Тэнгэр баганадсан барилгууд бол Нью-Йорк хотын нэрийн хуудас. Бүгд л тус хотыг шовх, шилэн барилгуудаар төсөөлдөг. Гэвч үүлэнд шүргэм өндөр биш ч гэсэн олон жилийн нүүрийг үзэж, архитектурын үнэт дурсгал болсон барилгууд тус хотод их бий. Эдгээр барилгуудыг ихэнх хүн үл анзаарах боловч өнгөрсөн зууны өнгө үзэмжийн тухай ихийг хэлж өгөх чимээгүй баримтууд юм. 

Тиймээс Нью-Йорк хотод амьдардаг эсвэл аялахаар төлөвлөж буй хүмүүст зориулан Нью-Йорк хотын архитектурын үнэт дурсгал болсон долоон барилгын тухай хүргэж байна.

Жуулчид үргэлж домогт “Brooklyn” гүүрэнд анхаарлаа хандуулсаар ирсэн учраас хэдхэн милийн зайд орших “Queensboro”  гүүрийг тийм ч их анзаардаггүй. Гэвч 3,724 фут урт тус гүүр нь архитектурын дурсгалын хувьд “Brooklyn” гүүрнээс дутуугүй ач холбогдолтой юм. Загварыг нь Америкийн архитектор Хенри Хорнбостел гаргасан бөгөөд ”The Dark Knight Rises“ (2012), ”The Great Gatsby“ (2013) зэрэг кинонуудад уг гүүр гардаг.

“Waldorf Astoria” нь 1931 онд Парк өргөн чөлөөнд нээгдэж дэлхийн хамгийн өндөр бөгөөд хамгийн том зочид буудал болжээ. Олон жилийн туршид арт деко загварын тус тансаг зочид буудалд баячууд болон алдартнууд байрлаж байсан юм.  Мэрилин Монро гэхэд амжилтынхаа хамгийн оргил үед буюу 1955 онд тус буудалд долоо хоногийн 1000 долларын өртөг бүхий өрөөнд амьдарч байжээ. 

Манхэттен хотын төв хэсэгт байрлах ”Trinity Church“ нь Нью Йоркийн хамгийн алдартай хоёр зам болох Бродвэй болон Уолл Стритийн уулзвар дээр байрладаг. Сэргэн мандалтын үеийн бүтэцтэй 281 фут өндөр уг сүм 1846 онд ашиглалтад орсон юм. Улмаар тухайн үедээ хотынхоо хамгийн өндөр барилгад тооцогдож байлаа. 2001 оны есдүгээр сарын 11-ний халдлагын дараа ч тус сүм тэсч үлдсэн нь хэр сайн барилга болохыг нь харуулсан гэдэг.

“Woolworth” барилга 1913 онд Манхэттены төвд ашиглалтад орсноор дэлхийн хамгийн өндөр тэнгэр баганадсан барилга болж байжээ. Түүнээс хойш 20 жилийн турш энэ цолоо хамгаалсан юм. Бизнесмен Фрэнк Вулворт тус барилгыг санхүүжүүлсэн бөгөөд загварыг нь архитектор Касс Гилберт гаргаж байжээ.

“Vessel” худалдааны төв нь өнгөрсөн оны гуравдугаар сард нээлтээ хийсэн. Тус барилга нь Америкийн түүхэн дэх хамгийн том хувийн үл хөдлөх хөрөнгийн төсөл бөгөөд 10 гаруй жилийн турш баригдаж нийтэд хүлээлт үүсгээд байсан юм. Загварыг нь Томсон Хизервик гаргасан бөгөөд 150 фут өндөр, зөгийн үүрийг санагдуулам хэлбэртэй.

Нью-Йоркийн нийтийн номын сангийн Ерөнхий Судалгааны өрөө. 1911 онд баригдсан тус номын сан Манхэттен хотын төв хэсэгт, Тавдугаар өргөн чөлөө, 40-42 гудамж хооронд байрладаг

Алдар архитектор Ричард Моррис Хантын бүтээсэн “The Metropolitan Museum of Art” музей нь 1902 оны сүүлээр олон нийтэд нээгдсэн. Манхэттений тавдугаар өргөн чөлөөд байрлах бөгөөд одоог хүртэл үйл ажиллагаагаа явуулж байна.