БНХАУ-ын буцалтгүй тусламжийн хөрөнгөөр хэрэгжүүлсэн төслийн хүрээнд барьсан “Хөгжлийн бэрхшээлтэй хүүхдийн хөгжлийн төв”-ийн барилгыг Монголын талд өнөөдөр хүлээлгэн өглөө. Ёслолд БНХАУ-аас Монгол Улсад суугаа Онц бөгөөд Бүрэн Эрхт Элчин сайд Шин Хай Мин оролцон төвийн түлхүүрийг УИХ-ын гишүүн, ХНХ-ын сайд С.Чинзоригт гардуулан өгсөн юм.
ХНХ-ийн сайд С.Чинзориг хэлэхдээ, хоёр улсын дипломат харилцааны түүхт 70 жилийн ойн бэлгэдэл болсон энэ төвийг Монгол, Хятад хоёр хөрш орны “Найрамдлын барилга” хэмээн нэрлээд, “Энэ нь хоёр орны төр, засгийн зүгээс Монголын ирээдүй болсон хүүхдүүдийг онцгойлон анхаарч, тэдний хөгжлийг дэмжиж байгаагийн нэг илрэл” хэмээн тэмдэглэв.




“Монгол Улсад хөгжлийн бэрхшээлтэй 103 мянган иргэн байгаагийн 11 хувь буюу 11 мянга орчим нь 17 хүртэлх насны хүүхэд байна. Эдгээр хүүхдийг хөгжих, төлөвших, хүмүүжих нөхцөл бололцоогоор ханган, нөхөн сэргээх эмчилгээнд хамруулахад хамгийн орчин үеийн эмчилгээ болон нөхөн сэргээх үйлчилгээний тоног төхөөрөмжөөр иж бүрэн хангагдсан энэхүү цогцолбор төв том хувь нэмэр оруулна” гэдгийг ХНХ-ын сайд онцолсон юм.
Тэрээр,

Тэрхүү цогцолбор нь тив, дэлхийн хэмжээний тэмцээн явуулах боломжтой, пара спортын 10 төрлөөр зэрэг хичээллэх, олон улсын стандартад нийцсэн төв байна гэлээ.
Ёслолд оролцсон Элчин сайд Шин Хай Мин, БНХАУ-ын Засгийн газрын 35 сая орчим ам.долларын буцалтүй тусламжийн хөрөнгө оруулалтаар барьсан энэхүү төв нь тус улсаас Монгол Улсад үзүүлж буй хүмүүнлэгийн хамгийн том төсөл гэдгийг онцлон тэмдэглэж байв. Төслийг гүйцэтгэсэн БНХАУ-ын “Зун Юань интернэшнл инженеринг” компанийн гүйцэтгэх захирал И Жун хэлсэн үгэндээ, цогцолбор төв нь хоёр орон дипломат харилцаа тогтоосны 70 жилийн ойн бэлэг болж байна хэмээн онцлоод, “Монгол Улсын эрүүл мэндийн салбарын хөгжилд үр ашиг, хувь нэмрээ оруулж Монголын ард иргэд, хүүхдүүдэд хүртээмжтэй үйлчилж байх, хоёр орны найрамдалт харилцааны том төсөл” гэж байв. Төсөлд 120 монгол ажилтан тогтмол ажиллаж, ачаалал их үед 260 гаруй монгол ажилчдыг нэмж байсныг тэрээр тэмдэглэсэн юм.
Ёслолд оролцсон зочид, төлөөлөгчид Хөгжлийн бэрхшээлтэй хүүхдийн хөгжлийн төвийн барилгын шийдэл, суурилуулсан тоног төхөөрөмж, техник хэрэгсэл, бассейн, эмчилгээ сувилгааны өрөөнүүдээр орж танилцсан юм.










Тодруулга: Монгол Улс, БНХАУ-ын Засгийн газрын хоорондын 2014 оны солилцох захидал болон тухайн үеийн НХХЯ-ны 2016 онд байгуулсан гэрээний дагуу БНХАУ-ын буцалтгүй тусламж 30 сая ам.долларын санхүүжилтээр “Хөгжлийн бэрхшээлтэй хүүхдийн хөгжлийн төв”-ийг барихаар болж барилгыг нийслэлийн Баянгол дүүргийн 20-р хорооны нутаг дэвсгэрт 2016 онд эхлэсэн юм. Өнгөрсөн хоёр жил гаруйн хугацаанд БНХАУ-ын Худалдааны яам, БНХАУ-аас Монгол Улсад суугаа ЭСЯ болон Монгол Улсын холбогдох яамдын дэмжлэгээр, харьяа газрууд, компаниудын удирдлага, хоёр орны барилгачид, ажилчдын хөдөлмөрийн үр дүнд “Хөгжлийн бэрхшээлтэй хүүхдийн төв”-ийн барилгыг төлөвлөсөн хугацаандаа дуусгажээ.
БНХАУ-ын Гадаад хэргийн сайд Ван И өнгөрсөн онд манай улсад айлчлах үеэр, тус төвд шаардлагатай байсан дагалдах бүтээн байгуулалтын нэмэлт гэрээг эцэслэн, төвийн орц гарц, дулааны шугамын дээгүүр төмөр бетон гүүр барих, ногоон байгууламж, хүүхдийн спорт талбай байгуулах, гэрэлтүүлгээс гадна 155 нэр төрлийн эмнэлэг, сувилгааны тоног төхөөрөмжийг нэмж авах шаардлагатай байсан асуудлыг шийдвэрлэжээ. Мөн тус төвд ажиллах эмч, эмнэлгийн мэргэжилтэн 350 хүнийг БНХАУ-д сургах, дадлагажуулах ажлыг зохион байгуулахаар болсон юм.
 

Б.Болд
Гэрэл зургийг Б.Чадраабал