БХБЯ-ны сайд Ц.Цолмон 2008.03.24-28-ны өдрүүдэд Японы Гадаад хэргийн яамны урилгаар тус улсад ажлын айлчлал хийгээд ирлээ.

Айлчлалын үеэр Японы Гадаад хэргийн дэд сайд Х.Кимүра, тус яамны Олон улсын хамтьн ажиллагааны газрын дэд дарга К.Ода, ЖАЙКА-гийн Гүйцэтгэх захирал Х.Үэда, Газар, дэд бүтэц, тээврийн яамны дэд сайд М.Такетоши, Төлөөлөгчдийн танхимын гишүүн Асано,  болон албаны бусад хүмүүстэй уулзсан байна.

Хөшигтийн хөндийд Олон улсын шинэ нисэх онгоцны буудал барих төслийг хэрэгжүүлэх талаар Нот бичигт хоёр Тал гарын үсэг зурсантай холбогдуулан түүний дагуул хотын төлөвлөлт, байгуулалтын асуудал чухлаар тавигдаж байгаа. Иймд энэ чиглэлээр нарийвчилсан судалгаа хийн  хэсэгчилсэн ерөнхий төлөвлөгөө боловсруулах, түүнийг хэрэгжүүлэх асуудлыг одооноос ярьж, судлаж байх нь зүйтэй гэдгээ сайд уулзалтын үеэр онцлон ярьжээ.

Мөн сүүлийн жилүүдэд Монгол Улсын дотоодын санхүү, эдийн засгийн чадавхи өсөн нэмэгдэж, хотжих үйл явц, барилгажилт жилээс жилд эрчимтэй өсөн нэмэгдэж буйтай холбогдуулан хот төлөвлөлт, хот байгуулалтын салбарт тулгамдсан асуудлыг хамтран шийдвэрлэх  эрмэлзэлтэй байгаа гэдгээ ч илэрхийлсэн байна. Энэ ажлын хүрээнд:

- Монгол Улсын Хот байгуулалт, төлөвлөлтийн эрх зүйн орчинг олон улсын жишигт нийцүүлэн боловсронгуй болгох, одоо байгаа гэр хорооллыг дахин төлөвлөж орон сууцны хороолол болгон хөгжүүлэхтэй холбоотой газрын асуудлыг зохицуулах чиглэлээр хууль эрх зүйн орчинг боловсронгуй болгоход Техникийн туслалцаа үзүүлэх боломжийг судлах,

- Улаанбаатар хотын усан хангамжийн эх үүсвэрийн хүчин чадлыг нэмэгдүүлэх 3 дахь шатны төслийг хэрэгжүүлэх,

- Одоо хэрэгжиж байгаа Улаанбаатар хотын мастер төлөвлөгөө, хот байгуулалтын хөгжлийн хөтөлбөр төслийн хүрээнд Нийслэл хотын одоогийн авто замын сүлжээг боловсронгуй болгож, нийтийн тээврийн үйлчилгээний сүлжээг шинэчлэх, шинээр газар доорхи нийтийн тээврийн сүлжээ, дэд бүтцийг байгуулах асуудлыг судлах зэрэг ажлуудыг төвөвлөөд байгаагаа танилцуулжээ.

Барилгын салбар манай оронд эрчимтэй хөгжиж байгаа энэ үед энэ чиглэлээр өндөр хөгжсөн гадаад орнуудтай хамтран ажиллах нь чухал юм. Газар хөдлөлийн өндөр баллын бүсэд оршдог манай улсын хувьд энэ чиглэлээр дэлхийд тэргүүлэх технологийг эзэмшсэн Япон Улсын туршлага, газар хөдлөлийн бүсэд барилга барих орчин үеийн технологийг нэвтрүүлэх; барилгын хийц бүтээцийг эвдэх, үл эвдэх аргаар турших сорил шинжилгээний лаборатори байгуулах боломжийг судлах асуудлаар хоёр тал  ярилцжээ. Энэ чиглэлээр манай тал төслийн санал боловсруулаад байгаагаа Японы талд уламжилжээ. 

Уулзалтын үеэр японы тал манайд маш ашигтай нэгэн санал тавьсан нь Улаанбаатар хотын гэр хорооллын нөхцлийг сайжруулах загвар төсөл хэрэгжүүлэхээр шийдвэрлээд байгаа болон одоо байгаа гэр хорооллыг дахин төлөвлөж орон сууцны хороолол болгон хөгжүүлэхтэй холбоотой газрын асуудлыг зохицуулах чиглэлээр хууль эрх зүйн орчинг боловсронгуй болгоход Техникийн туслалцаа үзүүлэх боломжтой гэдгээ илэрхийлжээ.

БАРИЛГА.мн
Н.Уранзаяа