Өсвөр насны сурагчдыг байгаль дэлхийгээ хайрлан хамгаалах зөв дадалд сургах зорилготой ухаалаг гар утсанд суурилсан “Ногоон паспорт” аппликейшний нээлтийг Ногоон паспорт эзэмшигч сурагчдад зориулан зохион байгууллаа.

Нээлтийн арга хэмжээнд Нийслэл болон орон нутгаас нийт 150 орчим сурагч хүрэлцэн ирсэн байна. Тэдгээр сурагчдын дунд сугалаагаар "Фаро" сургалтын төвд суралцах эрхийн бичгээр хоёр азтан , Найрамдал ОУ-ын зусланд амрах эрхийн азтанаар нэг сурагчийг тодруулав. Мөн 2019 онд “Ногоон паспорт” аянд идэвхтэй оролцсон шилдэг сурагчдад талархлын бичиг гардуулсан байна.

Тус аппликейшнд байгаль орчны танин мэдэхүйн мэдээ мэдээлэл, зөвлөгөө, уралдаан тэмцээн, урамшууллын зар зэрэг багтжээ. Түүнээс гадна шинээр “Дижитал Ой” цэс нэмэгдсэн бөгөөд аппликейшнийг ашиглан байгальд ээлтэй үйлдлүүд хийснээр оноо цуглуулах боломжтой юм. Цуглуулсан оноогоороо 18 төрлийн модноос сонголт хийж нийслэлийн есөн дүүрэг, 21 аймагт байгуулагдсан “Ногоон паспорт-Ногоон төгөл” цэцэрлэгт хүрээлэнд мэргэжлийн байгууллагаар модоо суулгуулах, арчлуулах мөн тарьсан модон дээрээ өөрийн нэр бүхий пайзыг байрлуулах боломжтой гэж тусгажээ.

“Ногоон паспорт” аппликейшнийг өдөр тутамдаа ашигласнаар хог хаягдлаа ангилан ялгах, ус, эрчим хүчийг хэмнэх, нүүрс хүчлийн хийг дор бүрнээ бууруулах зэрэг байгаль орчныг хамгаалах энгийн аргад суралцах юм.  2018 онд хэрэгжиж эхэлсэн тус аян одоогийн байдлаар Монгол Улсын хэмжээнд 120 мянга орчим ЕБС-ийн сурагчдад хүрээд байгаа үр дүнтэй байна.