингэснээр цул нэгдмэл, ус тусгаарлалтын давхарга үүсэх юм. Уулзвар, залгаасуудыг зохих ёсоор битүүмжилж, нөхөөс хийсний дараа дээврийн периметрийн дагуу ус тусгаарлалтыг ЭПДМ мембранаар бүрэх ба дээврээс гарсан инженер, техникийн хоолой, яндан, барилгын хийцүүдийг "Firestone Building Products" компанийн техникийн шаардлагын дагуу гүйцэтгэнэ.

Нэг боодол нь 270 м2 хүртэлх талбайг бүрэхүйц хэмжээгээр үйлдвэрлэгддэг тул уулзвар, залгаас, зөрүүлгийн тоог ихээхэн багасгах бөгөөд дээврийн уг чанар, найдвартай байдлыг улам батжуулах ба барьцалдан наалдах өндөр чанартай.  "Bonding Adhesive'' цавууг гадаргууд ашигласнаар салхины үйлчлэлд тэсвэртэй дээврийн цогц систем бий болдог. ЭПДМ мембранаар дээвэр болон ус тусгаарлалтын ажлыг хүйтэн, сэрүүний улиралд ч гүйцэтгэх боломжтойгоос барилга угсралтын ажил хийх хугацааг уртасгадаг. Мөн  байгаль орчинд ээлтэй, ногоон орчинг үүсгэсэн, тав тухтай, аглаг ойд амьдарч буй мэт боломж олгох гайхалтай шийдэл, орчинг бий болгоно.