“Star intelligent” ХХК нь 2005 оноос эхлэн үйл ажиллагаагаа явуулж, 2016 оноос Дэлхийн шилдэг брэнд болох Франц улсын “Schneider electric” компанитай  хамтран цахилгаан хангамжийн тэргүүлэгч Евро стандартыг Монгол Улсад нэвтрүүлэн, чанарын шаардлага ханган амжилт гарган ажиллаж байгаа ба тус компаний гүйцэтгэх захирал Д.Лхамсүрэнтэй хийсэн үйл ажиллагаа, хэтийн зорилгын талаарх ярилцлагыг хүргэж байна. 

-Өдрийн мэнд хүргэе. Компанийхаа үйл ажиллагааны зорилго, чиглэлийн талаар товч танилцуулна уу.
-Манай компани “Барилгын цахилгаан техник угсралт”-ын чиглэлээр байгуулагдан энэ салбартаа 2005 оноос хойш тогтвортой ажиллаж байна.  2016 оноос эхлэн “Эрчим хүч, холбоо дохиолол, автоматжуулалт цахилгаан угсралт”-ын стандартыг Евро стандартад шилжүүлэх зорилго тавин ажиллаж байна. Борлуулалт маркетинг, гадаад харилцаа, захиргаа хүний нөөц, санхүү гэсэн албадтай. Мөн инженер техникийн, мэргэжлийн ажилчид зэрэг нийт 50 гаруй ажилчид, боловсон хүчинтэй. Харилцагч үйлчлүүлэгч  нарынхаа зураг төсөл, шийдлийн дагуу евро стандартаар барилгын цахилгаан, холбоо дохиолол, автоматжуулалт, гэрэлтүүлэг зэргийг  чанартай, түргэн шуурхай гүйцэтгэж өгөхийг зорин ажиллаж байна. Үйл ажиллагааны чиглэлийн хувьд барилга, байгууламжийн дотор, гадна цахилгаан, дохиолол, автоматжуулалтын материалын худалдаа, барилгын дотор гэрэлтүүлэг, барилгын цахилгааны салбар шугам, щит самбар, хуваарилах байгууламжийн угсралт, барилгын дотор холбоо дохиоллын угсралт, зөвлөгөө мэдээлэл, камержуулалт, зарлан мэдээлэх систем, галын болон хулгайн дохиолол, галын хөшиг, автоматжуулалтын угсралт, авто зогсоол, гэрэлтүүлгийн болон агааржуулалтын автоматжуулалт, гэрийн ухаалаг автоматжуулалт зэрэг үйл ажиллагааг хийж гүйцэтгэж байгаа.
-Үйл ажиллагааныхаа чиглэлээр хийж гүйцэтгэсэн томоохон ажлууд болон оролцсон төслүүдийн тухай
-Манай компани өнөөдрийг хүртэл 40 гаруй том, жижиг төслүүд дээр баг хамт олноороо ажилласан байна. Бидний хийж гүйцэтгэсэн ажлуудын томоохон төслүүдээс дурдвал “Монкон констракшн” ХХК-н хэрэгжүүлж буй “Комфорт хотхон- 3” төслийн Д1, Д3 блокуудын “Дотор цахилгааны угсралтын ажил гүйцэтгэх, бараа материал нийлүүлэх” гэсэн гэрээ байгуулан хамтран ажиллаад амжилттай гүйцэтгэн дуусгаад улсын комиссд өчигдөр хүлээлгэн өглөө. Мөн ХУД-ийн “И-март"  сүлжээ дэлгүүрийн дотор цахилгааны угсралтын ажлыг хийж гүйцэтгээд мөн л улсын коммист хүлээлгэн өгөөд байна. Үүнээс өмнө “И-март 1” төсөлд  “Prisma IPM” системээр бүх щит самбарыг угсарсан, гэрэлтүүлгийн автоматжуулалтыг “Scada” системээр шийдсэн, “Busway” системийг анх удаа нэвтрүүлсэн, өндөр хүчдэлийн хуваарилах байгууламжийг “Schneider Electric” компаний бүрэн тоноглолоор угсарч суурилуулсан гэх зэрэг. Мөн “Time classic tower” барилгын 0,4 кВ-ын ЦТП-н  щит самбарыг угсарч нийлүүллээ. “Artsat apartment” дээд зэрэглэлийн хувийн орон сууцанд мөн л “Schneider Electric” брэндийн цахилгааны тоноглол нийлүүлж угсарч суурилуулсан. “Өнөр плаза” орон сууцны барилгын цахилгаан угсралтыг хийсэн. “Өөжинмед үр шилжүүлэн суулгах төв”-ийн цахилгааны бүх угсралтын ажлыг хийж гүйцэтгэсэн. Улсын клиникийн хоёрдугаар эмнэлгийн өргөтгөлд баригдаж буй “Үндэсний оношилгоо, эмчилгээний төв”-н барилгын цахилгаан тоног төхөөрөмжийн ажлын тодорхой хувийг хийж гүйцэтгэсэн гэх зэрэг олон байгууллага орон сууцанд ажилласан. Мөн хөдөө орон нутгуудад ч ажиллаж байна. Үүний нэг нь Өмнөговь аймгийн Ханбогд суманд байрлах Оюутолгойн “Atlas copco” компаний агуулахын дизель генераторын ATS-г суурилуулсан. Мөн “Mandala tower”, “City mall” гээд хийж гүйцэтгэсэн ажлуудыг дурдаад байвал олон байна.
-Тоног төхөөрөмжүүдээ  хаанаас оруулж ирдэг вэ?  
-Бид бараа материалаа “Schneider Electric” компаний албан ёсны үйлдвэрүүдээс захиалж авдаг. Азийг хариуцсан төв салбар болох Сингапур дахь нэгдсэн агуулахаас тээвэрлэлт хийн авчирдаг. Мөн Франц дахь төв салбартай байнгын холбоотой ажилладаг.  Анх манай компаний үүсгэн байгуулагч маш их судалгаа хийсний үр дүнд “Schneider Electric” брэндийг сонгож, “Schneider Electric” ч мөн адил манай компанийг сонгон ажиллах болсон нь дэлхийн брэндийг эх орондоо авч ирэх боломжтой болсон юм. Энэ нь их том давуу тал гэж хардаг. Тоног төхөөрөмж, цахилгааны бүх тоноглолыг албан ёсны эрхтэйгээр худалдах болсон. Монголын зах зээлд маш чанартай хирнээ боломжийн үнэтэй бүтээгдэхүүнийг нэвтрүүлэх, үүнтэй хамааралтай үйлчилгээг стандартын дагуу хэрэглэгчдэд хүргэхийг зорин ажиллаж байна. “Schneider electric”-н ердөө ганцхан бүтээгдэхүүнийг зах зээлд гаргахын тулд 20 000 удаа туршиж үзсэний дараа батлагдсан бүтээгдэхүүн хэмээн зах зээлд нийлүүлдэг тул аюулгүй байдал талаасаа ч маш сайн шаардлага хангасан байдаг.
-Сүүлийн үед ухаалаг барилга, барилгын дижитал хувьсал гэж их яригдаж байна. Энэ чиглэлээр хийгдэж байгаа ажлууд байгаа юу?
-Сүүлийн үеийн тоон технологи болох өөрийн гэрийг  ухаалаг утас болон ажлын компьютероос удирдах боломжтой технологи дэлгэрээд байна. Энэ нь хүн хаана ч байсан утсаараа гэр, албан тасалгаа, ажлын байраа хянаад унтрааж, асаахад хялбар болгож өгч байна гэсэн үг юм. Хэт тансаг хэрэглээ боловч энгийн хэрэглэгчдэд ойлгомжгүй цэсүүд их байдаг. Үүнийг хялбар байлгах үүднээс бид шинэ аюулгүй, үр ашигтай технологи нэвтрүүлэх зорилгоор “Schneider Electric” компанитай хамтран Сингапур болон Хятад улсын Гуанжоу хотод инженерүүдээ дижитал автоматжуулалт суурилуулах сургалтад хамруулж  байгаа. Эхнээсээ ганц хоёр төслүүд дээр хэрэгжүүлээд эхэлсэн. Тиймээс тун удахгүй тоон технологи буюу аналог системээр өөрийн утас болон ажлын компьютероос ч удирдах боломжтой дижитал автоматжуулалт хийгдэж эхэлнэ.


-Шинэ дэвшилтэт аюулгүй, үр ашигтай ямар технологийг нутагшуулахаар зорьж байна?
-“Schneider Electric” брэндийн  Prisma буюу нам хүчдэлийн самбар болох хэрэглэхэд хялбар, өнгө үзэмж,  дизайн сайтай технологийн шинэчлэлтийг Монгол Улсдаа оруулж ирсэн. Мөн энэ самбарынхаа дагалдах жижиг хэрэгслүүд болох кабелийн утас нь хүртэл Европ стандартад нийцэх  Герман улсын сайн чанарын цахилгааны утсыг хэрэглэдгээрээ дээд зэргийн чанартай самбар угсарч суурилуулах зорилготой. Эдгээрийг зэрэглэл өндөртэй томоохон төслүүд дээр хийж гүйцэтгэдэг. Бид саяхнаас өөрсдийн гэсэн самбар угсралтын цехтэй болсон, үүгээрээ дамжуулан Монголдоо хамгийн баталгаатай, аюулгүй үр ашигтай байх технологиудыг барилгын зах зээлд нэвтрүүлэхийн төлөө ажиллаж байна. Орон сууц гэлтгүй аль ч барилгын хэмжээнд цахилгаан угсралт, автоматжуулалт, камержуулалт бүгдийг нь бид Евро стандарт болгох, хүнд ойрхон, эвтэйхэн, амьдралд үр ашигтай технологийг л  нэвтрүүлэхийн төлөө ажиллаж байна. 
-Евро стандарт манай улсад хэр зохицох бол. Онцлог давуу тал нь юу вэ?
-Дэлхийн хөгжилтэй хөл нийлүүлэн алхахын тулд нөгөө л Орос улсын технологийг хэрэглэж барилга, орон сууц барьдаг уламжлалт аргыг багасгах, Хятадын хямд төсөр чанарын баталгаагүй бараа материал ашиглаж аюултай  байдал үүсгэх нөхцөлийг халах хэрэгтэй байна. Тиймээс бид Евро стандартыг нэвтрүүлэн энэ салбарыг илүү цэгцтэй болгохыг зорьж байгаа. Монголд ихэвчлэн “Schneider Electric” компаний технологиудыг болон бусад Европын брэндүүдийг дуурайлган хийсэн Хятадын техник хэрэгсэл орж  ирдэг. Энэ нь цахилгааны асуудлыг үүсгээд байгаа юм. Тийм болохоор бид технологио Европоос оруулж ирээд, угсралтаа Монголдоо чанарын өндөр төвшинд найдвартай баг хамт олноор хийлгэх юм бол чанарын баталгаатай байх болно. Үүнийг Европ стандарт гэх бус Дэлхийн стандарт гэж хэлэх ёстой юм. IEC буюу International Electrotechnical Commission гээд байгууллага нь технологийн стандартуудыг туршиж, баталдаг. Хамгийн өндөр стандарт энэ байгууллагад баталгааждаг. IEC хангасан тоног төхөөрөмж бараа материал хэрэглэж байна гэдэг бол өөрөө чанарын баталгаа юм. Угсралтад мөн адил IEC байх юм бол төгс Евро стандарт болно.  Англи тайлбартай автоматжуулалтыг хүн бүр ойлгоод хэрэглээд байж чаддаггүй тиймээс бид хүнд ойлгомжтой тайлбартай байлгахын тулд ажиллаж байгаа. Мөн Евро стандарт гэхээр үнэ маш өндөр гэж ойлгодог. “Schneider elerctic Mongolia”-с хамгийн чанартай бөгөөд боломжийн үнэтэй тоноглол нийлүүлэх тал дээр дэмжлэг авч, боломжтой үнийг баримтлах тал дээр хамтарч ажиллаж чаддаг.
-Танай бүтээгдэхүүний чанарыг илтгэдэг гол хэмжүүр, хэрэглэгчдийн сэтгэл ханамжийн талаар?
-“Schneider electric” компанийн 20 мянга гаруй бүтээгдэхүүнүүд дэлхийд борлогддог нь нийт цахилгаан хэрэгслүүдийн 30 хувийг эзэлж байна.  Олон улсад хүлээн зөвшөөрөгдсөн хамгийн том байгууллага юм. Бүтээгдэхүүний чанарыг мэддэг хэрэглэгчид болох төслүүдийн захиалагчид гэж хэлж болно. Эдгээр үйлчлүүлэгчид бидний ажлын мөн бүтээгдэхүүний чанарын илэрхийлэл болж байгаа гэж ойлгож болно. Чанарын шаардлага хангаж сэтгэл ханамж өгч байгаа учраас хэрэглэгчдийн тоо мөн нэмэгдэж байгаа гэж хардаг.
-Цаашид хийж, хэрэгжүүлэхээр төлөвлөж байгаа ажлаасаа дурдана уу?
-Манай компаний лого найман тийш цацарсан одыг илэрхийлсэн байдаг. Энэ нь “Технологийн салбарт од шиг гялалзана” гэх утгатай юм. Голд нь байх ногоон цом бол эрчим хүчний хэмнэлт, ногоон ирээдүйн төлөө өөрсдийн хувь нэмрээ оруулахын илэрхийлэл. Тэгэхээр бид ногоон ирээдүйн үндэс болох эрчим хүчний хэмнэлт, усны хэмнэлтийг бий болгох зорилгоор барилгын бүрэн аюулгүй автоматжуулалтыг дэлхийн стандартаар дээд зэргийн түвшинд Монголын барилгын салбарт баримтлан ажиллахаар зорьдог. Зорилгоо хэрэгжүүлээд цаашлаад дэлхийд өрсөлдөхүйц мэдлэг ур чадвартай боловсон хүчинтэй болох төлөвлөгөөтэй ажиллаж байна. 
-Нийгмийн хариуцлагын  хүрээнд хийж буй ажлууд?
-Энэ тал дээр гэвэл ажил хийх, сурч хөгжих хүсэлтэй залуусыг дэмжин ажиллах хүний нөөцийн бодлого баримталдаг. Мөн “Schneider electric” компанитай хамтран “Барилгын коллеж”-ийн цахилгааны лабораторийн танхимыг SE-н тоноглолоор тохижуулж өгсөн. Тус сургуулийн захиргаатай гэрээ байгуулан төгсөх ангийн оюутнуудыг дадлагын ажилтнаар авч өөрийн төсөл дээр дадлагажуулан сургаж амжилттай ажилласан оюутнуудыг сонгон шалгаруулж ажлын байраар хангадаг. Түүнээс гадна техник технологийн салбарт ажиллаж байгаатай холбоотойгоор инженер техникийн ажилчдынхаа ур чадварыг байнга дээшлүүлж, гадаад, дотоодын сургалтад хамруулж, хөдөлмөрийн аюулгүй ажиллагааны сургалтыг тогтмол явуулж байна.