2019 оноос эхлэн хэрэгжиж, зах зээлд амжилттай борлуулагдаж байгаа SMART TOWN -1, чанарын шаардлага хангасан, ухаалаг систем бүхий SMART TOWN -2 цогцолбор хотхоны  талаар “Анд ноёд” ХХК-ны Маркетинг, борлуулалтын ахлах менежер Э.Пүрэвмаатай ярилцлаа.

Юуны түрүүнд “Сэд дэвжих” ХХК-ийн талаар танилцуулаач, ямар ямар төслүүдийг хэрэгжүүлж байсан бэ?

-Төсөл хэрэгжүүлэгч “Сэд Дэвжих” ХХК нь 2007 оноос хойш үйл ажиллагаа явуулж байгаа бөгөөд гадаад, дотоод худалдаа, аялал жуучлал, хөдөө аж ахуй, барилга зэрэг салбарт  ажиллаж ирсэн 13 жилийн туршлагатай хамт олон юм. “Сэд  Дэмжих” компани нь  “Анд Ноёд” ХХК-ны охин компани.  Манай компани Захиргаа, Санхүү, Хуулийн зөвлөх,  Маркетинг борлуулалтын алба, Инженер техникийн алба, хэлтсүүдтэй. Барилгын төслүүд дээр “Хөх Ган Өгөөж” ХХК-тай хамтран ажиллаж байна.

Бид 2019 оны 3-р сард Монголын зах зээлд 16 давхар 128 айлын  SMART TOWN-1 орон сууцны төслийг хэрэгжүүлж эхэлсэн. Энэхүү орон сууц нь зах зээлд богино хугацаанд хурдан танигдаж, одоогоор борлуулалт 90 хувьтай явагдаж байна.  Харин 2019 оны 9 дүгээр сард Нисэхийн Буянт Ухаа-1 хорооллын зүүн талд төв зам дагуу 2 га газарт SMART TOWN-2 нийт 10 блок, 1400 айл, гурван давхар хүртэлх үйлчилгээний төвтэй, 250 хүүхдийн цэцэрлэгтэй томоохон хотхоны төслийн ажлыг эхлүүлээд амжилттай явж байна. 

Туслан гүйцэтгэгчээр “Хөх Ган Өгөөж” ХХК-тай хамтран ажиллаж байгаа гэсэн. Хамтрагчаараа тус компанийг яагаад сонгох болсон бэ?

-“Хөх Ган Өгөөж” ХХК нь төрийн болон хувийн хэвшлийн олон арван барилгын төслүүд дээр ажилласан туршлагатай, 50 гаруй мэргэжлийн ажиллах хүчинтэй. Ажиллах хүчний хувьд 100 хувь дотоодын компани, аж ахуй нэгжүүдтэй хамтран ажилладаг. Мөн 16-н давхар барилга барих тусгай зөвшөөрөлтэй компани болж улам өргөжин үйл ажиллагаа явуулж байна. Энэ компанитай бид олон жил хамтран ажилласан, цаашид ч ажилласаар байх болно. Бусад дотоодын компаниудын хувьд "МАК" ХХК - ийн евроблок, "Үүр Тээл" ХХК - ийн арматур, "Эвт Чулуу" ХХК - ийн бетон зуурмаг гол материалаа болгон ашиглаж, эдгээр компаниудтай хамтран ажилладаг.

Нэрнээсээ “УХААЛАГ” хотхон гэдгийг илэрхийлж байна. Орчин үеийн олон шинэлэг, дэвшилтэт шийдлүүдийг ашигласан болов уу гэж бодогдлоо. “SMART TOWN” 1,2 хотхоны хамгийн гол онцлог давуу тал нь юундаа байна вэ?

-Ухаалаг хотхон гэдэг бол иргэдийн амьдрах таатай, аз жаргалтай, хамгийн тухлаг бүс байх хэрэгтэй. Тиймээс хүний бүхий л хэрэгцээг хангасан, шилдэг төлөвлөлт, экстерьер, интерьерийн шинэлэг шийдэлтэй “SMART TOWN” хотхон бий болгохоор зорин ажиллаж байна. "SMART TOWN" хотхон гэдэг нь ухаалаг амьдралын хэв маяг бүрдүүлэхийг зорьсон бөгөөд айл бүрт ухаалаг систем буюу SMART MIRROR байрны бүх мэдээллийг хүлээн авдаг ухаалаг системтэй. Нөгөө талаас бид зөвхөн барилгын ажлыг дуусгаад түлхүүр гардуулан өгөх биш цаашид байнгын хамтын ажиллагаатай байж амьдрах таатай нөхцлийг бүрдүүлэн ажиллана. 

Одоо SMART TOWN-2 хотхоны ажил хэдэн хувийн гүйцэтгэлтэй байна вэ?

SMART TOWN-2 хотхон өнгөрсөн оны 9 дүгээр сараас эхлэн барилгын инженер геологийн судалгаа хийгдэж, барилгын тусгай зөвшөөрлүүдийг бүрдүүлэх, загварын байр барих зэрэг ажлууд хийгдэж, одоогоор барилга барих бэлтгэл ажлаа явуулж байна.

Худалдан авагчид давхартаа хэдэн айл оршин суух, өрөөний тоо, байршил, гадна талбай, машины зогсоол зэрэгт хамгийн их ач холбогдол өгдөг шүү дээ. Энэ талаар онцлох зүйлсийн талаар ярьвал?

-Өнгөрсөн жилүүдэд Улаанбаатар хот  төлөвлөлт муутай замбараагүй хөгжиж ирснийг хэн ч үгүйсгэхгүй. Ногоон байгууламж, хүүхдийн тоглоомын талбайгүй шахам орон сууцны барилгууд, нийтийн эзэмшлийн талбайг хааж барьсан хашаа, зөвшөөрөлгүй өргөтгөлүүд барьсан гэх мэт асуудлууд байдаг. Харин бид Яармаг, Нисэхийн бүсэд зөв төлөвлөлттэй, орчин үеийн гэр бүлийн бүхий л хэрэгцээг нэг дор хангахаар төлөвлөгдсөн хотхоныг барьж байна. SMART TOWN-2 хотхоны хувьд 250 хүүхдийн багтаамжтай цэцэрлэг, тоглоомын талбай, ногоон байгууламжтай хотхон руу  машин орохгүй байхаар төлөвлөсөн. Цаашлаад хотхоны доор нэгдсэн системтэй 300 автомашины дулаан зогсоол, гаднаа 500 гаруй ил зогсоолтой, 3500 мкв бүхий үйлчилгээний байгууламжтай, шаардлагатай үед хэрэглэх орц, гарцтай зэрэг цогц зохион байгуулалттай хийгдэхээр төлөвлөгдсөн байгаа.

Байршлын хувьд яагаад энэ газрыг сонгох болсон бэ?

-Манай эхний төсөл Яармагийн "Оргил" худалдааны төвийн чанх ард баригдсан, хоёрдох төсөл маань Нисэхийн "Буянт-Ухаа-1" хорооллын зүүн талд төв зам дагуу байрлалтай. Төсөл хэрэгжих байршлыг сонгохдоо юун түрүүнд захиалагчийн үүднээс харж сонгосон. Учир нь нийслэл хотод амьдарч байгаа бидний хувьд юун түрүүнд цэвэр агаартай, түгжрэл багатай, авто зогсоол сайтай, хүүхдийн тоглоомын талбай, худалдааны үйлчилгээний төвтэй ойр байх нь хамгийн чухал зүйл болоод байгаа шүү дээ. Энэ хэрэгцээг хангахад бидний сонгосон байршил хамгийн тохиромжтой гэж үзсэн. Тодруулбал агаарын болон дуу чимээний бохирдол багатай, гэмт хэргийн гаралт хамгийн багатай дүүрэгт оршдог. Нөгөө талаас Яармаг, Нисэхийн бүс нь улам өргөжин тэлж байгаа тул ирээдүйд үнэ нь өсөх бүрэн боломжтой газар юм.

Цогцолбор хотхон, дан байрны ялгаа юундаа байна? Анхнаасаа хотхон барих зорилготой байсан уу, эсвэл сүүлд хотхон болгохоор шийдвэрлэв үү?

-Дээр хэлсэнчлэн хотхон гэдэг бол иргэдийн амьдрах таатай, аз жаргалтай, хамгийн тухлаг бүс байх ёстой. Иймд орон сууцны хотхон нь цогцолбор байдлаар иргэдийн бүхий л хэрэгцээг хангахаар эрмэлздэг.  Манай SMART TOWN-2 хотхоны  3500мкв талбай бүхий үйлчилгээний төвд эмийн сан, банк, супермаркет, кофе шоп, гоо сайхан, спортын төвүүд зэргийг тусгасан.  Дан ганц байранд энэ бүхнийг шийдэх боломжгүй шүү дээ. 

Ногоон хот, ногоон байгууламжийг хүн бүр л хүсдэг болсон. Ногоон байгууламж зүлэгжүүлэлт хэр хийгдэх вэ?

-Хүрээлэн буй орчиндоо ногоон байгууламж бий болгох нь агаарыг цэвэршүүлэх, хүний сэтгэл санааг тайвшруулах, орчны тоосжилт, дуу чимээг багасгах, олон төрлийн өвчин эмгэгээс урьдчилан сэргийлэх зэрэг олон ая тухтай таатай нөхцөлийг бүрдүүлдэг. Манай хотхоны хувьд нийт эзэмшлийн 40 хувийг ногоон байгууламж эзлэх бөгөөд үүнд зүлэгжүүлэлтээс гадна олон төрлийн мод, бут сөөг, хашаа хайс зэргийг зураг төслийн дагуу хийнэ. Ногоон байгууламж нь байгальд ээлтэй байхаас гадна гэр бүлийнхээ эрүүл мэндийг хамгаалахад оруулж буй үнэтэй хувь нэмэр учраас ногоон байгууламжийн хувьд ихээр анхаарч байгаа.

Дотор агаарын чанар гэдэг амьдарч байгаа хүний эрүүл мэндэд асар нөлөөтэй байдаг. Тиймээс агааржуулалтын системийн талаар тодруулмаар байна? 

-Агаар сэлгэлтийн хувьд ариун цэврийн өрөөнүүдэд үл буцаах хавхлагатай, сэнстэй сараалж төлөвлөсөн. Гал тогоонд ердийн агаар сорох системтэй. Агаар сэлгэлтэд REMAK фирмийн сэнс, агаар шүүгч зэргийг угсрахаар төлөвлөсөн байгаа. Автомашины дулаан зогсоолд  агаар сорох албадмал систем байрлуулна.

Зэвтэй ус мөн л асуудал болоод байгаа. Ус дамжуулах сувгаа ямар материалаар шийдсэн бэ?

-Дэд бүтцийн хувьд “SMART TOWN” хотхон нь төвийн шугам сүлжээнд холбогдсон ба Инженерийн шугам сүлжээний материалыг олон улсын стандартын шаардлагад нийцсэн цайрдсан, зэвэрдэггүй хоолой зэрэг ОХУ, Турк материалыг сонгон ашиглана. Тухайлбал радиатор, цэвэр бохир усны хоолой, агааржуулалтын систем зэрэг нь ОХУ болон Турк улсын сайн чанарын бүтээгдэхүүн байх юм. Барилгын тухай хуулийн дагуу тоноглол болон шугам сүлжээндээ 3-5 жилийн баталгаат хугацааг олгодог. 

Олон улсын чанарын ямар стандартыг мөрдөн ажиллаж байна вэ? 

-Барилгын чанарын хувьд барилгын норм дүрэм, барилгын тухай хууль, олон улсын ISO стандартыг нэвтрүүлэн өөрсдийн дотоод стандартыг мөрдөж өмнө ажиллаж байсан төслүүд дээр хэрэгжиж байгаа чанар туршлагыг “SMART TOWN-2 ” төсөл дээр хэрэгжүүлэн ажиллаж байна. Мөн манай компанийн хувьд төслүүддээ үр дүнтэй, чанартай, хугацааны алдагдалгүй байхаар зорин ажилладаг. Тиймээс хяналт шалгалтын алба нь төслийг хэрэгжүүлэх бүхий л хугацаанд хуваарийн дагуу үзлэг шалгалтыг явуулж хэрэглэгчдэд  чанартай барилга хүлээлгэн өгөхөөр ажилладаг.  

Бүрэн цутгамал уу? Газар хөдлөлтөд хэр тэсвэртэй, чанартай барилга вэ?

-Барилгын хийцлэлийн хувьд 7-8 баллд тэсвэртэй, төмөр бетон карказ, хэсэгчилсэн цутгамал ханатай. Гадна фасадын хувьд гоёлын фактортай шаврыг ашиглаж байгаа бөгөөд энэ нь хэт ягаан туяаны хамгаалалттай, хүйтэнд тэсвэртэй, эрүүл мэндэд ээлтэй эко бүтээгдэхүүн юм. Төслийн бүтээцэд ашигласан материал М350 маркийн бетон бат бөх чанартай, А500СП арматур 7-8 баллд тэсвэрлэх чадвартай, “МАК”-ийн Евро блок эрүүл мэндэд сөрөг нөлөөгүй.

Интерьер дизайны шийдэл жил бүр л хувьсан өөрчлөгдөж байдаг. Танай орон сууц интерьерийн ямар шийдэлтэй байх вэ? 

-Гэр бүлээрээ тав тухтай амьдрахад орчны тохижилт, өрөөний зохион байгуулалт зэрэг нь чухал үүргийг гүйцэтгэж байдаг. Интерьер дизайнаас хамаарч бага мкв-тай байсан ч цэлгэр уужим харагдах боломжтой. “SMART TOWN” хотхон нь монгол хүний амьдралын хэв маягт тохируулан, гэр бүлийн гишүүн бүрийг тав тухтай байлгах, зах зээлд хамгийн эрэлттэй байгаа өрөөний зохион байгуулалт зэрэгт үндэслэн  интерьерийн шийдлээ гаргасан. Өнгө сонголтын хувьд интерьерийн шийдлийг орчныг уужим харагдуулах байгалийн натурал, цайвар болон завсрын өнгөнүүдийг түлхүү ашиглана. Мөн айлын дотор хаалгыг цагаан өнгөөр, ханын цаасыг цайвар өнгөөр шийдсэн нь ямар ч тавилгатай зохицох орон зайг илүү бүрдүүлнэ гэж үзэж байгаа. 

Өрөөний зохион байгуулалтын хувьд?

-Өрөөний зохион байгуулалтын тухайд 1 өрөө 28-30мкв, 2 өрөө 36-53мкв, 3-н өрөө 60-74мкв-ийн хооронд байгаа. “SMART TOWN” хотхоны хувьд залуу гэр бүлд зориулан зах зээлд хамгийн эрэлттэй байгаа өрөөний зохион байгуулалтыг судлан ашигтай талбай ихтэйгээр төлөвлөсөн. Мөн өрөө бүрд цэлгэр саруул цонхыг төлөвлөж, орон зай хэмнэх ухаалаг шийдлийг бий болгох талаар мэргэжлийн баг хамт олон, чадварлаг залуустай хамтран ажилласан. 

Байр худалдан авагчдын хувьд ипотекийн зээл болон бусад зээлд хамрагдах боломжтой юу?

-Боломжтой. Бид 2019 онд хөнгөлөлттэй үнээр иргэдийг орон сууцжуулах төсөл хөтөлбөрийг баримтлан Улаанбаатарт хамгийн бага үнийг зах зээлд санал болгож байсан. Учир нь иргэдийн хувьд урьдчилгаа төлбөрөө бүрдүүлэх, зээлийн нөхцөлийг хангах, зээлийн материал  бүрдүүлээд дахиад хамгийн багадаа 15-20 жил сар бүр 500 мянгаас сая төгрөгийн зээл төлнө гэдэг өнөөгийн нийгэмд хүнд тусдаг шүү дээ. Харин бид бараг урьдчилгаа төлбөрөөрөө орон сууц, өөрийн сонирхож буй байраа худалдан авахыг санал болгодог. Мөн  хөнгөлөлттэй үнээр иргэдийг орон сууцаар хангах төслийн хүрээнд бэлэн төлөлтөөр хямд үнийг санал болгох, компанийн болон хувь лизингд хамруулах, бартер зэрэг худалдан авалтын олон боломжийг захиалагч нартаа санал болгодгоороо томоохон давуу талтай гэж хэлж болно.

Мкв-ын үнэ хэд байгаа вэ? Байр худалдан аваад хэдэн жилийн дараа үнэ нь буурах хандлагатай байдаг. Ирээдүйд үнэ цэнээ алдахгүй, өсөх батламжийг өгч чадах уу?

-Ирээдүйд үнэ цэнээ алдахгүй байх, өсөх зэрэг нь олон зүйлийн хүчин зүйлсээс шалтгаалдаг. Манай төслийн хувьд шинэ суурьшлын бүсэд байршилтай, барилгын чанар, өрөөний зохион байгуулалт, хотхоны интерьер, ойр орчмын үйлчилгээний талбай, сургууль, цэцэрлэг, автобусны буудалтай ойр зэрэг давуу талуудтай. Төслийн үнэ улам өсөх төдийгүй урьдчилан захиалгаар авсан иргэдийн дунд нэг давхраар нь худалдан авсан захиалагч хүртэл байдаг. Энэ нь ирээдүйд үнэд хүрэх бэлэн орон сууцыг өнөөдрийн бага өртгөөр худалдан авснаар санхүүгийн хувьд ашигтай хөрөнгө оруулалт хийж байгаа хэрэг юм. Иймээс баригдаж буй орон сууц бүр өөрийн онцлог давуу талтай бөгөөд одоогийн үнэ, ирээдүйн үнэ цэнийг харьцуулан, өөрийн хэрэгцээ шаардлагадаа тааруулан шийдвэрээ гаргах нь зөв юм.  Нийгмийн хариуцлагын хүрээнд мкв-ийн үнийг 950,000 төгрөгөөр орон сууцанд хамруулах ажлыг зохион байгуулан амжилттай дуусаж байгаа. 

Танай компанийн хэтийн зорилго, цаашид хийгдэх ажлын талаар?

-Бидний үйл ажиллагааны гол зорилго бол илүү олон иргэдийн хямд, хөнгөлөлттэй үнээр орон сууцаар хангах. Энэ боломжийг бүрдүүлэх бүх нөхцөл боломжийг манай баг хамт олон судлан ажиллаж байна. Манай компани 2020 онд барилгын салбарт SMART TOWN-1 төслийг бүрэн ашиглалтад оруулах, SMART TOWN-2 хотхоны эхний 2 блокийг эхлүүлэх, мөн  6 га газар хаусын төслүүдийг хэрэгжүүлэх төлөвлөгөөтэй байна.