Хан-Уул дүүрэг,  120 мянгатын автобусны буудлын хойно 2,2 га талбайд ногоон байгууламжтай таван тивийн 41 төрлийн 200 гаруй ан амьтадын баримал хөшөөтэй цэцэрлэгт хүрээлэнг шинэчлэн байгуулсан нь олны талархлыг хүлээж байна. Энэхүү цэцэрлэгт хүрээлэнг нэгэн иргэн өөрийн хөрөнгөөр тохижуулсан гэх мэдээлэл олон нийтийн сүлжээнд тархаад байсан нь худал мэдээлэл болохыг ХУД-ийн Засаг даргын тамгийн газраас мэдээллээ.

       Тодруулбал, Хан-Уул дүүргийн Засаг дарга Ж.Алдаржавхлан, "Хан-Уул дүүргийн ЗДТГ, Тохижилт үйлчилгээний хэлтэс хамтран хад чулууг ашиглан байгалийн тогтоцыг харуулсан хэсгүүдийг бий болгож, ногоон байгууламж, усан оргилуур, хүрхрээ, дугуйн болон тэшүүрийн зам, хүүхдийн тоглоомын талбай бүхий цогц жишиг цэцэрлэгт хүрээлэн 49,0 сая төгрөгийн өртөгөөр бүтээсэн. Хан-Уул дүүрэг “Эко дүүрэг” болох зорилтын хүрээнд энэхүү жишиг цэцэрлэгт хүрээлэнгээс гадна Хан-Уул дүүрэг дахиад хоёр цэцэрлэгт хүрээлэнтэй болно. Жишээ нь энэ ондоо багтаан  дүүргийн Нисэх, яармаг орчимд "Дөрвөн улирал"-ын жишиг цэцэрлэгт хүрээлэнтэй болохоор төлөвлөн ажиллаж байна" гэлээ. Түүнчлэн тус амьтдын баримал нь бороо болон наранд өнгөө алдаж мууддаггүй нийлэг пластик материалаар хийгдсэн гэдгээрээ онцлог юм.  Мөн мод, бут, сөөг нь 50 гаруй жилийн настай бөгөөд шинэчилсэн тохижилтын ажлын хүрээнд гоёл чимэглэлийн зориулалттай мод бут болон ховор эмийн ургамалтай" гэв.

 

    Цэцэрлэгийн баримлуудыг эвдэлж сүйтгэх, хулгайлах зэргээс сэргийлэх үүднээс камерийн хяналтыг сайжруулж, цэцэрлэгт хүрээлэнг бүхэлд нь хянах камержуулалт болон услалтын  иж бүрэн системийг шинэчлэн хийжээ.