Барилгын бусад хийц хэсэгтэй харьцуулахад дээвэр нь нэг талаас гадна цаг агаарын, нөгөө талаас дотор агаарын чийг зэрэгт хамгийн их өртдөг бүтээц юм. Манайхан дээврийн дулаалгад төдийлөн анхаардаггүй. Гэтэл дулааны алдагдлын 25 орчим хувь нь тааз, дээврээр алдагддаг. Дээврийг сайн дулаалснаар сууцанд өвөлдөө дулаан, зундаа сэрүүн байх нөхцөл бүрдэнэ. Хэрэв дээврийн хөндийг ашиглахгүй бол дээд давхрын хучилтыг дулаална. Харин сууцны зориулалтаар ашиглах бол дээврийн налуу хэсгийг нэмж дулаална. Хөөсөн полистирол хавтан, шилэн хөвөнгөөр дулаалбал зузаан нь 15-20 см байх нь зохистой.
Дулаалгатай дээврийн хийцэд битүүмжлэл сайтай уур тусгаарлагч хийх нь чухал. Ингэснээр өрөөний доторх чийгтэй агаар дээврийн хийц рүү нэвтэрч түүнийг норгож гэмтээхгүй. Уур тусгаарлагчийг битүүмжлэл муутай хийвэл агаар нэвтэрч дээврийн хийц хөлөрдөг. Өвлийн улиралд энэ нь цантаж хөлдөх ба дулаан болоход хайлж тааз, хананд гэмтэл учруулна. Үүний гэрч нь хана, таазны уулзвар хэсэгт үүссэн толбо юм.
Норсон буюу чийг авсан дулаалгын материал нь дулаан тусгаарлах чанараа алдсан байх ба дээврийн модон хийцэд гэмтэл учруулж болзошгүй. Дээврийн модон хийцийг галд өртөх, хөгц, мөөгөнцөрт идэгдэхээс хамгаалсан байх шаардлагатай.


 

Шалны дулаалга:

Барилгын шал бол хаших хийцийн нэг гол бүрэлдэхүүн бөгөөд дулааны алдагдлын 15 орчим хувь нь шалнаас алдагддаг.
Өрөө тасалгааны дулаан агаар дээш хөөрч шалны хучилтан дээр хүйтэн байдаг тул шалыг дулаалах нь дулаан алдагдлыг багасгах гол арга юм. 
Шалны дулаан тусгаарлах материал нь дулаан алдагдлыг багасгах, дуу тусгаарлалтыг ихэсгэх, өрөө тасалгааны температурыг хэвийн нөхцөлд байлгахад чухал ач холбогдолтой ба дулаан дамжуулалтын эсэргүүцэл багатай эрдэс хөвөн, чулуун хөвөн, шилэн хөвөн, хөөсөн полистирол, полиуретан хавтан зэргийг хэрэглэхэд тохиромжтой.  
Шалны дулаалга нь түүний бүтэц, байрлал, зоорийн давхартай эсэх, ямар материалаар хийгдсэнээс шалтгаална. Хэрэв таны байшин хүйтэн зоорийн давхартай бол нэгдүгээр давхрын дулааны алдагдлыг багасгахын тулд зоорийн хучилтыг доороос нь дулаалахад хангалттай. Ингэхийн тулд 5см-ээс багагүй зузаантай хөөсөн полистирол хавтанг зориулалтын цавуугаар нааж тогтооно.
Зоорийн давхаргүй бол шалаа дулаалахын тулд дээрээс нь нэмж дулаалан давхар шаллах нь арай хялбар байх болно. Ингэж хийх тохиолдолд хаалганы самбаруудыг доороос нь тайрч хасах ажил гардгийг анхаараарай. 

Дулаалгатай модон шалны бүтэц

Цонх хаалганы дулаалга:

Хуванцар /PVC/ цонх манай орны нөхцөлд 3 давхар шилтэй байх нь хамгийн зөв сонголт боловч бид санхүүгийн байдлаас шалтгаалан 2 давхар шилтэйг сонгодог. Хуванцар цонхны жийргэвч резин ашиглалтын шаардлага хангахгүй болж дулаан алдахаас гадна шилнээсээ дулаанаа алддаг. Хуванцар цонхны жийрэг резин муудсанаас болж завсраар нь тоос шороо, агаар нэвтэрдэг тул жийргийг солих хэрэгтэй. Чанар муутай цонхнуудын хүрээ сэнсэрнээс үүдэн гажиж дулаан алдалтыг ихэсгэдэг. Энэ үед завсар зайг наалттай хөөсөнцөр туузаар наах хэрэгтэй. Нийт хэсгээрээ хүйт нэвтрүүлж байгаа бол бүхэлд нь том гялгар уутаар бүрхэж өгөөрэй. Мөн том цонхны шил нь өөрөө хүйтнийг дамжуулдаг тул ялангуяа хойшоо харсан том цонхыг маш сайн цэвэрлэж тусгай гялгар уутан плёнкоор бүрэх эсвэл электрон барааны бөмбөлөгтэй зөөлөвч уутыг шил цэвэрлэгч шингэн ашиглан шууд шилэн дээр нь нааж болно. Үүнийг дараа нь салгаж цэвэрлэхэд ч маш хялбар байдаг.



Хаалга, цонхны хананд суусан хэсгүүд зай завсартай бол шахдаг хөөс эсвэл силикон цавуу ашиглан зайг бөглөөрэй. Гол нь цаг агаар арай дулаан үед хүйтэн температурт тэсвэртэй бүтээгдэхүүн ашиглах нь тохиромжтой. Цонхны тавцан хэсгээр  салхи үлээж байвал дулаалгын материалаар чигжиж болно.
Хэрэв хаалгаар хүйтэн агаар их ордог бол давхар хаалга хийх эсвэл хаалгыг порлон, лидрин ашиглан дулаалах хэрэгтэй.